الخميس، 30 سبتمبر، 2010

ملل وقلق وشىء غير متوقع (ح6)


عرفنا الحلقه اللى فاتت ان يسرى بابا سلمى اتقتل مع عشيقته ولكن لسه معرفناش مين القاتل
عرفنا ان منه بتحب ياسر لكن عمايله هى اللى خليتها تكره العيشه معاه وهى عماله تسايس فيه عشان تنزل مصر وتكمل تعليمها
ووقفنا ان فيروز جالها تليفون تعالو نشوف ياترى كان من مين !!!!!!!!!!!

ويرن موبايل فيروز تبص تلاقيها مامتها تعمله صامت وتروح على المكتب وترن تاني وتالت تقوم ترد بزهق لأنها تقريباً عارفه الكلام اللي هيتقال .

فيروز : ألو
منال : روزي حبيبة قلب مامي وحشاني .
فيروز : وأنت كمان أخبارك إيه وأخبار بابا .
منال : مش كويسين من غيرك نفسنا تيجي بقى وتعيشي معانا .
فيروز : أنا لو وحشاكم بجد تعالوا أنتو أنا قلت ألف مرة مش هاعيش معاكم في الغربة ولو هاجي هتكون زيارة وهنزل .
منال : ليه مصره تعيشي عندك .
فيروز : عشان أتربيت هنا اتعودت على هنا بشتغل هنا ومش هسيب هنا ياماما .
منال : مالك ياروزي .
فيروز : مالي ....حضرتك مش عارفه مالي تعبت عايزاكم تحسوا بيا عايشة لوحدي بقالي سنة لا أخ ولا أخت لا أم ولا أب حرام وأنت وبابا كل همكم الفلوس .......الحياه مش فلوس أنا فين من حياتكم فين الحب والأسره والبيت واللمه .
منال : حبيبتي أعمل أيه بابي هو اللي مصمم علي الشغل
.
فيروز : طب تعالي أنت لكن شكل كده عجبتكم العيشة هناك نسيتوا أن ليكوا بنت أصلاً بقالها 3 سنين مشفتكوش
وبقالي سنة لوحدي محدش بيسأل علي من يوم تيتا ماماتت حتى مفكرتوش تنزلوا تاخدوا عزاها شكل مبقاش يفرق معاكم غير الفلوس .
منال تدايق أوي من كلام فيروز وتكلمها بحده : أنت أزاي تتكلمي معايا بالأسلوب ده .
فيروز : أسفه بس بجد بحس أني مش بنتكم أصلاً .
منال : أزاي تقولي كده ربنا يعلم أحنا بنحبك قد أيه ولولا الظروف اللي بنمر بيها كنا نزلنا من زمان على فكرة بابي بسلم عليكي كتبر وحايكلمك لما يرجع من الشغل علشان عايزك في موضوع
فيروز : موضوع أيه
ويفضلوا يتكلموا

*****************************************************

في الوقت ده محمد ( أخو منه ) قاعد في مكتبه وسرحان ومش مركز كل همه أخته وكل شويه بيكلم نفسه ياترى عامله إيه يامنه بقالك كتير مكلمنتيش وسي ياسر كل ما أحاول أكلمه بيتهرب مني بس بجد أنا مش فاهم واللي هايطير برج من عقلي منين هيا اتصلت عليا وبتعيط والحقني ولازم اطلق ومنين لما كلمتها قالت الكلام اللي قالته ( باحبه وماقدرش استغني عنه ) للدرجة دي عامل لها كارت ارهاب ومش عارفه تتكلم معايا بصراحه وفي عز شروده تدخل نانسي ( زميلته في الشغل ) .

نانسي : صباح الخير يابشمهندس
محمد ولا هو هنا وغرقان في بحر منه
نانسي : تقرب منه يابشمندس
محمد ينتبه ليها : ها ويتعدل في قعدته ويبتسم صباح الفل
نانسي : اللي واخد عقلك يتهنا بيه
محمد : يسمع من بقكك ربنا أدعيلي القيها بس
نانسي : هتلاقيها يعنى هتروح فين بس انت دور كويس وبص حواليك ....امال ايه اللي مخليك سرحان قوي كده وواخد عقلك
محمد : مفيش بس شوية مشاكل تخص منه أدعيلي ربنا يحلها من عنده
نانسي : ربنا يريح قليك قول لي عملت أيه في المشروع الأستاذ رجائي زرابينه طالعه وعمال يزعق حاول تخلص شغلك علشان ميدكش كارت انذار واحنا في غنى عن كده
محمد : مش عارف ربنا واعدنا بمدير يقطع الخميرة من البيت
ويضحكوا هما الاثنين وينتبهوا ويخلصوا شغلهم

******************************************************

وتخلص فيروز كلام مامتهاوهي مش طايقة نفسيها وتدخل المكتب وهي عماله تمتم بكلام مش مفهوم وتقفل الموبايل خالص
وترمى الموبايل على المكتب وتقعد بزهق سراج مراقبها وحاسس ان فيه حاجة لكن ميسألهاش
سماح تنادى عليها

