الثلاثاء، 23 نوفمبر، 2010

ضحايا الحب (ح13)


عرفنا الحلقه اللى فاتت ياسر فضل يفتكر ذكرياته مع ديدى وازاى هى دمرت قلبه وحياته وعرفنا ان سها اخدت ياسر وخرجت عشان يغيروا جو
فيروز راحت الجريدة عشانن تسلم الظرف لعرو لكن للاسف مطلعش حبيبها وطلع اسمه باسم لكن شبهه تماما فى كل حاجة
منه برا بتشترى حاجات واشترت كارت عشان تكلم محمد
ياسر شاف منه وهى بتكلم فى التليفون واتضايق جدا وروح البيت استانها لما ترجع
دكتور يوسف طمن سلمى على حالة مامتها لكنها محتاجة شوية رعايه
منه روحت البيت ..........تعالوا نشوف ايييييه اللى حصل


منة توصل البيت تطلع مفاتيحها وتحط الكياس على الارض وتفتح الباب تاخد الحاجات وتدخل وتقفل الباب برجلها ولسه بتتدور تتفاجىء بياسر قاعد على الكرسى وحاطط رجل على رجل وعمال يلعب فى صوابعه .......
منه تاخد نفس كبير وبتوتر :.ياسر !!!!
ياسر يبصلها : حمد لله على السلامة ياهانم
منه تحس ان فيه مصيبه مستنياها .....وبصوت مرعوب : الله يسلمك حبيبى
ياسر : حبيبك ويضحك قوى ...ممكن اعرف البرنسيس كانت فين
منه : كنت بشترى طلبات للبيت زى ماانت عارف
ياسر : عارف ايه بقى .....دا انت خلتينى طرطور
منه : ايه اللى حصل
ياسر : امممممم ويقوم من على الكرسى ويقرب منها ......اللى حصل انى مغفل .....اللى حصل انك بتستغفلينى بتضحكى عليا .......لالا ياهانم فوقى مش ياسر ......ممكن تقوليلى .رحتى فين بعد مااشتريتى حاجاتك
منه تاخد نفس بصعوبة وتبصله بخوف : هكون رحت فين ......ماانت عارف كل حته بروحها
ساعتها يمسك شعرها جامد وبعصبيه شديدة : انت هتستعبطى .....فاكرانى نايم على ودانى .......ولما اشوفك بعينى وانت ماسكة التليفون وهارية نفسك عياط وبتتكلمى دا اسمه ايييييييه وبتتكلمى مع مييييييين ......انطقى
منه بكل جراءه ولاول مرة : بكلم محمد ..واعتقد انه مش عيب انى اكلمه دا اخويا ومش من حقك تمنعنى.....حرام عليك بقى
وبعدين فوق من الوهم اللى انت عايش فيه ....عايش فى دور الملك والكل عبيدك .....لكن للاسف لو بصيت هتلاقى نفسك اقل من كدا بكتيييييير بص لنفسك فى المراية وانت تعرف قدرك ......انا استحملتك كتير كرهتك عارف يعنى ايه كرهتك ......كرهت سجنك وتسلطك .....بجد مبقتش طايقه العيشة اكتر من كدا
ساعتها يتنرفز ياسر جامد ويضربها بالقلم ويفضل يضرب فيها وهى تصرخ ومش على لسانها غير منك لله وفى عز ماهو بيضربها يفتكر صورة ديدى ساعتها يحس ان اديه اتشلت ويقعد على ركبه ويحط راسه على رجل منه ويفضل يبكى بحرقه ومنهار ساعتها تتفاجأ منه من حاله ياسر اول مرة تشوفوا ضعيف قلبها يرق لمنظره نفسها تمسح بإيدها على راسه وفى نفس الوقت نفسها تشيل حاجة وتخبطه بيها عشان ترتاح من العيشه معاه......
فى الوقت دا كان جارهم واقف بره سامع صوت الصريخ والضرب وفضل واقف وعايز يعرف فيه ايه ويسأل جارته التانية تقولوا : مالناش دعوة هما على الحال دا من ساعه ماجم جبروت بقى الله يعينها بجد صعبانه عليا حابسها لا بتشوف حد ولا حد بيشوفها موريها المر حبيبه قلبى وياعينى عروسة مكملتش حاجة حسبى الله ونعم الوكيل
ساعتها يرد جارها : طيب ...... ومحدش عارف يعملها حاجة ترد عليه جارتها واحنا مالنا وتدخل وتقفل الباب
ويفضل جارها واقف وصعبان عليه الحال لكن ماباليد حيله !!!!!!!!
منه تفضل مندهشه من حاله ياسر سامعاه عمال يقول كلام مش مفهوم تحاول تفهم منه ترفع راسه وتمسح دموعه
ساعتها يمسك اديها ويبوسها ويقولها سامحينى ياديدى ...انت اللى وصلتينى انى اعمل معاكى كدا ....انا مقدرش اعيش من غيرك ......منه تحس ان قلبها فيه نار وتبصله بقرف وتهمس ديدى .....وتشيل راسه من على رجليها وتفضل تبعد عنه وعماله تبصله بإستغراب وكأنها مع حد تانى خالص .......مين دا !!!!!!
*********************************************************
محمد ونانسى بره الشركة بيتمشوا ........ محمد ساكت خالص مبيتكلمش ونانسى عماله تبصله ومتضايقه عشانه تحاول تفتح معاه اى حوار عشان تعرف ايه اللى قلبه كدا مرة واحده لكن ميتكلمش ويعتذر لها وياخد بعضه ويروح


