الأحد، 31 أكتوبر 2010

ويبقى الصمت !! (ح10)



الحلقه اللى فاتت عرفنا راضى ومنال مصرين ان فيروز تسيب مصر وتسيب شغلها وتسافر تعيش هناك لان مصر مش وفرتلهم اللى بيحلموا بيه لكن برا دا عالم تانى ..........وعرفنا رفض فيروز التام للموضوع دا عرفنا ان منه فضلت مستنية ياسر لما يرجع وفى الاخر راجع لها سكران ولا حاسس بالدنيا شوفنا قد ايه فيروز واجهت التحديات كلها عشان اللى مؤمنه بيه وعرفنا كمان ان كريم راح ليا المدرسه عشان ياقبلها بس للاسف هى فى اليوم دا مراحتش المدرسه وعرفنا ان سرااااج خرج للكافيتريا مع فيروز عشان يتناقشوا .........

***********************************************

تعالو نشوف ايه للى حصل !!!!!!!!!!!!!!!!!!!!!!

فى الوقت دا يطلع سراج وفيروز ويقعدوا فى الكفاتيريا بتاعه الشركه

سراج : ها ياستى قوليلى بقى مالك مش مظبطه بقالك يومين .......
فيروز : تعرف ان دى اول مرة حد يقولى مالك من 3 سنين
سراج : يااااااه ليه كدا
فيروز : تبدأ تحكيله عن حياتها وزى مايكون ماصدقت لقت حد ترمى عليه همومها ..........بس ياسيدى ودى حكايتى كلها وفى الاخر بابا بيكلمنى امبارح وال ايه عايزنى اتخطب لابن صاحبه .....بيقول شاف صورتى واعجب بيا ..........وعايزنى اسافر عشان نتعرف على بعض ......
سراج : ايه المشكله
فيروز : المشكله انى مش هتجوز بالطريقه دى بابايا مشارك باباها .......يبقى انا كمان لازم اشارك و اتجوز ابنه لا لايمكن انا مش سلعه انا عايزة اللى ارتبط بيه دا يتجوز فيروز مش فلوس فيروز .......يحبها يخلص لها ويخاف عليها يعيشها بأمان مش حد يدخلنى فى دوامه ...ويسبنى اول مايحصل مشكله بين ابويا وابوه لالالا انت شايف ان دا ينفع اتجوزه
سراج : دا رأى من البدايه بس كنت حابب اسمعك عشان مأثرش عليكى بكلامى .....

فيروز : اكتر حاجة توجعنى انى اكون لعبه فى ايد حد ......
سراج يتنهد ويتعدل فى قعدته : عارفه عندنا برضو بيفكروا زى تفكير باباكى بس يمكن احنا على صغير شويه .......عايزين يجوزونى نرجس بنت عمتى امى دايما تقولى ياواد نرجس بتحبك ياواد مش هتلاقى احسن منها ..... ......برضو والدى شايف انى لازم اتجوزها عشان ابوها عنده اراضى وكدا .....كل اللى مزعلهم ازاى اضيع فرصه من ايدى فرصه جيالى على طبق من دهب مبيفكروش هل انا بحبها ولا لا هل هقدر اسعدها ولا لا .....
فيروز : تعرف الدنيا دى غريبه اوى .....متلاقيش فيها حد مستريح ........تلاقى كتير سايبين اللى بيحبوهم وبيرتبطوا بناس عمرهم مااتمنوهم ......بس مش عارفه ليه بيوافقوا على كدا؟؟؟؟؟ ....ليه هما سلبيين مبيدافعوش عن حبهم ؟؟؟؟ ......ليه بيموتوا قلوبهم بصمتمهم .؟؟؟؟.........ليه بيقبلوا قلب حضن عمرهم مااتمنوه ولا حتى كان على هواهم ؟؟؟؟؟؟....ويقولك هتعود عليه !!!!!......عارف المشكله مش فى كدا المشكله ان كل واحد بتلاقى جواه ذكريات مخبيها ......دايما عقله وقلبه مع اللى بيحبهم ........مش واخد باله انه بيظلم اللى ارتبط بيها او اللى ارتبطت بيه .......تلاقى كل واحد فيهم بيعيش تمثيليه سخيفه بيقوم فيها بدور المحب .......مبيقدروش يتكلموا عشان ميخربوش على انفسهم ......ويضطروا يكملوا مشوار العذاب .....تلاقى جواه احساس بيخنق احساس يموت ..........اه ساعات كتير بحب الحب وساعات كتيييير بكرهه من اللى بشوفوا ..........بحبه واتمنى انى ارتبط بالانسان اللى قلبى يختاره .....بس برجع اكرهه لما الاقى دمعه على خد اى اتنين حبه بعض وفرقهم الزمان .......فرقهم جبروت اب او ام .....طرق الفراق كتييييييير بس مفيش غير طريق واحد بيمشوا فيه كلهم هوطريق العذاب والدموع