سماح : بقولك ايه اجيبلك شاى بحليب
فيروز : لا مليش نفس
تبص لممدوح : اجيبلك شاى بحليب معايا
ممدوح : لا
وتبص لسراج وقبل ماتسأله سراج يبتسم :لا
تضحك ياخرابى دايما كاسفنى كدا يعنى هشرب لوحدى طيب
يبص سراج لفيروز : امال سلمى فين مجتش النهاردة كمان انا اسمع انها مجتهده زيك كدا
فيروز : بجد مش عارفة هى قالتلى انها جاية بس شكلها كدا كانت بتاخدنى على قد عقلى وتبص لسماح بقولك ايه رنى عليها وشوفيها هى فين
وتمسك فيروز الجرنال تفر فيه وتحطه بزهق وكل تفكيرها فى كلام مامتها
وتبص لسراج وتحاول تبتسم : يلانكمل شغل امبارح فاكر اللى شرحناه امبارح انا بعد كدا همسكك انت الشغل
سراج : كله تمام واحدة واحدة هقعد مكانك ويضحك
تبتسم فيروز : لالا دا انا كدا اخاف على نفسى انا اكرهه بس ساعتها اكون انا اترقيت يعنى لما تاخد مكانى اروح انا فين
بس عارف انا عندى امل انك تبقى احسن منى وتقرب منى وبصوت واطى وتقعد مكان الاستاذ حسن
يضحك سراج من قلبه ويبصلها وميردش ويبدأوا يخلصوا الشغل


تتصل سماح على سلمى تلاقى الموبايل مقفول وترن تانى برضو مقفول تتنهد يارب تكونى بخير
وتنادى على فيروز بقولك ايه ارميلى الجرنال دا اما اتثقف شوية
فيروز تبص لسماح وتضحك : سماح هتقرا جرنال لالالا هتتحسدى يابنتى
سماح : اتريقى انا بحب اشوف حظك اليوم صفحة المرأه الحوادث كدا
ممدوح : يضحك : حظك اليوم طريقك مسدود مسدود

ويرن موبايل سراج ويقوم يرن كانت اسراء اخته بتطمن عليه

سماح : ماشى ياعم عبد الحليم حافظ وتفتح الجرنال : ياسلام ياسلام (يومك سعيد وستقابل من تحب )
شوفت ياابنى الناس اللى بتدى الامل مش الناس اللى بتقول طريقك مسدود ويضحكوا كلهم

يدخل سراج كنت سامعك بتتكلمى عن الابراج يابنتى : كذب المنجمون ولو صدقوا يلا اقريلنا كدا كام خبر
سماح : خبررررر انت بتشتمنى طب استنى وتفتح صفحة الحوادث دى صفحتى المفضله
يلا اسمعوا احم احم احم

اووووووووول خبر بيقول

((( القبض على اكبر تاجر مخدرات بحى النزهه .......... اصدرت محكمة الجنايات حكمها على ظابط م ح س بالسجن خمس سنوات.......... يقتل عروسته ليلة زفافها ..... يلااااااهوى استنوا استنوا اما لوشف قتلها ليه

فيروز : هاتى يابت انت تطلعى الروح اصلا انا هقرا
واوووووول ماتمسك الجرنال يقع عنيها على

(((مصرع عشيقان فى ظروف غامضه فى فيصل )))

وتبص تلاقى اسم ابو سلمى تشهق لالالا مش ممكن اكيد مش هو اكيد مش هو وتلم حاجتها بسرعه والكل بيسألها مالك وهى مش على لسانها اكيد مش هو
تجرى وتاخد عربيتها وتفتح موبايلها وترن عليها تلاقيه مقفول تخبط على الدركسيون لالالا يارب استرها ييارب
واول ماتوصل لباب البيت تسمع زعيق زينات وبعديها صريييييييييييخ سلمى

ليه وعشان اييييييه
دا اللى هنعرفوا الحلقه اللى جايه


الأحد، 26 سبتمبر، 2010

انهيااار قلب (ح5)

عرفنا الحلقه اللى فاتت ان كريم دخل فى خناقه والسبب بنت وعرفنا قصه فيروز مع محمود وعرفنا ان ياسر مش عايز منه تنزل مصر وعايز يفضل عامل سى السيد وعرفنا ان الساعه 3صباحا تحصل مصيبه فى بيت يسرى تعالوا نشوف ايه اللى
الساعه 3 صباحا يرن تليفون بيت سلمى زينات تقوم مفزوعه وتجرى ترد على التليفون