يارا قاعده مع بنت خالتها فى الاوضه وفاتحه كتابها وسرحانه خالص عماله تفكر فى كريم وكلامه وميسون واخده بالها وتسألها عن سبب سرحانه وانها مبقتش يارا بتاعه زمان فى الاول يارا تنكر لكن بعد محاولات تحكى لها ....((ميسون دى مش بنت خالتها بس لكن اقرب صحبه ليارا بتحبها وبتخاف عليها .هى فى 3جامعه )).....ميسون مش عاجبها الوضع وتقولها ان لسه العمر قدامها ومتنجرفش ورا اى حد يقولها بحبك لان فيه كتير من الشباب اللى بيحبوا يلعبوا بقلوب البنات ..... لكن فى نفس الوقت خايفه من جواها يكون فعلا بيحبها وساعتها تجرحه ......تقعد تفكر ازاى تتأكد عشان تريح يارا من التفكير ويجيلها فكرة لكن مترضاش تقولها عليها غير لما ترتبها فى دماغها....... تقوم ميسون عشان تروح درس المحاسبة وتوصى يارا على مذاكرتها .......
***************************************
فى الوقت دا كريم يتصل على يارا مرة واتنين وترد يارا ويكون كلامها واقف معاه وكريم عمال يحكيلها ازاى خطفت قلبه وازاى اتجرح زمان لانه حب حد ميستاهلش وقفل قلبه من الثانوى لكن لماشافها انقلب كيانه وبدأ قلبه يدق من جديد ......يأكدلها انه فعلا مش عارف ايه اللى حصله من ساعه ماسمع صوتها مبقاش مركز فى اى حاجة ......يارا عماله تسمع .....وتبدأ تتكلم معاه .....تشرحله انها قافله قلبها لانهاا فعلا بتخاف من الحب....خايفه من الفراق .....خايفه انها متخترش االانسان المناسب اللى ميحافظش على قلبها .......اتعلمت ان مش اى حد يقول كلمه حلوة يبقى صادق فيها .....يقاطعها كريم بصوت حنون طب وانا يايارا حسيتى معايا بإيه ....يارا ترتبك ومتعرفش ترد وتحاول تقفل معاه لكن هو ميرضاش ويفضل يحكى معاها ويأكدلها ان عمره ماهيجرح قلبها لانه حس بطعم وجع الفراق والغدر .......اكدلها انها هتكون ملكه عرش قلبه ....يارا بدأ قلبها يدق ناحيته اكتر وبدأت تحس بصدق كلامه وكدا يارا وقعت فى حب كريم !!!!!!!


فيروز تخلص شغلها وتروح لسلمى على المستشفى تلاقيهم بيحضروا الشنط تفرح جدا...... تروح تسلم على زينات وتحضنها جامد سعيده انها قامت بالسلامة زينات عيونها تدمع وتحاول تبتسم وتسرح بذهنها لبعييييييييد ايام ماكانت بنوتة الكل بيتمناها ......وتفتكر حالها دلوقتى الكل بيقتلها بنظراتهم ......سلمى تحس بيها تسيب الهدوم وتروح تقعد قدامها هى كمان مكسورة لكن بتحاول انها تبين انها قوية عشان خاطر امها .....سلمى تمسح على راس زينات وتبوس اديها بحراره وتبتسم .زينات تنزل دموعها وتاخد سلمى فى حضنها وتبكى ......فيروز قلبها يوجعها نفسها تخفف عنهم لكن مش عارفه ....هى عارفه انهم لو رجعوا الحارة هيتدمروا من كلام الناس ساعتها تقترح عليهم انهم يروحوا معاها البيت ويقعدوا معاها لغاية ما الامور تهدى ........زينات ترفض لكن فيروز تأكدها ان مفيش مشاكل من وجودهم بالعكس دا هيونسوا وحدتها .......وفضلت تقنع فيهم
لغاية ماوفقوا خلصوا لم حاجاتهم ودعهم الدكتور يوسف واخد عنوان فيروز عشان يتابع حالة زينات .....وصلت فيروز زينات على البيت ونزلت هى وسلمى عشان يروحوا بيتهم يلموا باقى مستلزماتهم .....فيروز عمالة تكلم سلمى وتحكيلها اللى حصل مع باسم وانها كانت فاكراه عمرو .....وسلمى ولا هى هنا سرحانه ودموعها نازله .....توقف فيروز العربية ساعتها تنهار سلمى وبصوت مخنوق ( مش قادره انساه يافيروز .مش قادره صورته قدامى كلامه معايا ..مواقفه الحلوة كلها ازاى يكون خاين ازاى يمشى فى السكك دى وفى الاخر اتقتل ياترى اللى قتله دا كان تبعه ولا تبع ديدى ........كلام امى عنه وكلام الظابط سابه جوايا شرخ كبير مش قادره المه كنت بحبه قوى بحترمه فجأه اتفاجىء انى كنت عايشة فى وهم كبيير ......بحس اننا بنحب عشان نكون ضحايا بصى حواليكى شوفى كام ضحية كام واحد دفع تمن حبه الم وعذاب ......
فيروز تبصلها بعيون كلها حنان : سلمى حبيبتى لازم تنسى ....لكن دا ميمنعش انك دايما تدعيله بالرحمه مهما كان ابوكى ......حاولى تغفرى تسامحى ......وصدقينى ى مسأله وقت ولازم تكونى اقوى من كدا سلمى اللى اعرفها جبل عمر مافيه حاجة تهزها ........يلا فين ابتسامه سلمى .........وتشغل العربية ويمشوا ............توصل البيت سلمى تدخل بسرعه مدخل العمارة هى مش حمل اى كلمة ولانظرة من حد يطلعوا يلموا مستلزماتهم فى شنطة كبيره وينزلوا بسرعه ويركبوا العربية ويمشوا
ستات الحارة واقفين مستغربين ؟!!وطبعا مبيسبوش حد فى حاله وتنادى ام رباب على ان فتحى
ام رباب: امال البت سلمى واخده هدومها وراحيه على فين
ام فتحى : والبنى ياختى علمى علمك .......من يوم مازينات راحت المستشفى واحنا مش عارفين عنهم حاجة
منه لله البعيد موت شبابها وجمالها ومات وسابلها فضيحه بيقولوا اتقتل مع ديدى الرقاصه ........
ام رباب : يالهوى ليكون باع البيت ........
ام فتحى : الخبر النهاردة بفلوس بكرة يبقى ببلاش
***************************************
فى الوقت دا بقى ايه اللى حصل

