الجمعة، 27 أغسطس، 2010

الحلقه الثانية


بشكركم جدا على النصايح الجميلة انا عمرى ماازعل بيدينى معلومة او بيوجهنى لجاحة بالعكس بفرح ان لسه فيه ناس بتحب الخير للى قدامها


انتهينا المرة اللى فاتت
محمد مستنى تليفون من منه عشان يطمن عليها
وان فيروز راحت لسلمى عشان تعرف مالها

*******************************
توصل فيروز لبيت سلمى
(سلمى دى بنت جادة منطوية بتحب بابها جدا يمكن شوية بعيده عن مامتها لكن برضو بتحبها وعمرها مافكرت تقرب منها ساكنين فى بيت متوسط الحال فى الجيزة )

يرن جرس الباب

زينات فى المطبخ : افتحى ياسلمى
تقوم سلمى من على السرير وتروح تفتح
سلمى : فيروز اهلا اتفضلى
فيروز : ايه اهلا دى مفيش وحشانى مفيش ازيك مفيش حضن بوسه اى حاجة ترفع من معنوياتى يابت هو انا نايمة فى حضنك من امبارح
سلمى بإبتسامه خافته : حقك عليا والله انت بجد وحشانى تعالى ندخل الاوضه
ويروحوا على اوضه سلمى ويقعدوا على السرير
فيروز : ممكن بقى اعرف مجتيش النهاردة الشغل ليه كلهم سألوا عليكى النهاردة
سلمى بزهق : مليش نفس اعمل حاجة ولا اروح فى حته
فيروز : دا انت حالتك صعبه مالك ياقطتى انا كنت حاسه من صوتك امبارح ان فيه حاجة
سلمى بعيون مدمعه : نفسى اطلع من البيت دا زهقت خلاص كل يوم خناق خناق كرهت البيت وكرهت كل حاجة فيه دايما ماما وبابا يتخانقوا وماما هى السبب مش عارفة هى بتعاملوا كدا ليه هو يعنى هيموت نفسه طول النهار فى الشغل يادوب ييجى ينام ويمشى تانى هى بقى مابتصدق تشوفوا وهاتك ياخناق ساعات بيبات يومين وتلاته بره عشان خاطرها وعشان يعيشنا احسن عيشه ويجبلنا كل اللى نتمناه
دايما معاملتها معاه جافه هو بيصعب عليا كتير وامبارح حصلت خناقه كبيره واول مرة يمد ايده عليها وساب البيت ومشى وهى فضلت تدعى عليه وتشتم فيه هو كان عملها ايه تعرفى ساعات بحسدك على انك قاعده لوحدك لاام ولا اب
فيروز تتأثر جدا من كلام سلمى تقرب منها وتمسع دموعها وتاخدها فى حضنها : حبيبتى مهما كان دى امك انت متعرفيش هى مالها او ايه اللى جواها انت حتى عمرك ماقربتى منها مش يمكن هى عندها حق انت متعرفيش اسباب خلافها مع باباكى انت كل اللى بتشوفيه وتسمعيه الخناق وبس مجربتيش تقعدى معاها مرة وتحكوا سوا مجربتيش تروح تمسحى على راسها وتوفيها مالها جربى
احمدى ربنا ان ليكى ام واب صدقينى دى نعمه ربنا يدمها عليكى ...........فيروز تحاول تغير الموضوع
وبإسلوب لذيذ : اخبار حزومه حبيب القلب ايه يابت
سلمى تضحك اوى : اخده الغراب وطار
فيروز : نعم
سلمى : هيخطب بنت عمى يوم الخميس اترنه كان بيحبها وانا بغبائى فاكراه بيحبنى انا
فيروز مش عارفة تعمل ايه جت تخرحها من الموضوع دخلتها فى موضوع اكبر
ويسود الصمت للحظات وتبص فيروز لسلمى : اسكتى جه النهاردة واد زى القمر الاستاذ حسن خلانى مشرفه عليه تخيلى بقى
سلمى : يلا خلينا نخلص ونفرح بيكى
فيروز : انت اتخبطى فى عقلك حب ايه اللى انت جاى تقول عليه لا يوونكن