زينات بلهفه : خير اللهم اجعله خير ..... الوووو ...... ايوه دا بيت يسرى ايييييييه بتقووووول ايه فين ومين وازاى
وترمى السماعه حتى مش تستنى تسمع بقيه المكالمه وتجرى على اوضه سلمى وبفزع
زينات : سلممممممى ..... سلمممممممى قومى بسرعه ......يالهوى يالهوى
سلمى : بسم الله الحمن الرحيم ...... فيه ايه ياماما مالك
زينات : قومى شوفى ابوكى
سلمى تتنفض : بابا ماله فيه ايه
زينات : انت لسه هتسألى وتسيبها وتجرى على اوضتها تلبس عشان تشوف ايه اللى جرى
سلمى تقوم من على السرير بسرعه وتلبس وهى مش فى وعيها ومفيش على لسانها غير استر يارب ....استر يارب ويجروا هما الاتنين وياخدوا تاكس
زينات : مستشفى الهدى لو سمحت
سلمى ساعتها تشهق : مستشفى ....مستشفى ليه وهو فيه ايه بابا ماله ايه اللى جرى ماتقوليلى ومين اللى اتصل دا وتعيط
زينات : انا مسمعتش غير انه بيقولى جوزك فى مستشفى الهدى استر ياااااااااااااااارب
زينات : ايوه ياسطى على جنب
وينزلوا هما الاتنين ويدخلوا المستشفى وتجرى سلمى على الريسبشن وبلهفه الاقى فين يسرى
الممرضه : يسرى مين !
زينات : انا جالى تليفون بيقول ان جوزى هنا الاقيه فين والنبى
الممرضه : ااااااااه هو يبقى جوزك وتبتسم بسخريه وتشاور بتهكم الدور التالت اخر الطرقه اسألى الدكتور منصور
تجرى زينات .......وسلمى تمشى بالراحه وكل شوية تبص وراها على الممرضه مستغربه اسلوبها وطريقه كلامها وتبص قدامها وتطلع السلم وقبل ماتوصل تسمع صوت مامتها بتصررررررخ تجرى سلمى تلاقى مامتها قاعده على الارض وبتعيط وبتخرخ بحرقه ...... يلااااااهوى يلااااااااااهوى طب ازااااااااااااى سلمى تجرى على ماماتها : مالك فيه ايه وبابا جراله حاااااااااجة تلاقى الدكتور تجرى عليه بابا فين انا مش فاهمه حاجة
الدكتور ميرضاش يقولها ويبتسم : هتشوفوه حالا اتفضلوا معايا تروح سلمى وتسند مامتها وهى مش فاهمه حاجة ومامتها مش قادرة تشيل رجليها من على الارض وقبل مايوصلوا للمكان اللى موجود فيه باباها سلمى تحس ان قلبها مقبوض ومش قادرة تاخد نفسها
ويوصلوا ساعتها تصرخ سلمى : انت واخدنا هنا ليييييييه هو بابا هنا
ويكشف الدكتور وش يسرى : يقربلكم
ساعتها تقعد زينات على الارض مكانها و تجرى سلمى عليه باااااااااااااباااااااااا ايه اللى حصل مين اللى قتلك رد عليا قوووووم يابابا قووووووم ومتسبنيش قووووووم وتحاول تاخدها الممرضه وتخرجها بره
ساعتها يدخل الظابط تجرى عليه سلمى : قولى ايه اللى حصل مين اللى قتله قووولى انا بنته متخبيش عليا
الظابط : اهدى بس اولا احنا منعرفش مين الجانى لكن .....ويخلى الدكتور يكشف وش المجنى عليهاااا
ويبص لسلمى : تعرفيها
سلمى حاسه انها فى كابوس : مين دى لا انا معرفهاش انا مش فاهمه حاجة
يبص الظابط لزينات : تعرفيها
ساعتها تبص زينات بسخريه وتضحك بإستهزاء
الظابط : دى ديدى الراقصه هو شكل باباكى كان على علاقه بيها احنا جالنا بلاغ ان فيه اتنين مقتولين فى شقه فى فيصل
سلمى : ايوه دى شقتنا القديمه طيب اتقتلوا ازاى وليييييييه وازاى يعنى كان على علاقه بيها
الظابط : انا معرفش كان صلته بيها ايه زواج ولا علاقه غير شرعيه بس الاحتمال الاكبر انها تكون غير شرعيه لان مين اللى ليه مصلحه فى القتل غير حد من اهل المجنى عليها ودا على حد شكى الا لو كان باباكى له اعداء تانيين ان شاء الله التحريات شغاله وقريب قوى هنعرف مين الجانى عن اذن حضرتك دلوقتى بس هنحتاجك عشان عندى شوية اسئله محتاج اعرف تفسيرها منك
ويمشى الظابط وسلمى تحس ان الدنيا بتلف بيها ومش مصدقه اى كلمة من اللى اتقالت وترجع خطوتين لورا وتسند على الحيطه وتقعد على الارض وتسأل نفسها مين يسرى انا معرفوش دا مش بابا وتحط اديها على وشها
زينات قلبها كان حاسس ان عمايله دى هتوديه فى داهيه وهتجيبله مصيبه قعدت تخبط على وشها وعلى صدرها وبصراخ : انا قلبى كان حاسس حسبى الله ونعم الوكيل فيك يايسرى حسبى الله ونعم الوكيييييييل يااااااااارب يااااااارب اعمل ايه بعد الفضيحة دى اودى وشى فين من الناس اروح فين واجى منين وتنادى على سلمى ........سلمى .....سلمى
تجرى سلمى عليها
زينات : خدينى من هنا عايزة اروح خرجييييييينى
سلمى : طب استنى ...... ومتكملش كلامها
زينات بحرقه : انا بقولك قومينى وخرجينى يلاااااا
وتقوم زينات وتروح هى وسلمى ويدخلوا البيت وتقعد زينات على الارض وتمشى سلمى بالراحة وتدخل اوضتها وتقفل على نفسيها الباب وعماله تبص على الاوضه وحاسه انها فى كابوس ونفسها حد يصحيها ويقولها ان كل دا كان مجرد حلم وتترمى على السرير وتنهار فى العياط وكلام الظابط عمال يتردد فى ودنها زينات مش همها انه اتقتل بالعكس هى فرحت انها خلصت من قرفه لكن كل اللى حارق قلبها سمعه بنتها اللى بقت فى الارض وتتسند وتقوم وتروح على اوضه سلمى وتفتح الباب تلاقى بنتها منهارة زينات قلبها يتقطع وتقرب منها وتمسح على شعرها وتطبطب عليها وبصوت حنون : حبيبتى انا عمرى ماتوقعت ان دا يحصل ولا كنت احب اشوفك فى الموقف دا لاكن ماباليد حيله قدر ومكتوب علينا هو اللى حط وشوشنا كلها فى الطين لازم تكونى متماسكه هو ميستاهلش دموعك دى
تبص سلمى لمامتها بعيون كلها عتاب ولوم (ياترى ليه ) : لو سمحتى سبينى لوحدى دلوقتى
تخرج زينات وقلبها بيتقطع على بنتها ومش على لسانها غير حسبى الله ونعم الوكيل فيك يايسرى

