الأحد، 12 ديسمبر 2010

غروب الحب (ح 14)


عرفنا الحلقه اللى فاتت ان محمد كان قلقان جدا علي منه بعد مااتصلت عليه وحكيتله ازاى هى عايشه معاه بوحشيته وهمجيته ودكتاتوريته ازاى مبيحسش بيها وكل حياته معاها اوامر وضرب واهانه وكانت بتترجاه انها نفسها ترجع مصر مش قادره تستحمل اكتر من كدا وعرفنا ان ياسر شافها وهى بتكلم محمد وحصل خناقه كبيرة بينهم وصلت انه ضربها وبهدلها وجيرانها فضلوا مستغربين ومتضايقين نفسهم يعملوا حاجة لكن ماباليد حيله
وعرفنا ان كريم كلم يارا وحكالها على قصه حبه القديمه وانها فشلت وانه اتجرح وانه بجد حب يارا من اول مرة شافها وفضل يتكلم معاها .....يارا هى كمان حكيتله انها بتخاف من الحب وانها مش ناوية تحب حد وفضلوا يتكلموا لكن فى الوقت دا يارا حست بحاجة غريبة وبالفعل بدأ قلبها يحس بكلامه وعرفنا ان يارا حكت اللى حصل لميسون بنت خالتها وميسون معجبهاش الوضع ونصحتها لكن فى نفس الوقت فكرت فى فكرة وقررت انها تنفذها عشان تثبت فعلا صدق كلامه
وعرفنا ان سلمى وزينات طلعوا من المستشفى وراحوا عند فيروز عشان يقعدوا معاها وبالفعل سلمى وفيروز رحوا لبيت سلمى وجابوا حاجاتهم اللازمة .....
***************************************

تعالوا نعرف ايه اللى حصل النهارده .................


نواره مامه سراج قاعده على الكنبه قدام باب البيت وعماله تكلم نفسها تدخل عليها نرجس وتستغرب جدا
نرجس : انت بتكلمى فى نفسك يامرات خال!! .......ونواره مبتردش وتنادى نرجس تانى ....مرات خال !
نواره تبصلها نرجس تحط اديهاعلى كتفها وبصوت حنون مالك يامرات خال
نواره تتنهد : قلقانه جدا على سراج قلبى واكلنى عليه قوى بقالوا كتير مكلمنيش ولاطمنى عليه ...قلبى بيقولى ان في حاجة قومى هاتى الموبايل اطلبهولى
تقوم نرجس تجيب الموبايل وتتصل على سراج واول مايرد تدى التليفون لنواره......فى الاول نواره تعاتبه وسراج يتحجج بالشغل وميرضاش يقولها انه كان تعبان عشان متقلش عليه وبعد ماتطمن على صحته وتوصيه انه ياخد باله من نفسه ولو احتاج حاجة يتصل عليها ...تدى الموبايل لنرجس عشان تكلمه لكن نرجس تتلخبط ومتعرفش تقولوا كلمتين على بعض ونوراه عماله تغمزها انها تنطق
تكلم نفسها غريب امرك يا نرجس المره اللى فاتت اتكلمتى معاه كتير من غير كسوف المره دى معرفتيش تتكلمى ياترى هو الحب بيخلى الواحد يسكت كدا !!!!
تفوق على صوت سراج بيقولها : الو ...ويقفل الخط
ساعتها نواره تشخط فيها : انت يامدهوله على عينك مش عارفه تتلحلحى بكلمتين على بعض زى الناس
نرجس : الله بقى يامرات خال .....وبعدين انا حاسه انه ولا على باله يعنى اعمل ايه ...شكل كدا فيه واحده من بنات مصر لافت عليه
نواره : عشان انت خايبه الراجل عايز ايه غير الدلع والمياصه والكلام الحلو ودا طبعا مش هيلقيهم غير فى بنات مصر جاتك نيله خليكى كدا لغاية مايروح منك
نرجس عيونها تدمع وتهز راسها وتبتسم ابتسامه خفيفه