سراج عمال بيسمع كلامها ومندهش معجب بتفكيرها ويبتسم : ايه الكلام الكبير دا احنا مش قدك :)
فيروز : تصدق انى ارتحت جدا من الكلام معاك بجد متشكرة جدا انك سمحتلى اتكلم معاك بجد كنت هتفجر ومليش غير سلمى بس ربنا يكون فى عونها ويصبرها على اللى هى فيه
سراج : عيب عليكى ......عارف بتفكرينى بإسراء اختى برضو كل ماكانت تكون مخنوقه نخرج ونروح اى مكان وتفضل تحكيلى وتفضفض زيك كدا .........ياستى انا تحت امرك فى اى وقت
فيروز تبص فى الساعه :ياخبر الكلام اخدنا واتأخرنا يلا نرجع نكمل شغلنا
ويقوموا هما الاتنين .....وهما رايحين على المكتب يدور بينهم حوار على سفر فيروز وهى مش هتخسر حاجة لو عملت الباسبور على الاقل تطمنهم ......انها بلاش تخسر اهلها لان ملهاش غيرهم مهما كان ....وان مفيش حاجة لو اخدت اجازة وسافرت قضت كام اسبوع عشان تكون ارضتهم .......فيروز اقتنعت شوية وقرر انها هتروح تعمل الباسبور ..... ويوصلوا للمكتب ويكملوا شغلهم بنشاط



سلمى قاعده جنب مامتها وعماله تقرأ قرآن وتدعى ان ربنا يقومها بالسلامه .....تقفل المصحف وتبص على مامتها ودموعها نازله ....زعلانه جدا عليها وزعلانه من نفسها على المعامله اللى كانت بتعاملهالها .....تفتكر باباها وتبكى ....نفسها تنساه ...تكلم نفسها ليه كدا يابابا.....سلمى حاسه انها فى دوامه ......نفسها حد يخرجها منها ومش هتلاقى غير ربنا هو اللى حاسس بيها هو اللى احن عليها من اى حد .....تقوم وتفرد المصليه وتبدأ تصلى وتدعيه انه يخفف عنها ويشفى امها ويرحم ابوها ........
********************************************
محمد مرحش الشغل وقاعد على السرير بيفكر فى منه وسرحان على الاخر وعمال يخبط راسه بالراحه على حرف السرير هيموت ويطمن عليها .....يمسك مويابله عشان يتصل عليه يلاقى نانسى بتتصل وبتطمن عليه وبتشوف ماجاش الشغل ليه وبتبلغه شوية حاجات مطوبه منه بكره .....يقفل محمد معاها ويتصل على ياسر يلاقى الموبايل مقفول ......يرمى الموبايل جنبه ....ويكلم نفسه : يارب تكونى بخير يامنه
*****************************************

كريم يتصل على يارا .....يارا تجرى على الموبايل وترد بس طبعا بعد 3 مرات اتصال من كريم

يارا : الو
كريم : ازيك
يارا : بتتصل ليه دلوقتى مش قولتلك متتصلش تانى
كريم : وحشنى صوتك ...وبعدين قلقت عليكى
يارا : ليه ان شاء الله
كريم : استنيتك قدام المدرسه ملقتكيش خفت تكونى تعبانه ولا حاجه
يارا : والله لا متقتقش ......وبعدين بأى صفه تطمن عليا او تروحلى المدرسه .....لو سمحت انا مش عايزة مشاكل ومش حمل اى حد يقول عنى كلمه او ياخد عنى فكره مش كويسه وسلام دلوقتى عشان انا مش فاضيه للكلام دا ...وصدقنى انا هكسر الشريحه عشان ارتاح من الاتصالات .......
كريم : اييييه حيلك حيلك انت بلعتى راديو ولا ايه هو ايه اللى بأى صفه .يارا صدقينى انا بحبك بجد انا معجب بيكى جدا انت كل مرة بتزيدى فى نظرى ....وصدقينى انا مش واحد من العيال اللى بتتسلى ولا كدا بكرة الايام تثبتلك .....بس صدقينى انا هختفى من حياتك للابد بس قبل دا انا هستنى منك قرار وانا هحترم اى رد تقوليه بس فكرى كويس يايارا ......سلام
ويقفل كريم ........وبص لعادل : ال مذاكرة ال هههههه البت بتقولى مش فاضيه للكلام الفارغ دا ....بس على مين
عادل يضحك : ياابنى فكك منها شكلها فقرومعقده ملهاش فى السكك دى
كريم : وحياتك كلهم بيقولوا كدا فى لاول وبكره يفتحوا على البحرى وبكره تشوف
يارا رايحه جايه فى لاوضه عماله تفكر فى كلامه مش عارفه ايه اللى بيحصلها دا ...هى معجبه بيه لكن عقلها مش مقتنع تنفخ بزهق وتروح على مكتبها وتقعد وتفتح كتابها لكن طبعا مش مركزة خالص