************************************************

والساعه 7صباحا يرن المنبه فيروز تمد اديها تطفيه وبعد شوية تقوم تغسل وشها وتصلى وتمسك الموبايل عشان تصحى سملى تلاقيه مقفول تحط الموبايل على المكتب وتشغل شريط نجاه عيون القلب وتروح تجهز الفطار ...... تفطر وتلبس هدومها وتاخد شنطتها ومفاتيح العربيه وتنزل وهى مخنوقه ومضايقه من العيشه لوحديها موت جدتها ساب عندها فراغ .....ومامتها وباباها اللى مش حسين بيها وكل همهم الفلوس سايب جواها جرح كبير
تنزل وتركب العربيه وتمشى شوية والكالعادة تعدى على عم سيد بتاع الجرائد متعودة تجيب من الجرايد من ايام الثانوى

فيروز : صباح الخير ياعم السيد
سيد : صباح الفل ياست الكل
فيروز : ازيك دلوقتى وزاى طانت ونورا
سيد : بخير نحمده ونشكر فضله
فيروز : ادينى بقى الجرنال لحسن متأخره وشكلى هاخد استماره 6
سيد : اتفضلى ياست البنات ربنا يوفقك
فيروز : ماشى وادى 10 جنيه وخلى الباقى معاك حساب باقى الاسبوع :)
سيد : ماتخلى والله من غير فلوس تعالى خدى اللى يعجبك
فيروز : ربنا يخليك ياراجل ياطيب دعواتك ....سلام
سيد : سلام ياست البنات ربنا معاكى وينورلك طريقك ويرجع باباكى ومامتك بالسلامة
تروح فيروز وتركب عربيتها وتروح على شغلها

**********************************************
سراج يصحى ويلبس وقبل ماينزل يروح اوضه كريم عشان يطمن عليه ويفتح الباب يلاقيه نايم ويقعد على السرير جنبه ويقولوا : ربنا يهديك ويبعد عنك ولاد الحرام ويبعد عنك الشيطان يارب اربط على قلبه من الافكار اللى هتأذيه اربط على قلبه من حب الشهوات
وينزل على شغله

***********************************************

تفتح منه عيونها تلاقى ياسر صاحى جنبيها تعمل نفسيها بتتقلب وتاخده فى حضنها (( هى بتحبه اوى هو اول راجل فى حياتها بس تعمل ايه عمايله دى هى اللى ولدت الكره بينهم هى مش قادرة تفهمه بس لازم تستحمل لان ملهاش غيره فى الغربه لازم تعمل كدا عشان تحسسه بالامان انها لما تنزل مصر هترجع تانى .....لكن لو حسسته انها مبقتش عايزة تكمل معاه هيعاند اكتر ))
ياسر يبص لمنه بحنان ويحط ايده على شعرها ويبوسها ويقوم ياخد شور ويغير وينزل على شغله من غير مايصحيها ولا يقولها انه نازل ودا كان بيأثر فى منه مش عارفه ليه هو بيعاملها كدا وتقوم تروق الشقه وتحضر الفطار عشان تفطر

***********************************************
توصل فيروز الشغل وتركن عربيتها وتدخل تصبح عليهم
فيروز : صباح الخير يااحمد (موظف الريسبشن )
احمد : صباح النور فيروز
وتمشى شوية ينادى عليها
احمد : بقولك صحيح منى سالت عليكى واول مااشوفك ابلغك انك تروحيلها
فيروز تضحك : خير ...اكيد عملت مصيبه الكعادة وعايزانى اخرجها
احمد : ربنا يسترها
وتروح فيروز على مكتب منى عشان تشوف عايزة ايه

فيروز : صباح الورد والياسمين
منى صباح الروقان
فيروز : ها قالولى ان منى عايزاكى فى مصيبه جديدة
منى : يالهوى هو انا اتشهرت كدا .....بصى هو انا كنت عايزة 3 ايام اجازة بس عشان مسافرة البلد
فيروز : طب ماتروحى يعنى هو هياكلك
منى : لا يافالحة هيرمى الورقه فى وشى بس ما هو انت عارفة ان مفيش اجازات الايام دى عشان الشغل كتير وانا عارفه ان ليكى دلال عليه وهيوافق
فيروز : وليه يافصيحة الاجازة من اصلوا
منى : فرح بنت عمت عقبالك كدا ياااااااااارب
فيروز : ماشى دعوة رشوة ماشى ....طيب حضريلى الطلب
منى : والطلب جاهز ياباشا
فيروز : دا انت عامله حسابك بقى وايه بقى الل طمنك انى كنت هوافق
منى : احساسى مبيخيبش
فيروز : ماشى قلب الام
اوعى بقى اما اروح انا
منى : قلبى معاااااااكى
فيروز : ماشى صدرينى لوش المدفع وربنا يستر

وتروح فيروز لمكتب الاستاذ حسن عشان تستأذن منه وبعد معاناه يوافق
وتروح تدى الطلب لمنى وخليها تجهز شغلها عشان سماح وممدوح هيستلموه مكانها