تدخل زينات(مامه سلمى ) على ضحك فيروز وسلمى والهم والحزن مرسومين على وشها وهقت من العيشه مه جوزها لكن هى مستحمله عشان خاطر سلمى عشان خاطر تحس بطعم الاسرة (بس ياترى هى مبقتش طايقه العيشه معاه ليه ) وتحاول تتصنع الابتسامه وتبص لسلمى : اخيرا فكيتى التكشيرة لو اعرف ان فيروز هتعمل كدا كنت جبتهالك من زمان
فيروز : ازى حضرتك ياطانت
زينات : ازيك ياروح طانت عامله ايه وماما وبابا عاملين ايه مش ناويين يجوا
فيروز : قولى يارب كل سنه بيقولوا هينزلوا لكن انا فقدت الامل
زينات : يجوا بالسلامة ان شاء الله
وتروح على المطبخ تعمل حاجة لفيروز
فيروز: بقولك ايه انا همشى دلوقتى هكلمك باليل ولا اقولك هعدى عليكى نخرج شويه اوك
سلمى : سبيها على الله
تخرج فيروز وهى حزينه على صحبتها وتيجى زينات
زينات : الله مش كنتى خلتيها تستنى تشرب حاجة
سلمى : هى ضيفه يعنى عشان تشرب حاجة البيت بيتها وتسيبها وتدخل الاوضه
زينات تنادى على سلمى بصوت حنون : سلمى مالك حبيبتى انت ليه دايما منطوية بعيده عنى حتى مش مديانى فرصه اقرب منك اتكلم معاكى ليه حاطة 100 حاجز بينى وبينك دايما كلامك قاسى معايا انا مستحمله تفتكرى ليه ..... سلمى انا بحبك انا مليش فى الدنيا غيرك والله ماهتلاقى حد يحبك قدى دا قلبى شافك قبل عنيا والدم اللى بيجرى فى عروقك من دمى انت اغلى حاجة عندى بكرة تجربى غلاوة الضنا وساعتها هتعرفى انك كنتى قاسية عليا قوى سلمى انا مستحمله العيشه فى البيت دا عشان خاطرك انت فعلا مبقتش طايقه خلاص
سلمى قلبها يوجعها من كلام مامتها لكن ترد عليها : ليه مبقتيش طايقه تعيشى معاه هو عملك ايه انت عمرك ماقربتى منه من يوم ماوعيت على الدنيا دى وانا شايفه قسوتك معاه عمرك معرفتى هو بيشكى من ايه انت اللى قاسيه عليه دايما تتخانقى معاه حتى مش راضيه تخلفى منه ودايما هاجراه وكل واحد منكم فى اوضه
ليه دايما بتتخانقى معاه جاوبينى ليه دعيتى عليه امبارح ليه
زينات يمتلكها الغضب : اسكتى بقى حرام عليكى انت ايه انت جبتى القسوة دى منين انت بتدافعى عنه كدا ليه هو بيمثلك ايه انت تعرفى عنه ايه كفايه بقى كفاية انت دايما بتحبيه اكتر منى بس لازم تفهمى انه عمره ماحبك لانه ..... وتسكت بس تعرفى انا اللى استاهل انا اللى وصلتك لكدا بس اقولك ايه ..........وتسيبها وتروح على المطبخ ( ياترى مخبيه ايه جواها )
سلمى تدخل اوضتها تقفل الباب وراها وتفضل تأنب نفسيها ايه اللى انت هببتيه دا ازاى تكلمى مامتك بالاسلوب دا انت ليه دايما كدا
هى عملتلك ايه كل اللى بتحتاجيه بتجبهولك بتحبك بتخاف عليكى وترد على نفسيها لا ماانا مش فاهمه هى بتعمل معاه كدا ليه اللى يشوفهاوهى بتتكلم معايا عليه وازاى هو طيب وحنين وقلبه ابيض وبيحبنا وبيسهر الليالى عشان يجبلنا اللى نتمناه ميشوفهاش بعد كدا
عيب ياسملى اللى انت عملتيه روحى صالحى مامتك افرض جرلها حاجة وهى غاضبانه منك
وتروح سلمى عشان تصالح زينات