توصل فيروز لمكتب الجوازات وتدخل تخلص ورقها وولسه بتلفت .....تشهق وتتسمر مكانها وقلبها يفضل يدق وياخدها الحنين وتكلم نفسها مش ممكن .....هو ....عمرو ...لالالا.....وتكذب عنيها ....وترجع تقول ياااه بعد العمر دا كله اشوفك تانى وفضلت بصاله من بعيد وسرحت فيه وفى الايام الحلوة اللى قضوها فى الجامعه ......قد ايه وحشنى كلامك وصوتك ....وحشتنى صورتك اتغيرت شوية بس مش كتير.....ياترى اتجوزت ولا لسه هتمشى عشان تروح تسلم عليه ...تنادى عليها الموظفه عشان تدفع الفلوس وتاخد الوصل ......تروح جرى تدفع الفلوس وهى عماله تبص عليه عشان ميغبش عنها ........الموظفه تمد اديها عشان تديها الباقى تسحبه فيروز بسرعه فيقع منها على الارض توطى تجيبه بسرعه وتقوم تبص متلاقيهوش .....
.تفضل تتلفت حواليها وتدور عليه وسط الناس ومشيت شوية لقدام ولسه بترجع وبتتلفت تخبط جامد فى حد .....والورق اللى معاها يقع منها بعصبيه ولسه هتزهق تبص تلاقيه هو ....يوطوا هما الاتنين عشان يلموا الورق ......فيروز تفضل بصاله ومش مركزة يلملها الورق بسرعه ويقوم وهو بيتأسف :: بجد متأسف جدا مأخدتش بالى ......يارب ماكونش سببتلك اى ازعاج ويمشى بسرعه حتى مايبصش وراه ....... فضلت فيروز بصاله لغايه ماغاب عن عنيها ...وتدمع ...وقلبها بيصرخ : قد كدا مفتكرتنيش .....قد كدا الدنيا شغلتك ونستك فيروز وتمشى وهى حزينه ...........
وفجأه يرجع الشخص دا بلهفه ويجرى ويفضل يدور عليها ويبص يمين وشمال.....ويكلم فى نفسه ياترى رحتى فين .....مش ممكن اوعى تكونى مشيتى .....يارب الاقيها ......ويفضل يدور ويلمحها وهى بتركب عربيتها .يجرى وينادى عليها ....لكن هى تشغل عربيتها وتمشى ..........هو يتضايق جدا .........هويبص للسما ويكلم نفسه ......ليه كدا تمشى....... فيروز تسوق ودموعها نازله وقلبها واجعها .......وفجأه تفرمل بسرعه وتعدى الولد الصغير اللى كانت هتخبطه ....وتزعق لنفسيها فوقى بقى ايه اللى جرالك هو مفتكركيش انت لسه بتحبيه .....لازم تنسى ....لازم تقوفى من الوهم دا كله .....
********************************************
توصل فيروز قدام باب العمارة لكن متطلعش وترجع تانى على الشغل عشان تسلى وقتها لكن تحصل حاااجة غريبه اوى

هنااااك ياااااااترى ايه هى دا اللى هنعرفه الحلقه اللى جايه .........!!!!!!!!!!!


هناك 26 تعليقًا:

همسات وبحــ الحياه ــر يقول...

بحجز اوول تعليق

بجد وحشتوووووونى كتير

معلش اتأخرت عليكم بس بجد مشغوله جدا

دعواتكم

همسات وبحــ الحياه ــر يقول...

علفكرة انا بجد بكون مبسوطه من تعليقاتكم

يارب كل الحلقات تنال دايما اعجابكم

بحبكم فى الله

Mona Hekal يقول...

شوفتي السرعة في الاداء قريتها كلها علي طول و قلت الحق التعليق الاول
كالعادة خلصت بسرعة يا سيتي شيدي حيلك معانا مش كده بصي نزلي كل يومين حلقة ما ينفعش النظام ده
في انتظار الحلقة الجاية

R-H-S يقول...

مخليتهومش يعرفوا بعض لييييييييييييه
حراااااااام عليكي هههههههه

Ramy يقول...

يادى فيروز هتموتيها من المفاجأت

بتاعت كل مرة

بس جميلة القصة بتحلو أكتر و أكتر


مستنين بقا

(:

سندباد يقول...

