الأحد، 14 نوفمبر 2010

نجده وخيبة امل (ح12)


عرفنا الحلقه اللى فاتت ان فيروز راحت على شغلها بعد ماطلعت من الجوازات وفضلت متضايقه ان ازاى عمرو ماافتكرهاش وفجأه لقت ظرف جوه الورق ويخص شغله وفرحت انها هتشوفوا تانى وقررت انها تروح الجرنال وسراج تعب جدا بعد الشغل ومرضيش يجيب الدكتور ودخل نام على رغم تعبه وكريم وعادل مقضينها سهر وخروجات ومنفضين للدراسه واللى عايزينها :) وعرفنا قصه ياسر مع ديدى اللى اتقتلت مع يسرى ابو سلمى وان ازاى هو حب وضحى عشانها 7 سنين وفى االاخر سبته بعد ماوصلها لحلمها ازاى كانت بشعه ومبتفكرش غير فى الفلوس والشهرة ازاى داست على قلوب !!!!! ازاى كانت لعنه بانسبة لياسر !!!! افتكر اخر مرة لما راحلها واتحايل عليها ترجعله وهى كسرته بكل كبرياء ورفضت وضربها وهى طردته
تعالو نعرف ايه اللى حصل بعد كدا؟؟؟؟؟؟

ياسر قاعد على كرسيه وفضل يفتكر ويفتكر ذكرياته معاها حس قد ايه انه كان حقيير انه صدق كلامها ونظراتها كان لازم يعرف انها حية وميأمنش ليها وبعد ماعاد شريط الذكريات اتعدل فى قعدته مسح دموعه وكلم نفسه : بس مين يسرى دا ......وياترى ياديدى كان ايه غرضك منه ايه .......اصلك مبتعرفيش حد غير لما يكون ليكى مصلحه ...ومين له غرض فى قتلك ......وفى عز ماهو سرحان تدخل سها عليه ((فاكرينها دى الكتكوتة اللى كانت معاه لما منه دخلت عليه المكتب ))
..........دخلت سها وهو مش حاسس بيها خالص وتفضل تقرب منه وتنادى عليه وهو ولا هنا تقرب منه قوى تلاقي دموعه على خده تتخض وتنادى عليه وتقرب منه و تسمح دموعه ساعتها يحس بيها تساله بصوت حنون عن السبب يبصلها وميردش تفضل تمسح على شعره وتطبطب عليه عايزاه يتكلم ويفضفضلها ساعتها تنزل دموعه غصب عنه تانى
سها: قولى مالك وريحنى حبيبى مقدرش اشوفك كدا ......دموعك بتقطع فى قلبى .....تعالى نخرج من هنا ..تعالى نروح اى حته عشان خاطرى .....يلا
يقوم ياسر وياخد الجاكت على اديه ويطلع
السكرتيره مستغربه اول مرة تشوف ياسر كدا..... وبرضو مش عاجبها الوضع وتكلم نفسها : الله يكون فى عونك يامدام منه لو اعرف اوصلك كنت حكيتلك على كل حاجة بشوفها هنا .......وترجع تانى تقول ...وانا مالى ماتاكلى عيش وانت ساكته


فى الوقت دا منه بره بتشترى طلبات للبيت وتنتهز فرصه انها برة وتشترى كارت عشان تكلم محمد محمد مشغول جدا وعامل الموبايل صامت منه تتصل تانى وتالت ومحدش بيرد منه تحس ان الدنيا بتضيق بيها اكتر وتنزل دموعها وتحط السماعه وتشيل الكياس بتاعتها وتروح تكمل مشاويرها
***************************************
يخلص محمد شغله ويحس براحه كبيره انه خلص المشروع ........تدخل نانسى عليه تلاقيه مبتسم
نانسى : شكلك كدا خلصت المشروع
محمد : ياسلاااااااااام بجد مش مصدق نفسى دا كان كابوس ياساتر
نانسى : الحمد لله ...طيب انا جعانه مش نفسك تاكل
محمد : دا اانا واقع
نانسى : طب يلا بينا
محمد : هروح بس اسلم الورق عشان ميطلعش عليا زرابينه ونخرج على طول
نانسى : اوك اكون انا كمان لميت حاجاتى
يروح محمد لمكتب المدير ويسلمه المشروع ويفضل يرغى معاه