*************************************************************

فى الوقت دا يروح ياسر يركن عربيته ويطلع بالراحه ويفتح الباب بالراحه ويدخل ويرزع الباب وراه
تتخط منه وتنفخ بزهق : انت شرفت
يدخل ياسر المطبخ وبإبتسامه : منمونتى ......... ويحط ايده على وسطها ويبوسها : حبيبى عامل ايه النهاردة هى معتبراه مش موجود وتقطع فى الخطار
ياسر : امووت انا فيكى ....... الاكل من ايدك ليه طعم تانى ويمسك اديها وعايز يحطنها ترمى منه السكينه بعصبيه
منه : مالك ياياسر
ياسر : وحشانى
منه : ماتشوفش وحش ياحبيبى
ياسر : الله ...... حبيبى تصدقى انها وحشتنى الكلمه دى بتطلع منه سكر ويديها بوسه على الهوا ولسه هيخرج بره المطبخ يرجع تانى
ياسر : اه نسيت اقولك ......... ويقرب منها وبصوت واطى يوشوها محمد اتصل عليا النهاردة
منه تتلخبط والسكينه تقع منها تنزل تجيبها وهى باصه لياسر وبخوف : قالك ايه
ياسر : مالك يانور عينى اتخطيتى ليه هو بيقوووول انه عايز يطمن عليكى اصل صوتك وحشه على اساس انه مش كلمك اول امبارح بس تعرفى انا حاسس ان فيه حاجة ويمسك شعرها جامد ويقرب وشه منها : عارفة لو عرفت انك كلميته من ورايا هعمل ايه
منه تبصله ومش قادره تتكلم ودموعها تنزل وتحاول تتصنع الابتسامه : انا عمرى مااعمل حاجة من وراك
ياسر : انا بفكرك بس ويسيب شعرها وبصوت واطى : لالالا حبيبى مايعيطش امسحى دموعك وحضرليلى الاكل
يطلع فى الصاله تطلع وراه
منه : طب ممكن اكلمه اسمع صوته هو ويارا
ياسر : اتفضلى ويرملها التليفون على الكنبه
تروح تجيبه وتبصله وتهز راسها
وبالفعل تتصل على محمد
((( ياترى ايه اللى حصل ......... دا اللى هنعرفه الحلقه اللى جايه )))

السبت، 21 أغسطس، 2010

الحلقه الاولى


الحلقه الاولى

تبدأ الاحداث فى الاسكندرية بأمواج البحر وجمال مياهه ثم بشقه فى الدور الرابع بالمنتزه ودى شقه اسلام مهندس 25 سنه ((له اختين يارا فى 3 ثانوى ومنه 4تربية انجليزى ودى متجوزة وعايشه فى دبى والده ووالدته متوفيين ))



يصحى محمد مستمتع بالجو الجميل يخرج البلاكونة يشم هوا ويرن جرس التليفون

.يدخل محمد ويرفع السماعه
محمد : الو
منه بإنهيار : الحقنى يامحمد
محمد يتخض على اخته وبلهفه : مالك يامنه فيه ايه
منه : خلاص يامحمد انا لازم اطلق
محمد مندهش جدا : تطلقى ليه ايه اللى حصل
منه : مصايب يامحمد انا صبرت كتير انا لو فضلت هنا هموت والله هموت انا لازم انزل يامحمد لازم تشوف صرفه انا اللى جنيت على نفسى يارتنى سمعت كلامك وتعيط بحرقه والخط يقطع
محمد : منه الو الو ................ محمد هيتجنن على اخته
منه ماسكه السماعه بعصبية : الو ......الو محمد الوووو وتعيط اكتر تقعد على الارض وترمى السماعه جنبها وتسند راسها على حرف الكرسى وتفتكر ذكرياتها مع حبيب القلب

( تفتكر اول يوم اتقابلوا فى القاهرة كانت لسه فى 3تربيه كانت واقفة مستنية الميترو مع صحبتها روضه .... وكان واقف جنبها كل شوية يبصلها اعجب بيها جدا جمالها سحره ..... وبدون تفكير حاول يكلمها لكن هى صدته وجه الميترو ركبت وركب وراها ولما نزلت نزل)

روضه : الحقى دا نزل ورانا ..شكله واقع ههههه

منه : طب خليه كدا يتكلم وانا اقطعله لسانه دا

روضه : ياجامد .....ماشى يلا سلام اشوفك بكره بس متتأخريش مش عايزين الدكتور يقفل فى وشنا الباب زى المرة اللى فاتت

( ووتمشى روضه وتعدى الشارع .........ياسر اول ما يلاقي منه ماشية لوحدها ييجى جنبها)
ياسر: بجد انا مستخسر اسيبك .....انت اجمل واحده انا شوفتها

( ساعتها هى وقفت وبصتله )
وبإسلوب حاد : فيه ايه حضرتك رايح جاى ورايا مينفعش كدا الناس تقول ايه
ياسر : والله انا مش بعاكس انا غيرت طريقى عشانك بجد انا مش عارف اول ماشوفتك شدتينى جدا حاسس انى اعرفك من زمان مش بكذب عليكى والله وبجد اتمنى انى اتعرف عليكى اكتر
((منه تتبسط اوى وقلبها يزغرد لكن تبصله من فوق لتحت وتسيبه وتمشى ومتردش عليه ومن وقتها وهى دخلت دماغه
وفضل ماشى وراها لغاية ماعرف بيتها وفعلا راح واتقدملها