دا اللى هنعرفه الحلقه اللى جاااااااااااااية ^_^


الأحد، 14 نوفمبر، 2010

نجده وخيبة امل (ح12)


عرفنا الحلقه اللى فاتت ان فيروز راحت على شغلها بعد ماطلعت من الجوازات وفضلت متضايقه ان ازاى عمرو ماافتكرهاش وفجأه لقت ظرف جوه الورق ويخص شغله وفرحت انها هتشوفوا تانى وقررت انها تروح الجرنال وسراج تعب جدا بعد الشغل ومرضيش يجيب الدكتور ودخل نام على رغم تعبه وكريم وعادل مقضينها سهر وخروجات ومنفضين للدراسه واللى عايزينها :) وعرفنا قصه ياسر مع ديدى اللى اتقتلت مع يسرى ابو سلمى وان ازاى هو حب وضحى عشانها 7 سنين وفى االاخر سبته بعد ماوصلها لحلمها ازاى كانت بشعه ومبتفكرش غير فى الفلوس والشهرة ازاى داست على قلوب !!!!! ازاى كانت لعنه بانسبة لياسر !!!! افتكر اخر مرة لما راحلها واتحايل عليها ترجعله وهى كسرته بكل كبرياء ورفضت وضربها وهى طردته
تعالو نعرف ايه اللى حصل بعد كدا؟؟؟؟؟؟

ياسر قاعد على كرسيه وفضل يفتكر ويفتكر ذكرياته معاها حس قد ايه انه كان حقيير انه صدق كلامها ونظراتها كان لازم يعرف انها حية وميأمنش ليها وبعد ماعاد شريط الذكريات اتعدل فى قعدته مسح دموعه وكلم نفسه : بس مين يسرى دا ......وياترى ياديدى كان ايه غرضك منه ايه .......اصلك مبتعرفيش حد غير لما يكون ليكى مصلحه ...ومين له غرض فى قتلك ......وفى عز ماهو سرحان تدخل سها عليه ((فاكرينها دى الكتكوتة اللى كانت معاه لما منه دخلت عليه المكتب ))
..........دخلت سها وهو مش حاسس بيها خالص وتفضل تقرب منه وتنادى عليه وهو ولا هنا تقرب منه قوى تلاقي دموعه على خده تتخض وتنادى عليه وتقرب منه و تسمح دموعه ساعتها يحس بيها تساله بصوت حنون عن السبب يبصلها وميردش تفضل تمسح على شعره وتطبطب عليه عايزاه يتكلم ويفضفضلها ساعتها تنزل دموعه غصب عنه تانى
سها: قولى مالك وريحنى حبيبى مقدرش اشوفك كدا ......دموعك بتقطع فى قلبى .....تعالى نخرج من هنا ..تعالى نروح اى حته عشان خاطرى .....يلا
يقوم ياسر وياخد الجاكت على اديه ويطلع
السكرتيره مستغربه اول مرة تشوف ياسر كدا..... وبرضو مش عاجبها الوضع وتكلم نفسها : الله يكون فى عونك يامدام منه لو اعرف اوصلك كنت حكيتلك على كل حاجة بشوفها هنا .......وترجع تانى تقول ...وانا مالى ماتاكلى عيش وانت ساكته