ميسون فكرت انها لازم تسلط على كريم واحده تجيب قراره وقعدت تفكر تكون مين ملقتش غير نانى صحبتها جريئه وجدعه وميتخفش عليها وفهمتها الموضوع واكدت عليها انها متقولوش انها اكبر منه عشان تشوف رد فعله وبعد فتره جت نانى وحكتلها على اللى حصل ....انها حاولت تتكلم معاه على الموبايل على اساس ان الرقم غلط ولقيته لضم معاها وفضل يكلمها وقالها نفس الاسطوانه اللى قالها ليارا واتفق معاها انهم يتقابلوا ....
نصحت نانى ميسون انها لازم تبعدها عنه لانه مش بتاع حب دا واحد عايز يقضى يومين وخلاص وانه من النوع اللى ميحبش حد يقولوا لا ولو حصل دا يبقى جنى على نفسه يفضل وراه لغاية مايعرفه مين كريم دا ...... ميسون اتضايقت جدا وشكرت نانى على اللى عملته ومشيت وهى مقرره انها لازم تروح ليارا تقولها
***********************************

فى الوقت دا يارا قاعده بتتكلم مع كريم وبتحكيله عن حياتها يسألها كريم : بتحبينى يايارا ؟؟ ساعتها ترتبك ومتعرفش ترد لكن تقولوا
يارا : متقدرش تسميه حب يعنى اانا معرفكش غير من وقت قصير لكن ارتحتلك جدا وبقيت احب اسمع صوتك كل يوم

كريم : طب ياريت مش تطولى عليا لانى بجد نفسى اسمع الكلمة دى منك انت وبس....عارفه يايارا انت خطفتى قلبى من اول لحظة بجد مش عارف اقولك ايه لكن الايام هى اللى هتثبتلك يارا انا بحبببببك قوى!!!!

يارا قلبها يدق وتغمض عيونها وتحس ان الدنيا مش سايعاها وكريم عمال يتكلم وهى سرحانه فى كلامه فى الوقت دا تدخل عليها ميسون ووشها عليه ملامح حاده لكن تحاول تخفف حدتها عشان يارا تستوعب كلامها يارا اول ماشافتها قفلت مع كريم
ميسون قربت منها وسألتها : كنتى بتكلميه
يارا تاخد نفس كبير وتبتسم وتهز راسها ميسون تقعد على السرير وبصوت حنون : ممكن يايارا تيجى تقعدى جنبى وتسمعى كلامى كويس قوى
يارا تبصلها وتحس ان فيه حاجة وتروح تقعد جنبيها .......ميسون تحكلها على كل اللى حصل بالحرف لكن يارا متصدقش وتكدب كلام نانى لكن فى نفس الوقت حاسه ان قلبها فيه خنجر ......تحاول ميسون تفهمها ان دا مينفعش وانها لازم تصحصح لنفسها شويه ومش اى حد يقولها كلمه حلوة تفتح قلبها وتصدقه .....وياارا مازالت بتقاوح معاها ساعتها ميسون تزعق فيها


ميسون : ماتفوقى بقى هو لحسلك دماغك ولا ايه وبعدين انا ولا نانى هنكذب عليكى ليه وهنستفاد ايه انت عارفه انى اكتر واحده تتمنالك السعاده وانا معملتش دا غير عشان عايزة بجد متديش قلبك لحد غير اللى يستهلك ....وانا كنت عارفه انك هتكذبينى عشان كدا خليتها تسجل المكالمه اتفضلى اسمعى بودانك اخر مكالمه بينهم عشان تتأكدى انه انسان واطى ......