فى الوقت دا منه تخلص طلباتها وقبل ماترجع البيت تدور على اقرب كبينه عشان تتصل تانى وبرضو مبيردش يخرج محمد من عند المدير ويطلع موبايله من جيبه يبص يلاقى 7 مرات من رقم دولى قلبه يدق جامد اكيد دى منه استر يارب منه نرفع السماعه تانى وتتصل وتكلم نفسيها : ياااارب ترد يامحمد لازم اكلمك
ويررررن موبايل محمد : يرد بلهفه : الوووو
منه تضحك وتعيط : محمد وحشتنى بحمد ربنا انك رديت انا كنت هتجنن لو مردتش
محمد : معلش والله كنت مشغول وعامل الموبايل صامت المهم طمنينى عليكى دا انا اللى هتجنن من اخر مرة كلمتك بجد مش فاهم حاجة منه افتحيلى قلبك
ساعتها تنهار منه وتتكلم بحرقه : محمد بجد انا مبقتش مستحمله انا محتجالك انا لازم انزل مصر يامحمد ياسر اللى اتجوزته غير ياسر اللى انا عايشه معاه دلوقتى حاسه انى مع بنى ادم تانى حد انا مش فاهماه اتحول لوحش بيرهبنى مخوفنى من ساعه ماجيت هنا وانا مشوفتش غير اهانه وضرب وسكر وعلاقات غرامية حابسنى ومش عايزنى انزل اكمل تعليمى بيعاملنى وكأنى جاريه وعبده لاوامره وطلباته وشهواته مبتفرقش معاه مشاعرى اوقات بلاقيه حنين واوقات بلاقيه حيوان حساه مريض محمد اناااا محتجالك اووووى وتعيط جامد
وتفضل تحكيلة عن الايام اللى قضيتها والخنافات والاهانات وان ازاى هى عماله تسايس فيه وتكلمه بحب ورقه وحنان عشان يرضى ينزلها بس خلاص هى زهقت من كتر التفكير وتفضل تحكى وتحكى
محمد عمال بيسمع وخلاص يحس انه مخنوف ومش قادر ياخد نفسه قلبه بيتقطع على اخته هيتجنن مش قادر يعملها حاجة ومش قادر يلومها لانها هى اللى اختارت من البدايه بس خلاص الكلام فى اللى فات نقصان عقل محمد يقطع كلامها لانه مش قادر يسمع اكتر من كدا : منه حبيبتى لازم تصبرى خليكى فى تمثليتك لغاية ماتنزلى.. سايسى امورك
منه : نفسها تخبط راسها فى الحيطة : انا اللى استاهل ياريتك ضربتنى ومنعتنى ياريتنى سمعت كلامك



محمد يقاطعها تانى : منه متفكريش فى اللى فات حرام عليكى نفسك الندم مبيرجعش اللى ضاع مننا فكرى فى اللى جاى ومتخافيش خلى ايمانك بربنا كبير صدقينى ربنا هيفرجها عليكى ويحاول يغير الموضوع .....اه صحيح يارا بتسلم عليكى كتيييير
منه : ابقى سلملى عليها اوووى وحشنى لمتكم وحشنى كل حاجة حلوة
ياسر طالع من الكافيه هو وسها....ولسه بيركب العربية يلمح منه من بعيد ماسكة التليفون وعماله تتكلم وتمسح دموعها يخبط العربية برجله والدم يغلى فى نفوخه ويركب العربية بنرفزة ويطلع بالعربية بسرعه ......!!!!!

منه : خلاص هتقفل يامحمد .....حاضر هطمنك عليا بس مش اوعدك دايما لان انا فين وفين لما بخرج ياسر لو عرف انى كلمتك هيقطعنى يلااااا ربنا يستر لا اله الا الله
محمد : محمد رسول الله
تقفل منه وتطلع الكارت تقطعه وترمية فى السلة وتاخد كياسها وتوقف تاكس عشان تروح

**************************************

نانسى حاطة اديها على خدها وعماله تبص فى الساعه يدخل محمد عليها وهو وخنوق ومش مركز وعمال بيفكر فى ياسر نفسه يقتله
نانسى : ايه يابشمهندس دا كله انا جعانه
محمد ميردش عليها نانسى تستغرب اوى وتنادى تانى محمد يبصلها وميردش
نانسى : المدير قالك حاجة
محمد : لا
نانسى : امال مالك ماانا سايباك كويس
محمد : معلش يانانسى انا مضطر اروح تعبان شوية
نانسى : تقوم من مكانها وتروح لمكتب محمد وبقلق : مالك يامحمد مش هخليك تروح وانت فى حالتك بقالك اسبوع متغير وحساك شايل هم ومش راضية اسألك بس دلوقتى لازم اقولك مالك فيك ايه
محمد عيونة مدمعه يبصلها : انا عايز امشى من هنا يلا بينا
ويقوموا يطلعوا براا الشركة