فى الوقت دا منه بره بتشترى طلبات للبيت وتنتهز فرصه انها برة وتشترى كارت عشان تكلم محمد محمد مشغول جدا وعامل الموبايل صامت منه تتصل تانى وتالت ومحدش بيرد منه تحس ان الدنيا بتضيق بيها اكتر وتنزل دموعها وتحط السماعه وتشيل الكياس بتاعتها وتروح تكمل مشاويرها
***************************************
يخلص محمد شغله ويحس براحه كبيره انه خلص المشروع ........تدخل نانسى عليه تلاقيه مبتسم
نانسى : شكلك كدا خلصت المشروع
محمد : ياسلاااااااااام بجد مش مصدق نفسى دا كان كابوس ياساتر
نانسى : الحمد لله ...طيب انا جعانه مش نفسك تاكل
محمد : دا اانا واقع
نانسى : طب يلا بينا
محمد : هروح بس اسلم الورق عشان ميطلعش عليا زرابينه ونخرج على طول
نانسى : اوك اكون انا كمان لميت حاجاتى
يروح محمد لمكتب المدير ويسلمه المشروع ويفضل يرغى معاه


فى الوقت دا منه تخلص طلباتها وقبل ماترجع البيت تدور على اقرب كبينه عشان تتصل تانى وبرضو مبيردش يخرج محمد من عند المدير ويطلع موبايله من جيبه يبص يلاقى 7 مرات من رقم دولى قلبه يدق جامد اكيد دى منه استر يارب منه نرفع السماعه تانى وتتصل وتكلم نفسيها : ياااارب ترد يامحمد لازم اكلمك
ويررررن موبايل محمد : يرد بلهفه : الوووو
منه تضحك وتعيط : محمد وحشتنى بحمد ربنا انك رديت انا كنت هتجنن لو مردتش
محمد : معلش والله كنت مشغول وعامل الموبايل صامت المهم طمنينى عليكى دا انا اللى هتجنن من اخر مرة كلمتك بجد مش فاهم حاجة منه افتحيلى قلبك
ساعتها تنهار منه وتتكلم بحرقه : محمد بجد انا مبقتش مستحمله انا محتجالك انا لازم انزل مصر يامحمد ياسر اللى اتجوزته غير ياسر اللى انا عايشه معاه دلوقتى حاسه انى مع بنى ادم تانى حد انا مش فاهماه اتحول لوحش بيرهبنى مخوفنى من ساعه ماجيت هنا وانا مشوفتش غير اهانه وضرب وسكر وعلاقات غرامية حابسنى ومش عايزنى انزل اكمل تعليمى بيعاملنى وكأنى جاريه وعبده لاوامره وطلباته وشهواته مبتفرقش معاه مشاعرى اوقات بلاقيه حنين واوقات بلاقيه حيوان حساه مريض محمد اناااا محتجالك اووووى وتعيط جامد
وتفضل تحكيلة عن الايام اللى قضيتها والخنافات والاهانات وان ازاى هى عماله تسايس فيه وتكلمه بحب ورقه وحنان عشان يرضى ينزلها بس خلاص هى زهقت من كتر التفكير وتفضل تحكى وتحكى
محمد عمال بيسمع وخلاص يحس انه مخنوف ومش قادر ياخد نفسه قلبه بيتقطع على اخته هيتجنن مش قادر يعملها حاجة ومش قادر يلومها لانها هى اللى اختارت من البدايه بس خلاص الكلام فى اللى فات نقصان عقل محمد يقطع كلامها لانه مش قادر يسمع اكتر من كدا : منه حبيبتى لازم تصبرى خليكى فى تمثليتك لغاية ماتنزلى.. سايسى امورك
منه : نفسها تخبط راسها فى الحيطة : انا اللى استاهل ياريتك ضربتنى ومنعتنى ياريتنى سمعت كلامك



محمد يقاطعها تانى : منه متفكريش فى اللى فات حرام عليكى نفسك الندم مبيرجعش اللى ضاع مننا فكرى فى اللى جاى ومتخافيش خلى ايمانك بربنا كبير صدقينى ربنا هيفرجها عليكى ويحاول يغير الموضوع .....اه صحيح يارا بتسلم عليكى كتيييير
منه : ابقى سلملى عليها اوووى وحشنى لمتكم وحشنى كل حاجة حلوة
ياسر طالع من الكافيه هو وسها....ولسه بيركب العربية يلمح منه من بعيد ماسكة التليفون وعماله تتكلم وتمسح دموعها يخبط العربية برجله والدم يغلى فى نفوخه ويركب العربية بنرفزة ويطلع بالعربية بسرعه ......!!!!!