ويجيلها تليفون يارترى من مييييييييييييييين
دا اللى هنعرفه الحلقه اللى جايه

السبت، 11 سبتمبر، 2010

انانية وحب امتلاك (ح4


الحلقه الرابعه

عرفنا الحلقه اللى فاتت حصل شد بين منه وياسر
ومنه كلمت اخوها لكن غيرت كلامها خالص ياترى ليه
ونرجس كلمت سراج عشان تتطمن عليه

ودخل عادل وكريم على سراج ومراد وهو سايح فى دمه تعالوا نشوووووووف اللى حصل

حضر مراد الاكل ولسه هياكلوا الباب يتفتح ويدخل كريم وعادل
يشهق سراج ومراد بلهفه كرييييييييم ويقوموا جرى يلاقوا قميصه كله دم يشلوه بسرعه ويقعدوه على الكرسى ويسأل سراج بلهفه (( ايه اللى حصل ))
عادل : مفيش حاجة
مراد : مفيش حاجة ازاى يعنى اتخانقتوا صح ماترد ياكريم
وكريم عمال بيتوجع
عادل (( مش وقته خليه يدخل يستريح ))
سراج : ياجماع شكله تعبان مانطلبله دكتور
عادل : لا مفيش داعى احنا عدينا على المستشفى وعملوا اللازم
ويدخل كريم يغير ولسه هينام يدخل عادل ويقفل الباب وراه مراد يحس ان فيه حاجه ويرح وراه ويفضل واقفل على الباب يسمع
عادل : ممكن تقولى هتفضل كدا لحد امتى
كريم : كدا ازاى
عادل : طريقتك ديا شوفت اخرتها كنت هتموت ومن مين من حته عيل لا راح ولا جه
كريم : اهو انت قولت عيل .......انا بقى هربيه عشان يعرف قيمته كويس
عادل : هتستفيد ايه هتفش غليلك وبعدين ........كريم انا خايف عليك سيبك منه ومنها ولسه هيكمل كلامه
كريم : اسيبنى منه اه بس بعد اما اربيه لكن اسيبنى منها فلا .انا اخدتها تحدى ولازم اكسب
عادل : هو ماطش كورة يابنى فوق بقى هى لابتفكر فيك ولا فيه ولاهتفكر فى كدا
كريم : مش مع كريم ياعادل وانت عارفنى
عادل : يعنى ايه
كريم : انا وراها والزمن طويل ادام هى دخلت دماغى يبقى لازم تقع على مناخيرها اللى رافعاها
عادل : انت اصلا الكلام معاك ممنوش فايده براحتك نام
ويفتح الباب يلاقى مراد فى وشه يبصله ويهز راسه وانت كمان بتعمل ايه
مراد : تعالى فهمنى ايه اللى حصل ..........

**********************************************
فى الوقت دا منه واقفه بتحضر الاكل وياسر
بيشرب شيشه و فاتح التليفزيون على قناه اغانى وبيغنى معاها

***********************************************
عرفنا ان فيروز راحت لسلمى عشان تشوف مالها بعد مانزلت من عندها ركبت عربيتها وفضلت تفكر فى كلامها قد ايه محدش مرتاح ولا حد عاجبه حاله وعلى رغم ان مامتها وباباها معاها وحاسه بغربه وضيق امال هى تعمل ايه اللى مامتها وباباها بره بقالهم 3سنين ومش بيفتكروها غير عشان الحواله حاولت تغير مودها فتحت علبه الشرائط وطلعت شريطها المفضل شغلته وفضلت تغنى معاه

***********************************************
منه بتكلم نفسيها يارب انا عملت ايه .....حساك بتعاقبنى بس مش عارفه ليه .......هو انا استاهل دا كله
من يوم ما جيت هنا ماشوفتش يوم عدل شرب واهانه وقرف
وينادى عليها ياسر : ايه دا كله بتعملى غذا ......بقولك ايه ماتجيلى تقعدى جمبى شويه
متردش عليه وبحرقه : ربنا ياخدك حسبى الله ونعم الوكيل