فى الوقت دا فيروز وصلت للجرنال دخلت الرسيبشن وسألت على عمرو عبد الغنى لكن للاسف الموظفه قالتلها ان مفيش حد بالاسم دا .......تسأل على صاحب الظرف لكن الموظفه متعرفش بس تقولها روحى قسم التحقيقات اخر الطرقة يمين اكيدد هتلاقى اللى يفيدك هناك........تروح فيروز واول ماتدخل عنيها تقع عليه قاعد على المكتب واول ماعنيها تقع على اسمه تتسمر مكانها وتفضل مبلمة .......هو اول مايشوفها يقوم جرى ويبتسم بلهفه
باسم : بجد مش مصدق دا انا كنت هتجنن عليكى مش عارف اوصلك ولا اجيبك ازاى .......تفضل فيروز بصاله ومتردش للاسف مطلعش عمرو لكن الشبه كان كبير اوى رجعتلها خيبة الامل تانى كانت فاكره انها ممكن تشوفوه تانى بعد سنيييين
فيروز تحاول تتصنع الابتسامه : اسفه لو كنت فتحت الظرف بس كنت عايزة اعرف تبع مين
باسم : بتعتزرى على ايه دا انا اللى بشكرك من قلبى لامانتك الورق دا مهم جدا لو مكنش اتسلم النهاردة كان ممكن اخد استمارة 6 ......ثوانى هودى الورق واجى ويبصلها تانى : شوفتى نستينى اسألك تشربى ايه
فيروز : متشكرة جدا انا متأخرة ولازم امشى
باسم : لايمكن لازم تشربى ...لمون خلاص هطلبلك لمون
فيروز تبتسم وتهز راسها انها موافقه يطلع باسم وتحط فيروز اديها على خدها وتضحك من جواها قوى ((ياااااه على الدنيا يخلق من الشبة 100 بس سبحان الله اسلوبه وكلامه تصرفاته .....وتبص لاسمه تانى باسم رشدى وتكلم نفسها انا شوفت الاسم دا قبل كدا فييين .؟؟؟......وتغمض عيونها للحظات وتفتكر ان وراها شغل تقوم جرى بس الاول تاخد ورقه وتكتب عليها ((متأسفه جدا بس لازم امشى .....فرصه سعيده جدا )) وتحطها على المكتب وتنزل يلمحها باسم وهى خارجة من باب الجريدة ينزل وراها ويركب عربيته ويمشى ورا عربيتها !!!!!! توصل فيروز الشركة تدخل وتسلم على موظفين الرشيبشن
وتدخل على مكتبها ...يدخل باسم وراها ويروح لاحمد موظف الرسيبشن ويسأله
باسم : لو سمحت حضرتك .
هى الانسة اللى داخلت من شوية تبقى مين
احمد : اى خدمة يافندم
باسم : لا كنت بسأل اصلى بشبهه عليها
احمد : دى الانسة فيروز مديرة العلاقات العامة هنا ....
باسم يبتسم : متشكر جدا
ويطلع يركب عربيته ويروح تانى على شغله
***********************************
فيروز قلقانه ان سراج مجاش وتليفونه مقفول ((اصلها بتقلق جدا بتحس ان الموبايل مقفول معناها ان فيه كارثه ))
تدخل عليهم اسماء ((فاكرينها هى ورقيه اللى شمتوا فى سلمى لما بابا اتقتل ))
تقرب اسماء من فيروز : صباح الخير
فيروز تبصلها بطرف عينها : صباح النور .....خير يااسماء محتاجة حاجة
اسماء : لا
فيروز : امال قايمة من على مكتبك ليه
اسماء : عادى كنت بتمشى وقولت اصبح عليكى ....وتبص حواليها الله هى سلمى لسه منزلتش ....ألا صحيح عاملة ايه دلوقتى ....قلبى عندها وصليلها سلامى كتيير
فيروز تحط القلم على الورق بزهق وتبصلها : يوصل اى اوامر تانية حضرتك
اسماء : لا مرسييي سلام
سماح تبصلها : يابااااااااى على دى بت أتمة بشكل عارفه ساعات بدعى ان ربنا يوريهم يوم اسود عشان يعرفوا ان الله حق
فيروز : حرام عليكى متدعيش على حد ربك بيمهل ولا يهمل وكل واحد ليه يوم
وتنادى على عم محمد يجبلها واحد شاى بحليب
****************************************
فى الوقت دا زينات فى اوضتها فى المستشفى بتفطر هى وسلمى ......سلمى عماله تضحك فيها وتأكلها .....يدخل الدكتور يوسف بتطمن على صحتها ويقيسلها الضغط
دكتوريوسف يبتسم : عال عال دا احنا بقينا تمام خالص
زينات : يعنى ممكن اخرج .....انا زهقت من قعده المستشفى بجد نفسى ارجع بيتى
دكتور : طبعا لو حابه من دلوقتى .....بس هو انت زهقتنى مننا ولا ايه ويبص لسلمى : ماتقولى حاجة ياسلمى
سلمى : لا طبعا مين يقدر يقول كدا ....بجد حضرتك عملت الواجب وزياده
الدكتور : مامتك فى عنينا ......وبجد قعدتها جميلة جدا انا لما كنت اكون متضايق احب اجى اقعد معاها ونفضل نحكى .....ربنا يباركلك فيها
ويستأذن سلمى انه عايزها على جنب
دكتور يوسف : سلمى مامتك اتحسنت كتير عن الاول ......بس هى لسه محتاجة عنايه شديدة حاولى متخليهاش تتعرض لاى انفعال او اى ضغط عصبى ......اقولك حاولى تاخديها وتخرجوا تغيروا جو فى اى حته .....وياريت قبل ما هتروح البيت تشيلى اى حاجة ليها علاقة بوالدك وتحاولى تغيرى فى البيت ...طبعا مش هوصيكى البنات دايما ليهم لمسات ذهبية .........مامتك مرت بأزمة كبيرة جدا وانا بحمد ربنا انها قامت بالسلامة ارجوكى شليها فى عنيكى ياسلمى
سلمى عيونها تدمع وتبتسم وتهز راسها وتاخد بعضها وترجع على الاوضه
*********************************************
منة توصل البيت تفتح الباااب واول ماتدخل ........