منه : خلاص هتقفل يامحمد .....حاضر هطمنك عليا بس مش اوعدك دايما لان انا فين وفين لما بخرج ياسر لو عرف انى كلمتك هيقطعنى يلااااا ربنا يستر لا اله الا الله
محمد : محمد رسول الله
تقفل منه وتطلع الكارت تقطعه وترمية فى السلة وتاخد كياسها وتوقف تاكس عشان تروح

**************************************

نانسى حاطة اديها على خدها وعماله تبص فى الساعه يدخل محمد عليها وهو وخنوق ومش مركز وعمال بيفكر فى ياسر نفسه يقتله
نانسى : ايه يابشمهندس دا كله انا جعانه
محمد ميردش عليها نانسى تستغرب اوى وتنادى تانى محمد يبصلها وميردش
نانسى : المدير قالك حاجة
محمد : لا
نانسى : امال مالك ماانا سايباك كويس
محمد : معلش يانانسى انا مضطر اروح تعبان شوية
نانسى : تقوم من مكانها وتروح لمكتب محمد وبقلق : مالك يامحمد مش هخليك تروح وانت فى حالتك بقالك اسبوع متغير وحساك شايل هم ومش راضية اسألك بس دلوقتى لازم اقولك مالك فيك ايه
محمد عيونة مدمعه يبصلها : انا عايز امشى من هنا يلا بينا
ويقوموا يطلعوا براا الشركة



فى الوقت دا فيروز وصلت للجرنال دخلت الرسيبشن وسألت على عمرو عبد الغنى لكن للاسف الموظفه قالتلها ان مفيش حد بالاسم دا .......تسأل على صاحب الظرف لكن الموظفه متعرفش بس تقولها روحى قسم التحقيقات اخر الطرقة يمين اكيدد هتلاقى اللى يفيدك هناك........تروح فيروز واول ماتدخل عنيها تقع عليه قاعد على المكتب واول ماعنيها تقع على اسمه تتسمر مكانها وتفضل مبلمة .......هو اول مايشوفها يقوم جرى ويبتسم بلهفه
باسم : بجد مش مصدق دا انا كنت هتجنن عليكى مش عارف اوصلك ولا اجيبك ازاى .......تفضل فيروز بصاله ومتردش للاسف مطلعش عمرو لكن الشبه كان كبير اوى رجعتلها خيبة الامل تانى كانت فاكره انها ممكن تشوفوه تانى بعد سنيييين
فيروز تحاول تتصنع الابتسامه : اسفه لو كنت فتحت الظرف بس كنت عايزة اعرف تبع مين
باسم : بتعتزرى على ايه دا انا اللى بشكرك من قلبى لامانتك الورق دا مهم جدا لو مكنش اتسلم النهاردة كان ممكن اخد استمارة 6 ......ثوانى هودى الورق واجى ويبصلها تانى : شوفتى نستينى اسألك تشربى ايه
فيروز : متشكرة جدا انا متأخرة ولازم امشى
باسم : لايمكن لازم تشربى ...لمون خلاص هطلبلك لمون
فيروز تبتسم وتهز راسها انها موافقه يطلع باسم وتحط فيروز اديها على خدها وتضحك من جواها قوى ((ياااااه على الدنيا يخلق من الشبة 100 بس سبحان الله اسلوبه وكلامه تصرفاته .....وتبص لاسمه تانى باسم رشدى وتكلم نفسها انا شوفت الاسم دا قبل كدا فييين .؟؟؟......وتغمض عيونها للحظات وتفتكر ان وراها شغل تقوم جرى بس الاول تاخد ورقه وتكتب عليها ((متأسفه جدا بس لازم امشى .....فرصه سعيده جدا )) وتحطها على المكتب وتنزل يلمحها باسم وهى خارجة من باب الجريدة ينزل وراها ويركب عربيته ويمشى ورا عربيتها !!!!!! توصل فيروز الشركة تدخل وتسلم على موظفين الرشيبشن
وتدخل على مكتبها ...يدخل باسم وراها ويروح لاحمد موظف الرسيبشن ويسأله
باسم : لو سمحت حضرتك .
هى الانسة اللى داخلت من شوية تبقى مين
احمد : اى خدمة يافندم
باسم : لا كنت بسأل اصلى بشبهه عليها
احمد : دى الانسة فيروز مديرة العلاقات العامة هنا ....
باسم يبتسم : متشكر جدا
ويطلع يركب عربيته ويروح تانى على شغله
***********************************
فيروز قلقانه ان سراج مجاش وتليفونه مقفول ((اصلها بتقلق جدا بتحس ان الموبايل مقفول معناها ان فيه كارثه ))
تدخل عليهم اسماء ((فاكرينها هى ورقيه اللى شمتوا فى سلمى لما بابا اتقتل ))
تقرب اسماء من فيروز : صباح الخير
فيروز تبصلها بطرف عينها : صباح النور .....خير يااسماء محتاجة حاجة
اسماء : لا
فيروز : امال قايمة من على مكتبك ليه
اسماء : عادى كنت بتمشى وقولت اصبح عليكى ....وتبص حواليها الله هى سلمى لسه منزلتش ....ألا صحيح عاملة ايه دلوقتى ....قلبى عندها وصليلها سلامى كتيير
فيروز تحط القلم على الورق بزهق وتبصلها : يوصل اى اوامر تانية حضرتك
اسماء : لا مرسييي سلام
سماح تبصلها : يابااااااااى على دى بت أتمة بشكل عارفه ساعات بدعى ان ربنا يوريهم يوم اسود عشان يعرفوا ان الله حق
فيروز : حرام عليكى متدعيش على حد ربك بيمهل ولا يهمل وكل واحد ليه يوم
وتنادى على عم محمد يجبلها واحد شاى بحليب
****************************************
فى الوقت دا زينات فى اوضتها فى المستشفى بتفطر هى وسلمى ......سلمى عماله تضحك فيها وتأكلها .....يدخل الدكتور يوسف بتطمن على صحتها ويقيسلها الضغط
دكتوريوسف يبتسم : عال عال دا احنا بقينا تمام خالص
زينات : يعنى ممكن اخرج .....انا زهقت من قعده المستشفى بجد نفسى ارجع بيتى
دكتور : طبعا لو حابه من دلوقتى .....بس هو انت زهقتنى مننا ولا ايه ويبص لسلمى : ماتقولى حاجة ياسلمى
سلمى : لا طبعا مين يقدر يقول كدا ....بجد حضرتك عملت الواجب وزياده
الدكتور : مامتك فى عنينا ......وبجد قعدتها جميلة جدا انا لما كنت اكون متضايق احب اجى اقعد معاها ونفضل نحكى .....ربنا يباركلك فيها
ويستأذن سلمى انه عايزها على جنب
دكتور يوسف : سلمى مامتك اتحسنت كتير عن الاول ......بس هى لسه محتاجة عنايه شديدة حاولى متخليهاش تتعرض لاى انفعال او اى ضغط عصبى ......اقولك حاولى تاخديها وتخرجوا تغيروا جو فى اى حته .....وياريت قبل ما هتروح البيت تشيلى اى حاجة ليها علاقة بوالدك وتحاولى تغيرى فى البيت ...طبعا مش هوصيكى البنات دايما ليهم لمسات ذهبية .........مامتك مرت بأزمة كبيرة جدا وانا بحمد ربنا انها قامت بالسلامة ارجوكى شليها فى عنيكى ياسلمى
سلمى عيونها تدمع وتبتسم وتهز راسها وتاخد بعضها وترجع على الاوضه
*********************************************
منة توصل البيت تفتح الباااب واول ماتدخل ........