يارا عماله تسمع وعيونها مدمعه وحاسه انها مجروحه قوى وتبكى بحرقه وبصوت موجوع : كفايه اقفلى مش عايزة اسمع حاجة تانى ..........وتترمى فى حضن ميسون وتفضل تعيط تمسح ميسون على راسها وتحضنها جامد خليكى قوية واوعى تردى عليه وانت ضعيفه كدا ولا تحسسيه انك هتموتى عليه .....بصى لمستقبلك بكره تخشى الجامعه وصدقينى هياخدك اللى يستهالك بجد وترفع راسها وتمسح دموعها وبإبتسامه : قومى اغسلى وشك ويلا خلينا نخرج شوية


تصحى فيروز الصبح بدرى تستغرب ان سلمى مش جنبها تقوم تلاقيها فى البلاكونة قاعده بتقرأ فى المجله وبتشرب قهوة تيجى فيروز من وراها وتخضها وتفضل تهزر معاها وتروح على المطبخ...... زينات واقفه بتحضر الفطار ودموعها على خدها واول ماتحس ان حد داخل تمسع دموعها بسرعه ....تدخل فيروز وتصبح عليها
فيروز : ايه ياست الكل تاعبه نفسك ليه روحى ارتاحى والفطار يجيلك لغايه عندك

لكن زينات تفهمها انها مرتاحه كدا وتقول لفيروز انها تزن تانى على سلمى انها تنزل الشغل مينفعش قعدتها كدا لازم تشغل نفسها بحاجة
فيروز تقولها حاضر وتروح لسلمى عشان تقولها
لكن سلمى رافضه انها ترجع هى مش حمل كلمه ولانظره من حد
فيروز تفهمها انها لازم تكون قوية وان سواء دلوقتى او بعدين فهى لازم هتمر بالمواقف دى اللى هتسمع فيها كلام يضايق ونظرات توجع ونصحتها انها لازم تكون جبل ميتهزش ولاينهار مهما حصل وان هروبها وضعفها دا هو اللى هيفتح المجال للى يسوى واللى ميسواش انه يتكلم.....وفضلت وراها لغايه مااقنعتها وبالفعل قاموا عشان يلبسوا ونزلوا سوا اشتروا الجرايد من عم سيد زى كل يوم وطلعوا على الشركه

**********************************

فى الوقت دا منه قاعده فى الصاله وعماله تعيط وتعض فى صوابعها وبتفكر ازاى تخلص من الورطه اللى ورطت نفسها فيها وتفضل تخبط على وشهاوبحرقه : انتى السبب غبيه! جريتى ورا الفلوس وافتكرتى انها هتعملك اللى نفسك فيه !! انبهرتى بالسفر والعيشه الهاى وافتكرتى ان الفلوس هتبنى السعاده !.........يارتنى سمعت كلامك يامحمد يااااااااارب انا عملت ايه عشان تعاقبنى كدا ؟ ايه الذنب اللى عملته عشان اعيش مع واحد حيوان زى دا ؟ بس ترجع تستغفر وتدعى ربنا انه يخلصها......وفجأه تقوم جرى على مكتب ياسر وتفتح كل ادراجه وتقلبهم لكن متلاقيش اللى بتدور عليه .......وتجرى على اوضتها تفتح ادراج التسريحة وتقلبهم على الارض .....وتفتح الدولاب بتاعها وتنزل هدومها كلها وتفتح دولاب ياسر وتنزل هدومه كلها وبرضو مش لاقيه حاجة وتفضل تشيل فى الهدوم وترميها على الارض بإنهيار ...... وتاخد بالها من الصدوق اللى فى الدولاب تحاول تفتحه ميرضاش وتفضل تخبط فيه وهى بتعيط وتروح على المطبخ وتفتح الدرج بلهفه وتاخد منها سكينه رفيعه وتجرى على الصندوق وتفضل تحاول مرة واتنين وتخبط فيه حاسه ان دا اخر امل ..... لغايه مايتفتح ساعتها تفضل تفتش فيه لغاية ماتلاقى الباسبور تفضل تضحك وتعيط وتبوس فيه وقررت انها تلم حاجاتها عشان تسافر ....... لكن تلاقى حاجة غريبة

يااااااااترى ايه هى وياترى منه هتعمل ايه

دا اللى هنعرفه الحلقه اللى جاية ^_^








هناك 23 تعليقًا:

همسات وبحــ الحياه ــر يقول...