**********************************************
الحته زحمه وتقف فيروز فى الوقت دا تيجى اغنيه تسأل عليا كتير (وتغنى معاها ((تسأل عليا كتير بتحبنى بعرف ها الحكى حافظه ها الحكى كل الحكى حلو .......وتشرد بذهنها وترجع لايام الجامعه ))
وتفتكر زميلها عمرو هو مكنش زميلها بس كان كمان حبيبها هى مصرحتش بدا لحد لانها عارفه انه على علاقه مع نهى بنت خالتو وفى نفس الوقت نهى دى صحبتها كتمت جواها الحب 4 سنين يشاء القدر انهم فى السنه الاخيره يشتركوا سوا فى مشروع التخرج ساعتها قربوا من بعض قوى وخلصوا المشروع وسلموه وجابوا فيه تقدير ...........
سرحت فيه وفى الاوقات اللى قضوها سوا لما يقعدوا مع الشله ويغنوا حاجة غريبه وانا لحبيبى وانا وشادى بأمر الحب
سرحت لما طلعوا رحله سوا وتاهوا
سرحت لما جم متأخرين فى مرة والدكتور طردهم
وسرحت فى اخر يوم ليهم فى الجامعه لما اجتمعوا عشان يودعوا بعض قبل مايمشوا
وافتكرت قد ايه كانوا زعلانين انهم هيفترقوا
وسرحت فى اخر حوار كان بينها بين عمرو لما سألت عليه ولقته مع نهى مشيت ولقته بينادى عليها
عمرو : يعنى مشيتى من غير ماتسلمى
فيروز : انا سألت عليك ملقتكش وسبت سلامى مع سلمى شكله موصلش
عمرو : لا وصل بس كنت حابب اسلم عليكى بنفسى
مد ايده عشان يسلم عليها هى اترددت فى الاول ومدت اديها ببطىء واول مالمست اديها ايده زادت ضربات قلبها وانقلب كيانها اول مرة تسلم على حد وكمان دا حبيبها سحبت اديها بسرحه وابتسمت
فيروز : اشوف وشك بخير
عمرو : هتمشى بسرعه كدا ماتخليكى
فيروز : نفسى بس هكلم ماما وبابا النهاردة على النت
عمرو : ربنا يرجعهم بالسلامه طيب اشوف وشك بخير ......ويسكت شويه ويبص لفيروز ولسه هيتكلم يرن موبايله وتكون هى بتستعلجه عشان يخرجوا تضايق فيروز وبلهجه غريبه : اسيبك بقى عشان تلحق نهى اديته ظهرها ودمعت ولسه هتمشى ينادى عليها بصوت حنون ((مالك )
فيروز :مفيش بس زعلانه عشان دا اخر يوم وياعالم هنشوف بعض ولا لا
عمرو فاهم هى زعلانه ليه لكن ماباليد حيله هو كمان كان بيحبها لكن محبش يعلقها بيه عشان هو عارف ظروفه كويس وعارف ان مهما حصل عمر اهلها ماهيوافقوا عليه
وبتردد : فيروز عايز اقولك على حاجة قبل ماتمشى
فيروز تبصله وحاسه انه هيقولها على اللى جواه
عمرو : انا بجد ........ ويسكت ........انا معجب بيكى وملحقش كمل كلامه وجت نهى (هى كانت مجرد بنت خالتو وبس )
فيروز قلبها يدق ومصدقتش ودانها حست ان هيغمى عليها بس فى نفس الوقت قالت ( ازاى طب ونهى )
نهى : الناس اللى عايزة تمشى ومتخرجش معانا دى شكلها زهقت مننا
فيروز لا والله بس ماما وبابا مستنيينى عشان اكلمهم معلش اكيد تتعوض واكيد هشوفوا تانى
نهى : ان كان عليا مش هقدر انزل من اسكندريه تانى لكن ان كان على ناس تانية تنزل وبجد هتوحشينا اوى وتبص لعمرو بخبث ولا ايه ياعمرو
عمرو يتقلب كيانه وميعرفش ينطق ويبتسم
فيروز : مفهمتش قصدها لكن احساسها بيقول انها بتلمح انه بيحبها
وتودعهم وعيونها كلها دموع
وتمشى افتكرت كل دا وعيونها دمعت وقطع شرودها دق على زجاج شباك العربيه وتبص فيروز تلااااقى شرطى المرور
الشرطى : هتفضلى كدا واقفه كتير ياانسه
فيروز : اسفه الحته كانت زحمه وسرحت شويه مأخدتش بالى
الشرطى : اه مأخدتيش بالك طيب وادى مخالفه عشان المرة اللى جايه تاخدى بالك
تضحك فيروز على اللى حصل لان دى مش اول مرة تسرح ولا دى اوى مرة تاخد مخالفه

************************************************************

وتخلص منه الاكل وتروح تحط علشان زوجها المصون ياكل ولسه هتاكل بيصلها : اطمنتى على اخوكى
منه بقرف : بشكرك لكرم اخلاقك
يسكت شويه ويهرش فى راسه : هو انت ناويه تنزلى مصر
منه تتخض من السؤال وحست ان الدنيا هتتقفل فى وشها وتحاول تكلمه بسياسه وترد بتردد : اللى تشوفوا ياحبيبى
ياسر : لا اصلى سمعتك وانت بتقولى هنزل مصر عشان الامتحانات فإفتكرتك اخدتى القرار
منه تبصله وتحاول تتصنع الابتسامه : هو انا اقدر اخد قرار من غيرك القرار الاول والاخير ليك بعدين دول يادوب اسبوعين
ياسر : ومين قالك انك هتنزلى اصلا ......بصى انا مش محتاج للشهادة وهو انت ناويه تشتغلى بيها ولسه .......طبعا لا وبعدين يهون عليكى تبعدى عنى اسبوعين دا هيعدوا عليا سنة
منه جواها نار مش عارفه تعمل ايه مبقتش مستحمله ولا بقت طايقاه ولا قادرة تكمل فى التمسيليه دى بتكلمه بحب وتدادى فيه عشان خاطر يوافق على نزولها وفى الاخر يقول لا قلبها يصرخ ربنا يخلصنى منه