مش هقولكم ههههه المرة اللى جاية هنعرف ايه اللى حصل


الأحد، 7 نوفمبر، 2010

لعنــة الــحــب (ح11)


عرفنا الحلقه اللى فاتت ان فيروز خرجت مع سراج وحكتله قصه حياتها وانها ازاى عمرها ماهتكون سلعه فى ايد ابوها ولاهتتجوز بالطريقه دى .......حكينا على ان ازاى ممكن جبروت اب يدمر قلب حب .......
سلمى قاعده جنب مامتها وبتصلى وتدعى ان ربنا يقومها بالسلامة
ان كريم استنى يارا قدام المدرسه ولما ماجتش اتصل يطمن عليها
وعرفنا ان فيروز راحت الجوازات عشان تعمل باسبور وشافت حد فكرها بعمرو حبيبها من ايام الجامعه وان هى زعلت قد ايه عشان مفتكررهاش ومشيت .....وعرفنا انه رجع يدور عليها ياترى ليييه !!

تعالو نكمل بس الاول ملحوظة صغنونة يمكن الحلقه تكون طويله شويتين بس هتلاقى جواها جواب للاسئله اللى سألتوهالى عن ياسر فاكرين
كنتوا بتقولوا هو حماااار ومعقد نفسيا هتعروفا بقى ليه .......
اتمنى لكم قراءه ممتعه