((ياسر محاسب وشغال فى البحرين ))

سعاد والدت منه شايفه ان دى فرصه ومنه مش عارفه تاخد قرار ومحمد مش مرتاح وحاول يقولها وهى مسمعتش ....للاسف كان عندها فراغ عاطفى كبير ومصدقت لقت حد هيملاه ومحمد لما شاف كدا محبش يطفى فرحه اخته

ومحبش يذود الخوف جواه ...وقال ان دا رد فعل طبيعى ان واحد غريب يدخل ياخد احته وحبيبة قلبه واتخطبت منه لياسر وكان اول واحد فى حياتها ....حبته لدرجه متتخيلش ....واتجوزت منه وكان احلى شهرعسل قضته معاه وبعد فترة سعاد اتوفت وسافر ياسر ووعدها انه هيبعتلها بسرعه وفعلا سافرت منه لكن سافرت للموت برجليها ....!!!!

*******************************************************
ويرن موبايل فيروز وتمد اديها تطفيه وبعد شوية تقوم بكسل تاخد شاور وتشغل موسيقى هادية وتعمل النيسكافيه وتروح تلبس هدومها وتنزل تاخد عربيتها وكالمعتاد تشترى الجرايد من عم سيد وتروح على شغلها
(( فيروز بنت جميلة ورقيقه اى حد بيتعامل معاها بيحبها باباها غنى جدا مسافر هو ومامتها الكويت من زمان وهى عايشة وحيدة من يوم موت جدتها ملهاش حد غير صحبتها سلمى من ايام الجامعه ))

توصل فيروز الشغل تسلم عليهم وتبص متلاقيش سلمى
وتكلم نفسيها : ياترى ياسلمى مجتيش النهاردة ليه اكيد فيكى حاجة كان باين على صوتك امبارح ربنا يستر
وهى فى عز شرودها تدخل عليها سماح
سماح : ياصباح الفل .....وفيروز سرحانه وتعلى صوتها : ياصباح السرحان
تنتبه فيروز لسماح وتبتسم : صباح الياسمين
سماح : اللى واخد عقل تتهنى بيه
فيروز : يابت مش هتبطلى .....كنت بفكر فى سلمى عشان مجتش وقلقانه عليها
سماح : خير ان شاء الله اكيد راحت عليها نومه ولا حاجة المهم انت روحى للاستاذ حسن لانه عايزك
فيروز : خير على الصبح كدا طيب هروح انا واتصلى على انت على سلمى
وتقوم فيروز عشان تروح للمدير

توصل فيروز لمكتب المدير عشان تشوفوا عايز ايه

********************************************************

وفى الوقت دا محمد هيتجنن يمسك تليفونه ويتصل على منه يلاقى موبايلها مقفول يتصل على البيت يلاقيه مشغول يفكر يتصل على ياسر جوزها بس خاف يعملها مشاكل لكن قلبه مستحملش عايز يطمن على اخته ومسك السماعه واتصل على ياسر
ياسر يبص للتليفون وبزهق : عايز ايه انت كمان ......ويرد ... حبيبى
محمد : الو ازيك ياياسر واحشنى والله اخبار ايه
ياسر : وانت اكتر انا تمام الحمد لله
محمد : منمونة عامله ايه بتصل على موبايلها مقفول قلقت عليها .... واحشنى صوتها قوى هى جنبك اكلمها
ياسر : لا انا فى الشغل
محمد : طيب اكلمها على البيت
ياسر : لا متتصلش عليه هو بايظ بص انا اول مااروح هخليتها تكلمك اسيبك انا دلوقتى عشان عندى شغل كتير سلام
محمد :يقفل الخط ويهز راسه وبصوت واطى سلام

محمد قلبه مش مطمن لكن يستنى يشوف هل هيكون صادق ويخليها تتصل ولا لا

***********************************************************

تخرج فيروز من عند المدير ومعاها سراج دا زميلهم الجديد الاستاذ حسن كان عايز فيروز تدربه لانها اكفأ واحده وهو مش بيثق فى حد غيرها لانها بتحب شغلها ومخلصه فيه

فيروز : ان شاء الله هتتبسط من الشغل معانا كلنا اخوان وايد واحده بس اهم حاجة االانضباط والتركيز
سراج : ان شاء الله اكون عند حسن ظنكم
فيروز : خلينا نروح على المكتب وناخد اول درس بس الحساب يجمع اخر الشهر ويضحكوا

ينتهى اليوم والكل يروح لكن فيروز تروح بيت سلمى (ياترى هى كمان مالها )

ودا اللى هنعرفه الحلقه الجاية