ياسر : سرحتى فى ايه
منه بصوت حنون وعيون مدمعه : طيب انت يهون عليك انى اضيع 3 سنين ونص من عمرى هدر عشان خاطر اسبوعين
خلاص انا مش عايزة اشتغل ولا هفكر فى كدا بس يبقى معايا شهادة هنزل امتحن وارجع تانى اخر يوم فى الامتحان
ياسر يتعصب : انت بتضحكى على مين ال ترجعى اخر يوم ......مش هتنزلى يامنه فاهمه مش هتنزلى . واخبطى دماغك فى الحيطه وكلامى هو اللى هيمشى مش عارف شهادة ايه ونيله ايه هما ياخدوا شهادات عشان يتجوزا وانت اتجوزتى ناقصك ايه هااااا
منه : بس دا مكنش كلامك قبل كدا انت وعدتنى انى هكمل تعليمى
ياسر : بليه واشربى ميته
منه : حراااااااااااام عليك ......حراااااااام عليك حسب الله ونعم الوكيل
يشدها من شعرها : انت طولتى لسانك النهاردة كتير اوى وانا ساكتلك انت هتاخدى على كدا يابت ولا ايه
ماتتلمى بقى
منه تبصله ودموعها تنزل ومتقدرش تنطق عشان عارفه لو نطقت هيضربها زى كل مرة !!!!!!!!!!!!
تجرى منه على الحمام وتفتح الميه وتحط راسها تحتيها وتفضل تعيط
وبعد فتره يدخل ياسريلاقيها نايمه بتبقى شبه الملايكه وهى ناميه
يقعد جنبيها ويفضل يبصلها ويأنب نفسه على المعامله اللى بيعاملها بيها بس هو شايف انه مغلطش وحتى لو غلط مش هيعتذر (اصله فاهم معنى الرجوله غلط )
ويحط راسه على المخده وينام

**********************************************
فى الوقت دا توصل فيروز البيت وتغير هدومها وتتغدى وتقعد شويه على اللاب توب ويغل عليها النوم
************************

والساعه 3 صباحا تحصل مصيبه فى بيت سلمى يااااترى ايه هى

دا اللى هنعرفه المرة اللى جايه



الأربعاء، 1 سبتمبر، 2010

مواجهه وحيره ح3



احنا عرفنا الحلقه اللى فاتت ان ياسر ادى الموبايل لمنه عشان تكلم اخوها تعالوا نعرف ايه اللى حصل

منه تمسك الموبايل وتتصل على محمد وتستنى الرد
محمد فى الوقت دا فى اوضته بيصلى
ويفضل التليفون يرن ويرن وقلب منه عمال يدق وبتكلم نفسها رحت فين يامحمد وياسر قاعد على الكرسى حاطط رجل على رجل ومستنى الرد
محمد يخلص ويجرى على التليفون يلاقى منه ولسه هيرد المكالمه تفصل


ياسر بعجرفه : ((ايه مبيردش .....اخص عليه ملهوش حق .... امال لو مكنش ملهوف وعايز يسمع صوتك كان عمل ايه))
تبص منه لياسر ومتعبروش وتتصلى على محمد تانى تلاقيه مشغول لان فى الوقت دا محمد كان بيتصل عليها تضايق وتحس انها مخنوقه
ياسر : ((هاتى الموبايل دا وروحى حضرلنا الغذا هو يبقى يتصل احنا مش فاضيين للكلام الفاضى دا))
منه بعصبيه : ((كلام فاضى ... هو انا لما اكلم اهلى واطمن عليهم كلام فاضى يااخى حرام عليك حس بيا شوية انت معيشنى فى نار من ساعه ماجيت هنا كنت عملتلك ايه فين كلامك فين وعودك .......مسألتش نفسك مرة ان كنت سعيده ولا لا ان كنت بموت فى اليوم الف مرة ولا لا بتفضل بره لنص الليل ال ايه فى الشغل وانا هنا لوحدى حتى معاملتك ليا محسسنى انى عبده عندك محسسنى انك اشترتنى بفلوسك ليه ياياسر لييه وتنهار فى العياط))

ياسر يسقف : برافو لا بجد برافو تعرفى اول مرة اعرف انى وحش وقاسى اخص عليا ويقوم من على الكرسى ويفضل يقرب منها وهو بيقول (( حرام عليا ..... احس بيكى ......عايشة فى نار ........مش سعيده ......بتموتى الف مرة .........ويقف قدامها وبكل جبروت مش سعيده ليه ناقصك ايه . هاا هو انت كنتى تحلمى انك تعيشى فى المستوى دا ........ كنت تحلمى ان ابص لوحدة زيك ......عايزة ايه اكتر من كدا ))
منه : ((تحس بيا ......نفسى اعرف انت ليه بتعاملنى كدا وكأنى واحده من الشارع مش مراتك حبيبتك))
ياسر : ((انت بالنسبالى واحدة زى اى واحده عرفتها كلكم زى بعض))
منه : ((اجوزتنى ليه محدش ضربك على ايدك ولا غصبك ولا جريت وراك اقولك اتجوزنى والنبى انت اللى حفيت وان كنت ناسى افكرك))
ياسر يقرب منها : ((لا فاكر كويس اوى بس انت عارفة انا اتجوزتك ليه ........عشان عجبتينى كل حاجة فيكى عجبتنى حبيت ألاغيكى لقيتك مبتجيش غير بالجواز قلت اتجوزك))
منه تبصله بقرف :(( تصدق انك احقر واحد انا شفته فى حياتى))
ياسر : ((لالالالالا كدا عيب البنات الشاطرين ميشتموش لحسن عقابهم هيكون جامد اوى))
محمد يحاول يتصل تانى ويرن موبايل ياسر ..........ياسر ياخد الموبايل ويبص لمنه ((رد ياهانم ))ويمسك اديها جامد .... عشان تعرفى انى احسن منك وهعتبر انك مقولتيش حاجة بس حسابنا بعدين