بجد وحشتووووونى كتيييييير والله

عارفه انى مقصره فى حقكم بس بجد مبفتش فايضه انى اكتب حاجة

عارفين والله انا كنت قررت فعلا انى مكملش خالص وافصل كل قصه لوحديها بحيث ان هدف كل شخصيه يوضح لكن عشان خاطركم ولانى بحبكم فى الله كملتها وكتبت حلقه جديده

بس ادعولى بقى اكمل ^_^

وادعولى امتحاناتى يوم 1/9 :(:(:(


اتمنى ان الحلقه تنال اعجابكم
وعايزة رأيكم بصرااااااحه مااااشى


اختكم

تغريد احمد

Carmen يقول...

انتي وحشتينا اكتر ياحبيبتي
الحلقة الجديدة نزلت الحقلة الجديدة نزلت
جميلة جدا جدا جدا والاحداث بقت سخنة اوي قوليلي في ودني نهايتها ايه ^_^
تسلم ايدك حبي

ツSmiLeY AnGeLツ يقول...

مساء الفل على اجمل وارق بنوتة
ازيك ياقمر
يارب تكوني بالف خير
ويوفقك بامتحاناتك
اقول الصراحة ولا لا
خلاص مش بقول
لا بقول
بجد بجد بجد
حلقة جميلة
يارب تقدر تهرب منه من ياسر وترجع لاخوتها
تقبلي مروري
سلامي لاجمل بنوةت ولارق قلم خط اجمل القصص والحكايات.

Mona Hekal يقول...

حلوة طبعا يا توتا و انتي عارفة رأي قبل كده :))
و شكرا انك كملتيها و رجعتي عن فكرة فصلها كده احسن
وربنا معاكي ان شاء الله
و براحتك احنا هانستني هاتروحي مننا فين

Noha Saleh يقول...

يااااااااااااااااااااااااااااااااااااااااااااااااااااااااااااه
بجد شكرا امنك كتبتيها انا كنت متغاظة منك اوى
وكمان كنتى عاوزة ماتكمليهاش
بصى بجد ماينفعش لازم تكملى
انا هستنى بقى اشوف منه لقت ايه فى الصندوق وكمان يارا هتعمل ايه وياسر كمان حصله ايه بعد ماضرب منه علشان انتى ماجبتيش سيرته خالص
ربنا يكرمك فى امتحاناتك

شمس النهار يقول...

ماصدقتش لما لاقيت في القائمه حلقه جديده

اخبار الامتحانات والاستعدادات ايه

يارب خير

طبعا الحلقه جميلة
والقفله مشوقه
ربنا معاكي

:))
وبالنجاح

سندباد يقول...

جو المدونة مع الموسيقي مع القصة مع الصور وداني دنيا تانية خالص
احسنتي
وفي انتظار المزيد من ابداعك
القصة احلوت اوي صراحة
تقديري واحترامي

صيدلانيه طالعه نازله يقول...

جمييييييييييله اوى يا تاتا
موقف ميسون من يارا صاحبتها موقف رائع و جميل
ياريت كل الاصحاب يبقوا كده مع بعض و متبقاش فيه غيره بينهم ابدا
ربنا يوفق منه و تقدر تحل مشكلتها مع ياسر
مستنيه الحلقه الجايه
اسلوبك رائع حبيبتى
و ادينى مستنيه و حتابع ان شاء الله

تحياتى

غير معرف يقول...

توتى
وحشتينى كتير
اخبار المذاكرة ايه ؟؟
الحلقه جميله اوى
ركزى انتى بس فى المذاكرة واحنا مستنينك
ربنا معاكى

غير معرف يقول...

حلوة اوي اوي اوي يا توتة
ديدي

rasha يقول...