************************************************
فيروز تطلع من الجوازات وتاخد عربيتها وتوصل قدام باب العمارة تحس بزهق فتشغل عربيتها وترجع تانى على الشغل لانها عارفه لو طلعت مش هتكمل شغلها وهتفطل سرحانه وبتفكر ........توصل فيروز الشركه تدخل المكتب وتحاول تتصنع الابتسامه : ها ايه الاخبار رجعت تانى عشان خاطركم اهو وتقعد على كرسيها ......سراج عمال يبصلها وحاسس ان فيه حاجة لكن ميتكلمش .....فيروز قاعده حاطة وشها فى الورق وتخلص بدون ماتنطق اى كلمة على غير العاده ....وقتها يبصلها سراج ويسألها ايه السبب ؟؟؟ فيروز سرحانه ولا هى هنا وعماله تفكر فى عمرو وتفكر ان ازاى مفتكرهاش بعد حب 4 سنين ....وينادى عليها تانى ساعتها تنتبه وتبصله ......ويسألها تانى عن سبب سكوتها وهل فيه حاجة مضايقاها وهى تبص لسراج بعيون حزينه ترد بالنفى وان مفيش حاجة وتتنهد واول ماعنيها تيجى فى عين سراج تبص فى ورقها وتكمل شغلها خافت عيونها تفضحها سراج يهز راسه ويسكت
بدأت فيروز تخلص شغلها ورقه ورا ورقه وفجأااااه تلاقى ظرف غريب وسط الورق تمسكه بإستغراب وتقلبه بين اديها مكتوب على ظهره خاص بجريده الوطن ......تسأل سراج يقولها لا تستغرب اكتر وياخدها الفضول وتفتحه تلاقى جواه ورق مهم ومستندات تكلم نفسيها
فيروز : يكون تبع مين ويضرب فى دماغها على طول لما خبطت فى عمرو والورق وقع وهو لمهولها ......معقول يكون تبعك ....والله وبقيت صحفى قد الدنيا ....بس ازاى جه معايا .يكون قاصد يحطه مع الورق بس ليه ؟؟ وهيستفاد ايه ...ولا تكون صدفه علشان اشوفوا تانى يااااااه فعلا رب صدفه خير من الف ميعاد ...طب هعمل ايه ؟؟؟
وفضلت تفكر وبرضو سراج مراقبها ومراقب ملامحها حبه تبتسم وحبه تكشر وحبه تستغرب وبرضو مش فاهم حاجة لكن هى اخدت القرار انها تروح للجريده وتسأل عليه .......بدأت تخلص شغلها فى نشاط وتضحك زى الاول وقلبها هيطير من الفرح والامل رجعلوا تانى وبعد فترة طوييله ومجهود خلصوا الشغل ويبدأوا يقفلوا الملفات علشان يمشوا فيروز تحييهم على الانجاز ويروح الجميع
فيروز تاخد بعضها وتروح تطمن على سلمى ....
*****************************************************
سراج يروح البيت مرهق وتعبان جدا اول مايدخل يحس ان الدنيا بتلف بيه ويحاول يتسند لغايه مايرمى نفسه على الكرسى حاسس انه مخنوق ......مراد يحس بيه يقوم يشوفه يجرى عليه بلهفه وعايز يجيب دكتور لكن سراج ميرضاش ويخلى مراد يعملوا لمون يسأل على كريم وعادل مراد يقولوا انهم بيذاكروا مع واحد صحابهم لكن سراج مش عاجبوا حالهم ولا طريقتهم لكن يهز راسه ويروح ينام
****************************************************
كريم وعادل وكمان اتنين من اصحابهم قاعدين فى العربيه ومهيسين على الاخر ضحك وشرب وكريم سايق العربيه على اقصى سرعه ((هى دى المذاكره ولا بلاش !!))

*********************************************************

فى الوقت دا ياسر قاعد على مكتبه فاتح اللاب بتاعه ومندمج اوى وعمال يقلب فى الصفحات على النت ومن ضمن الصفحات كانت صفحة الحوادث فى جريده اليوم لفت انتباهه كام خبر واول ماعينه تقع على خبر <<مقتل الراقصه ديدى مع عشيقها فى ظروف غامضه >> ياخد نفس كبير ويبرق وبتوتر يدوس على الخبر ويقراه (( وردت انباء الى مباحث امن الجيزة من مصدر مجهول عن وجود جريمة قتل بشارع 21 بفيصل وعند التوجه الى مكان الحادث وجدوا ان المجنى عليها هى الراقصه ديدى صاحبه كازينو ليلتى مع عشيقها يسرى ممدوح نجم والى الان لم نعلم من هو الجانى وماازالت التحريات مستمرة )) ....((فاكرين يسرى دا ابو سلمى )).....ياسر عمال بيقرأ ومش مصدق يفك الكرافت ويفتح اول زرارين من القميص وضربات قلبه بتزيد ويحس ان نفسه بيضيق ويدخل على جوجل ويكتب مصرع الراقصه ديدى ويفضل يقرأ ويقرأ ويسند على المكتب ويغمض عينه وتنزل دموعه ويرن الجرس للسكرتيره ويبلغها انها تلغى كل المواعيد النهارده لانه مرهق جدا .........يمسك موبايله بلهفه ويتصل على منصور صحبه فى القاهرة ويسأله وفعلا يأكد له الخبر .....ويقفل معاه ويرمى نفسه على الكرسى ويرجع بظهره لورا ويغمض عينه ويدور ذكرياته معاها .......ويفتكر اول يوم شافها واتعرف عليها
**********************************************************
كان قاعد هو ومنصور فى الكفاتيريا وعدت من جنبه ديدى لفت انتباهه ضحكتها بص وراها مقدرش يمسك نفسه من جمالها
ياسر يخبط على راسه : يابووووووى ايه دا يلا هو فيه كدا
منصور : ايه ياكوتش امسك نفسك
ياسر : مين دى
منصور : دى برنسيس الجامعه كلها
ويفضل باصص لها ومش قادر يشيل عينه من عليها تبصله وهى عماله تلعب فى شعرها وتضحكله وتبص لضحبتها ويتكلموا
ياسر يقعد على الكرسى : يالاهوى ويغمض عينه
منصور يقوم ويهوى عليه : فوق يابنى يخرب بيت عقلك الحقونا ياناس الواد راح فى شربه مية
******************************************************
ويفتكر يوم مااتعرف عليها فى الرحله اللى كانت عملاها الجامعه لALEX قضوا يوم من احلى الايام عمره مانسى اليوم دا
افتكر يوم الفلانتين يوم ماصرح لها بحبه وهى كمان عبرت عن اعجابها بيه