وترد منه بصوت مهزوز : الو
محمد بلهفه : ((الو ايوه ازيك يامنه))
منه : ((تمام حبيبى الحمد لله ....... اخبارك ايه))
محمد :(( مش مهم انا ..... انت اللى اخبارك ايه طمنينى عليكى))
منه : ((انا بخير طول ماياسر حبيبى بخير .......طول ماانا معاه مش عايزة حاجة من الدنيا .....مكنتش متصورة ان فيه حد كدا طيبه ايه وحنيه ايه وحب ايه ربنا يخليه ليا ......انت عارف انا لما افكر انى هنزل مصر عشان الامتحانات و انى هبعد عنه قلبى ميطاوعنيش بحبه بقى اعمل ايه ))
ياسر واقف ومبسوط اوى من كلام منه ومحمد مذهول من الكلام ( هى دى منه اللى كلمتنى الصبح ) ولسه منه بتكمل كلامها يزعق فيها : ((منه فيكى ايه ماتنطقى كان مالك الصبح وعايزة تطلقى ليه وايه الكلام الغريب اللى عماله تقوليه انت بتكذبى على مين دا انا محمد اخوكى))
منه جواها نار ونفسها تعيط وتحكى وتفضفض بس ازاى و ياسر واقفلها زى اللقمه فى الزور
منه : ((ربنا يخليك ليا حبيبى وميحرمنيش منك ويارا كمان هى موجودة اسلم عليها))
محمد : ((منه لازم اكلمك تانى فاهمه لازم))
منه : ((خلاص حبيبى متصحيهاش انا هبقى اكلمها وقت تانى سلام بقى عشان اكمل اكل يسورة حبيبى جعان))
محمد بكل ذهول واندهاش سلام))
تقفل منه وترمى الموبايل على الكنبه
ياسر : ((اطمنتى عليه ....... بس تسلميلى ياعمرى على الكلام الجميل اللى قولتيه))
منه تبصله من فوق لتحت وتروح عشان تكمل طبيخ (( ياترى ايه اللى هيحصل ))

************************************************

فى الوقت دا سراج (( فاكرين دا زميل فيروز اللى شغله المدير وخلاها تدربه )) يروح يفتح باب الشقه ويدخل ((( سراج من المنصورة مامته عايشه (ربه منزل ) وباباه متوفى وليه اختين اسراء ومنى هو ساكن مع 3 شباب كريم وعادل ومراد )) سراج كان مبسوط قوى من اول يوم يروح فيه الشغل يدخل اوضته (( كان منظم جدا )) يغير هدومه يدخل عليه مراد
مراد : ((حمد لله على السلامه))
سراج بإبتسامه :(( تمام يااااه متعرفش انا مبسوط قد ايه))
مراد : ((يقعد على السرير احكيلى احكيلى))
سراج : انا هموت من الجوع
مراد : الاكل جاهز ياباشا بس احكيلى الاول
سراج : هحكيلك واحنا بنغرف
ويروحوا على المطبخ
مراد : ها يلا قول بقى
سراج: ((احساس جميل انك تشتغل واحساس اجمل انك تلاقى اصحاب المكان محسسينك ان واحد منهم وبيعاملوك بحب تحس انك معاهم من زمان مش مهم انت جديد ولا قديم الكل بيساعد بعض المهم الشغل يطلع مظبوط بجد اتمنى اكمل معاهم))

مراد : ((ياسيدى ياسيدى ربنا يوفقك عقبال كدا مااخلص الكليه دى على خير بس بقولك ايه ساعتها بقى تشغلنى امال ايه))
سراج : ((اتخرج انت بس وجيب تقدير وملكش دعوة تلاقى الشركات هى اللى بتطلبك بس نركز هانت كلها كام شهر وتتخرج وتبقى محاسب قد الدنيا))
( مراد انسان كويس جدا بيحب دراسته هو رابعه تجارة انجليزى اهله متوسطين الحال ساكن من اسوان لكن كليته فى القاهرة )
ويحطوا الاكل عشان ياكلوا يسأل سراج على كريم وعادل
مراد : كالعادة بياكلوا بره

يرن موبايل سراج
سراج : الو ازيك يااما
نوارة : ازيك ياحبيب امك عامل ايه
سراج : بخير يااما بس ادعيلى انت
نواره : دعيالك فى كل صلاه وتعيط وحشتنى ياضنايا البيت ملوش حس من غيرك مرتاح فى شغلك ياحبيى هتيجى امتى
سراج : يضحك (( هو انا لحقت دا يادوب يومين اول اجازة مش هتأخر عليكى متعيطيش بس )) اسراء جنبك اكلمها
نوارة : لا دا ياحبه عين امها من الصبح فى الجامعه ........ز بس البت نرجس بنت عمك هنا استنى اندهالك
سراج : لالا يااما استنى بس
نوارة : اسكت ياولا ......... نرجس نرجس انت يابت تعالى كلمى ابن خالك شهلى يابت
نرجس تيجى جرى صحيح يامرات خال وتاخد الموبايل : ((الو ازيك ياسراج ......والنبى ياخويا البيت ساكت من غيرك كان ضرورى سفر يعنى ياخويا ماله الشغل هنا اهو على الاقل تكون جارنا بدل الشحططه بقولك ايه ركز فى شغلك وبلاش لكاعه واياك تبص كدا ولا كدا اه اصلى عارفه بنات مصر ومياصتهم اسيبك بقى بس متعوقش وتعالى على طول سلام))
وتدى التليفون لنواره : تدعيله نواره وتقفل معاه
ويضحك : ولسه هياكلوا الباب يتفتح ويدخل كريم وعادل
يشهق سراج ومراد بلهفه كرييييييييم ويقوموا جرى
ياترى ليه وايه اللى حصل
اللى هنعرفه الحلقه اللى جايه