مش هقولكم ههههه المرة اللى جاية هنعرف ايه اللى حصل


هناك 23 تعليقًا:

همسات وبحــ الحياه ــر يقول...

كل سنة وانتم طيبييييييين

عايزة تقولوا رأيكم بصراااااحه

بجد رأيكم بيهمنى وبيفتحلى افكار جديدة

علفكرة انا مبكتبش القصه كدا صدقونى كل كلمة فى القصه وراها مغزى وليها هدف
اتمنى انه يوصلكم زى ماانا عايزة

بحببببببكم فى الله

Mona Hekal يقول...

شاطرة الحلقةدي هدية العيد انا لسه ماقريتش بس قلت من نفسي الحق اول تعليق
هاقرا و ارجع

همسات وبحــ الحياه ــر يقول...

معلش بقى الحلقه طويييييلة

بس اعمل ايه

بحاول اطولها عشان اخلصها بدرى قبل امتحاناتى

همسات وبحــ الحياه ــر يقول...

منمونتى

منوراااااانى دايما

مستنياكى

Mona Hekal يقول...

ايه ده ايه القفلة دي اتي بتهزري
ماشي يا سيتي امرنا لله نستحمل لحد ما ربنا يكرمك و تحني علينا بالحلقة الجايه .

طبعا كالعادة الحلقة حلوة جدا و الدنيا كده بتوسع مننا كده عمرو يطلع باسم و فيروز تاخد مقلب بس اللي جاي انا متوقعاه.
اما عن ياسر ياريت ميضربش منه كفايه اللي هي فيه و ياريت قلبه يلين شويه ربنا يهديه
ايه رايك بقي راي وافكار زي ما طلبتي بالظبط :)
كل سنة و انتي طيبة و بالف خير

همسات وبحــ الحياه ــر يقول...

هههههههههه
شوفتى بقى
برضو مش هقولك ايه اللى هيحصل
كل سنة وانت طيبة

زينب علي حبيب يقول...