افتكر يوم مااخدها وقال انه محضرلها مفاجأه وكانت انه هيعرفها على ممدوح المنتج لان صوتها حلو اوى وقتها طبعت على خده بوسه عمره مانسى احساسه بيها .....فضل يفتكر ويفتكر قد ايه كان مبسوط بنجاحها بعد اول اغنية حس ان الدنيا مش سايعاه افتكر يوم مااحتفل معاها باليوم دا
لكن كان اليوم دا من اسوأ الايام فى حياته ........يوم ماعرض عليها الجواز وقتها ارتبكت وبصتله ورمتله اكبر خنجر فى قلبه
ديدى :ياسر مش عارفه اقولك ايه احنا نحب بعض اه لكن نتجوز لااا كل واحد منا عنده احلام وطموحات عمرنا ماهنوصلها لو ارتبطنا ببعض
ياسر يمسك اديها : ليه بتقولى كدا ماانت وصلتى وانا معاكى يعنى اديا على ايدك هنوصل لكل اللى بنتمناه انا عمرى مااتصوررت حياتى من غيرك ....ومعنى كلامك دا اننا هنبعد عن بعض
ديدى : ونبعد ليه
ويفضل يدور بينهم حوار طويل بس يظهر ان ديدى كانت واخده انها لازم تتجوز ممدوح المنتج لانه الوحيد اللى هيوصلها للشهرة لكن ياسر كان مجرد حلقه وصل ......كارت بيتفتح بيه باب
سابت ديدى ياسرواتجوزت ممدوح ....فى اليوم دا انهااااار فيه ولولا وجود منصور جنبه كان راح وقتها قتلها وقتله فضل يصرخ ويبكى بحرقه ومنصور بيهدى فيه ومن يومها وهو كره الحب قرر انه لازم ينتقم !!!!!!!!!!!
وفضل شريط ذكرياته مع كل البنات اللى خلاهم يقعوا فى حبه وفى الاخر يدوس على قلوبهم ويسيبهم زى ماديدى سابته كان بيتلذذ بدموعهم عليه !!!!!!!
الا منه الوحيدة اللى اتجوزها بس ياترى ليه .!!!!!!!! للاسف لانها كانت شبه ديدى عشان كدا اتجوزها نفسه المريضه سولت ليه وافتكرت انه كل مايهينها ويذلها ويضربها هيشفى غليله ويخفف عذابه طول السنين!!!!!
***************************************************


وبعد ما ممدوح وصلها للمجد وبقت مشهورة جدا وزادت علاقاتها سابته واتجوزت خالد شكرى ودا صاحب كازينو ليلتى واللى طول عمرها بتحلم انه يكون من بتاعها وبالفعل كتبهلها خالد الكازينو بإسمها قبل ماتتجوزا وكدا تكون وصلت لكل اللى بتتمناه مال وشهرة وكازينو
افتكر اخر يوم راحلها الكازينو بعد ماعرف انها اتجوزت خالد قضى اليوم هناك شرب ومش قادر يمسك نفسه وهو شايفها عماله ترقص وتغنى وبعد ماخلصت قام فجأة وراح لاوضتها ودخل بالعافيه
اتفاجئت ديدى بوجوده وبكل كبرياء
ديدى : ايه اللى جابك ياياسر
ياسر : جاى اشوف الفنانة العظيمة اللى داست على قلبى عشان توصل للمجد ...بس لو فكرت للحظة هتلاقى انى انا السبب فى كل اللى هى فيه
ديدى تتمشى شوية : تؤتؤتؤ ...مضربتكش على ايدك عشان تحبنى .وتموت نفسك بعدى ......
.انا منكرش دورك معايا ومنكرش انى اعجبت بيك .....اتشدتلك لكن حبيتك لااااااا اكون عبيطة ياابنى الحب فى الزمن دا مايأكلش عيش عايز توصل للمجد دوس على قلبك وطييير .......ممدوح وخالد عاملين زى الباسبور اللى متعرفش تطير من غيرهم .....لكن انت بالنسبالى بطاقه معرفش امشى من غيرها لكن معرفش اطير بيها وبرضو مينفعش اعمل باسبور من غيرها ....انساااااانى بقى وخلينى اعيش وانت كمان عيييش
ياسر خلاص الدموع هتنزل ومش قادر يقرب من ديدى : فكرى تانى انا بجد مش قادر استغنى عنك مش قادر اعيش من غيرك انا هموت حاولت انساكى مقدرتش
ديدى تبصله : انت صعبان عليا ....متتعبش نفسك معايا انا خلاص طرت تفتكر انه ينفع انزل على الارض تانى .....انت كمان دور على باسبور يخليك تطيييير
ساعتها يضربهاياسر بالقلم ويمسكها من شعرها : انت صدقتى نفسك انا اللى عملتك وخليتك نجمه بعد ماكنتى واحدة صايعه دلوقتى بتقولى ماينفعش .....7 سنين ضيعتهم عليكى موهوم بحبك خلاص مينفعش بكرة تندمى هتعرفى انا مين وانت مين انت ولا تسوى لاازم تموووووتى انت لـــــعنه !!!!!!
ديدى تصرخ : انت اتجننت بتضربنى انت نسيت نفسك وتنادى على البودى جارد علشان يطلعوه بره زى الكلب !!!!

ياااااااااااترى ايييييييييه اللى حصل بعد كدا دا اللى هنعرفوا المرة اللى جاااااااااااااايه