وما زالت الاثارة مستمرة
اتكلمتي عن موضوع حلو اوي النهاردة وان كان عديتي عليه بسرعة ان مصر مش بتوفر لولادها حياة كريمه فيضطروا انهم يسبوها ويهاجروا
كل حلقة اجمل من اللي قبلها
منتظرين الباقي
تحياتي

غير معرف يقول...

الحكاية كل مدى ما بتحلو
وبتشوقينا
جميلة يا توتى
تسلم ايدك يا قمر
وحشانى

Carmen يقول...

يادي التشويق
يابنتي ماتتأخريش علينا كتير كده
يلا بسرعة مستنية

جايدا العزيزي يقول...

همسات وبحــ الحياه ــر

دخلنا جو الاثارة والتشويق

ايه يابنتى البراعه دى

سلفينى شويه

دائما مبدعه

تحياتى

Unknown يقول...

علي فكرة حلقة حلوة اوي
www.isismylove.blogspot.com

فراشة يقول...

انا جيت اهو وهعلق عشان خاطرك
أصلي مش بلاقي كلام احلى من اللي انتي بتكتبيه بصراحة ...
أقولك حاسه اني بشوفها قدامي
يالا نعملها مسلسل وانا عليا الإخراج :)

ماشاء الله عليكي ... لا انا عايزة اعرف حكاية عمرو وفيروز ايه مليش دعوه بقى

منى

محمود نشأت يقول...

جميلة بجد

ツSmiLeY AnGeLツ يقول...

السلام عليكم
شوفي المرة دي سماح المرة الجايه لاتتاخري
هههههههههه
الله يكون في عونك
بجد روعة الحلقة
مستنيه الجاية
تقولي هيحصل ايه في الحلقة الجايه ها
هههههههه
ربنا يوفقك.
تقبلي مروري
سلامي لاجمل بنوتة.

لــــ زهــــــراء ــــولا يقول...

ازاي ميعرفهاش ..ازاي ماخدش باله منها... لما رجع تاني نسي يديها ورقة من اللي وقعوا منها فيروحلها الشغل والورقة فيها عنوان الشغل !! ولا ايه انتي شوقتيني جدااااااااااااااااا

لولا

لــــ زهــــــراء ــــولا يقول...

نسيت اقولك اسلوب بسيط وجميل وراااااائع
لولا

mrmr يقول...

ازيك يا قمر
وحشتينى جدا جدا

يا حبيبه قلبى خفى عن فيروز شويه
مش كل مره تخبطيها مفاجأت
البنت كده اعصابها تعبت بجد

اسلوبك روعه كل يوم والتانى بتزيد القصه جماااال

منتظره الباقيه

قبلاتى

باحث عن حب يقول...

رائعه
دوما
يا دموع
الى الاماما دوما
ايوة كده

Hanan Elshafey يقول...

:)

فولتاا يقول...

اوبااا
اللعب احلو ياتغريد هانم
:D

تعالى عندى انا بكتب قصة انا كمان
الحقيلك كرسى

Noha Saleh يقول...

ايه الجمال ده
بس المرة الجاية طوليها شوية

Dr/ walaa salah يقول...

حلو اوي يا همسات

الاحداث بدأت تجري للاحسن وللاشوق


برافو عليكي يا حبيبتي

قصتك وكتابتك كل يوم بيزيدوا رونق


في انتظار الحلقه القادمه

محمد التركى يقول...

السلام عليكم

الله الله
طبعا انا روحت وشفت الحلقات اللى فاتتنى علشان افهم الحلقه ديه

شئ جميل كل مره تزداد حلاوه واثاره وتشويق
مش هتبطلى بقى انتى التشويق بتاعك ده
ههههههههه
بس بجد تجنن
ربنا يارب يبارك فيكى وتكونى كاتبه قد الدنيا

تقيبلى تحياتى
محمـــد التركـــى

ساسو يقول...

حبيبه هارتي
وحشتيني

جمييييييييييله دايما
ومتألقه

شوية قهوة يقول...

ازيك يا قمر
واحشاني اوي والله
بجد كل مرة بيزيد اعجابي بالقصة
وشوقي لاني اقرا الحلقة التانية متطوليش بقى

miroooo يقول...

مستنيه الحلقه الجايه
قصه مثيرة ومشوقه جدا
تسلم ايديكى
ربنا معاكى ان شاء الله ومتتاخريش علينا تانى
تحياتى

~ISLAM~ يقول...

جميل اوى يا همسات
عايزين الحلقه الجايه بقى يا قمر
وبعدين بعد ما تروح عن العماره ترجع ليه ؟؟؟؟؟؟؟؟؟؟؟؟؟؟
مينفعش تسربيلى الامتحانات قصدى الحلقه الجايه هههههههههههههه