حلقتييييييييييين مرة واحدة

يا حلااااااااااااااااااااااااوة


بس ياسر دا معندوش شخصية

اففف نرفزني اناني ومحب للامتلاك بشششكل الله يهديه :(

بانتظار التكملللللة و طوليييييييييييها :)

ويا رب تخلصيها قبل امتحاناتك ياااااااااااا رب :)

ترانيم يقول...

اجمل شىء لما تقرى قصة انك تحسى بأنك وسط الاشخاص وانك شايفة اللى بيحصل قدامك كأنه عرض تلفزيونى مش قصة مكتوبة واسلوبك فعلا حسسنى بالاماكن وحسسنى انى شايفة الاشخاص

عمرو يسرى يقول...

اولا اعتذر على غيابى الفتره الماضيه
ثانيا طبعا حلقه جميله جدا
بس بقى باسم هيطلع عمرو وفاقد الذاكره ولا ايه وطبعا منه اول ماتدخل هتلاقى ياسر ويحصل خناقه من المعقد ده صح

جايدا العزيزي يقول...

حلوووووووه اوووووووووى ياقلبى

خلاص بقيت مدمنه قصصك

يسلم احساسك


كل عام وانت بخير

كل عام وانت الى الله اقرب

وعلى طاعته ادوم

عيد اضحى مبارك

اعاده الله عليك وعلى امة نبينا محمد

بالخير واليمن والبركات

عيد سعيد

تحياتى

gogo!sf يقول...

كل سنه وانتى طيبه يا قمر

وعيد سعيد عليكى وعلينا جميعا

غير معرف يقول...

جميله موووووووووووووت
ديدي

Dr/ walaa salah يقول...

كل سنه وانتي طيبه يا احلى همسات في الدنيا


والله بجد قصتك رووعه وانا بسرح قدامها

عارفه يا هموسه احلى حاجه انك وسط الحكايه دايما بتفكرينا بالاشخاص وهما عملوا ايه قبل كده


بجد انتي روووعه


الاحداث المره دي جميله بس بيني وبينك انا خايفه على منه اوي

يا تري ياسر المريض ده هيعمل فيها ايه؟

ツSmiLeY AnGeLツ يقول...

يعني لازم كل مرة تعملي فينا كده
تشوقينا للمقطع المهم تقطعي
بس بجد حلوة اوي مفيهاش شي يتعاب
تحفة
مستنية الجديد
كل سنه وانت طيبة وينعاد عليك بالصحة والعافية
تقبلي مروري
سلامي لااجمل وارق بنوتة.

Carmen يقول...

صعبان علي اوي منة
:‏(‏(( ربنا يستر
كل سنة وانتي طيبه حبي
عيد سعيد عليك
ماتتأخريش عشان بتوحشينا

Ramy يقول...

كل سنة و انت طيبة

و السنة اللى جاية نكون بشوف دة مسلسل

(:

يا رب

محمود نشأت يقول...

و انتى طيبه يا رب و ياااااا رب يكون عيد سعيد عليكى و على كل المسلمين

و شكرا ليكى اوى

mrmr يقول...

يالهووووووووووووى
منه دى نهارها مش فايت
ربنا يستر عليها
بس حاسه ان ياسر ح يتغير بعد الحادثه بتاعك يسرى وعشيقته
منتظرين باقى التشويق
كل سنه وانتى طيبه
عيد اضحى سعيد

حياة يقول...

بصي معرفش ليه بس عندي امل كبير في حكاية ياسر ومنة ..
اصلي حاسة انه انسان كويس بس ديدي هي اللي خلته كدة ..
اما الباقي كله تمام معنديش تعليق عليه
تحياااااتي :)

Sahar Elgafary يقول...

بسم الله والصلاة علي رسول الله
متابعين ياقمر
ده أيه الأحداث دي كلها...يا خبر
أنتي تنفعي سينارست..بس بجد هاتنقط..
خلصيها بقه.

اسماء عبدالعزيز يقول...

حبيبة قلبي الكاتبه الواعده توته
القصه جميله جدا جدا
وطويلة ياتوته وياريت تفتكرى كلامنا
يسكر
؟
؟
؟
طمنيني عنك وسلامي لماما كتييييييييير
كونى بخير
وكل عام وانت بخير حال

Noha Saleh يقول...

بجد جميلة اوى
بس بصى بقى المرة الجاية عاوزة الحلقة بمقام 3 حلقات
بجد بستمتع جدا وانا بقراها

غير معرف يقول...

رووووووووووووووووعه
ياتووووووووتى بجد
ماشاء الله عليكى

ايثو