ربنا معاكى يا قمر وان شاء الله كدة ربنا هيوفقك كدة فى الامتحانات
احنا برده مستنين الحلقة اللى جاية انتى كل مرة تشوقينا كدة

اسماء عبدالعزيز يقول...

توتا الجميلة
وحشتينى ياقمرى
انا قريت الاعترافات يسكر زى مانتِ دائما
رائعه بكل المقاييس
اما الحلقه دي جميلة اوى بانتظار الباقى ياقمرى
دمت بحب

موجة يقول...

مممممممممممم
جميلة الحلقة دى
وعندى بقى تعليق فى صالحك طبعا يالا سيدتى الجميله
انا طبعا فقالى فترة مش متابعة
لكن لما قريت البوست ماحسيتش ان فاتنى حلقات
وده طبعا نتيجة اسلوبك الواضح والجميل والشيق
دام قلمك

جايدا العزيزي يقول...

اجمل حلقه فى القصه

شدتنى من اول كلمه لاخر كلمه

وهموت واعرف ايه اللى حصل

بسرعه

تحياتى

شوية قهوة يقول...

انتي وحشانييييييي جدا بجد
والغيبة طويلة اوي مينفعش كدة
القصة تحفة واوعي تفكري انك توقفيها
وربنا ييسرك الامتحانات ولينا انا كمان هبدا على اول واحد
ربنا يستر :)

miroooo يقول...

جميله الحلقه
منتظرين الحلقه الجديده
ربنا معانا ومعاكى فى الامتحانات يارب
وكل عام وانتى بالف خير

Dr/ walaa salah يقول...

اجمل حاجه المره دي ان يارا عرفت حقيقة كريم

بصراحه كنت خايفه عليها اوي

وكويس ان منه لقت الباسبور

ربنا معاها يارب

منتظره الحلقه اللي جايه بفارغ الصبر

لــــ زهــــــراء ــــولا يقول...

يالهووووي شوقتيني لاقت ايه هه؟ لاقت ايه؟

صورة تشبه صورتها البنت اللي كان ياسر بيحبها وعشانان الشبه اربط ب منه؟ ولا ياسر طب فوق دماغها ياااااااااااه ...


انا مضايقة من كريم وعايزة اديله بوكسين ممكن توصلهومله؟

اسلوبك اكثر من رااااااائع انا كنت ناوية اقوم واكمل كمان شوية لاقتني بخلص الحلقة لاخر حرف !!!

لولا

Unknown يقول...

السلام عليكم

أقدر بصدق أختي الكريمة ثقتك في رأيي.. وإن كنت لن أضيف جديدا على آرائي العامة السابقة.. بينما لن أقدر على إبداء رأي في الحبكة والشخصيات إلا بانتهاء الرواية لمعرفة المسار الكامل لكل شخصية، وللأسف حتى الآن أعجز عن غيجاد الوقت لقراءة الحلقات الأولى التي فاتتني؛ فما شاء الله أنت غزيرة الإنتاج في الكتابة :)

لكن هناك أمر أود لو تدرسينه: كتابتك للعمل بالعامية يؤهله في رأيي لمحاولة صياغته كسيناريو سهرة إذاعية (أو مسلسل).. إيه رأيك؟

تحياتي أختي الكريمة مع تقديري لثقتك مرة أخرى.

زينب علي حبيب يقول...

مينفعش أفضل متشوقة كدا :(


ايه اللي هيلفت نظرها يا ترررررى؟

Unknown يقول...

وحشتينى موووووووووووت ووحشنى حكاياتك الحلوة فتنى كتير بس هقراهم كلهم ان شاء الله

yasmina يقول...

توتة وحشتيييينى كتييييييييييييييييييييييييييييييييييييييييييييييييييير اوى بجد حقيقى

كان نفسى اكمل معاكى قصتك بس غصب عنى والله يا قمر

تحياتى ليكى دايما سلام

المصوراتي يقول...

اتمني ان تقبل مروري الاول بمدونتك
و يشرفني ايضا ان تزور مدونتي المتواضعه ( عيوني كاميرا )