الأربعاء، 13 أكتوبر، 2010

الحقيقه المرة (ح8)



عرفنا الحلقه اللى فاتت ان فيروز عرفت ان بابا سلمى اتقتل وسابت الشغل وراحت لبيت سلمى واول ماوصلت سمعت زعيق زينات وصريخ سلمى وعرفنا ان زينات صرحت بحقيقه ابوها اللى هى لغاية دلوقتى مش مصدقاها وعرفنا ان حصل شد بين سلمى ومامتها ومامتها تعبت وراحت المستشفى وعرفنا ان كريم بيشاغل يارا اخت منه وداخل فى دور الحبيب ويارا قلبها عايز يصدقه لكن عقلها مش مطاوعها وعرفنا منه صحيت ملقتش اكل فى البيت وراحت عشان تجيب فلوس من ياسر لقت مصيبه ........

تعالو نشوف ايه اللى حصل

منه تدخل المطبخ تفتح التلاجة تلاقيها فاضيه تقفلها بزهق وتروح على الاوضه تفتح الدولاب عشان تجيب فلوس وتنزل تشترى تلاقى المحفظه فاضيه تروح تركب فيشه التليفون عشان تكلم ياسر وتشوف هتعمل ايه ان كان يجبلها او هى تنزل
يرن موبايل ياسر مره واتنين يبص يلاقيه رقم البيت .

ياسر : روحي صباح الخير
منه بزهق : صباح النور ازيك
ياسر : بخير ياعمري انا
منه : مصحتنيش قبل ماتمشي
ياسر : محبتش اقلقك خير فيه حاجه
منه : كنت عايزاك تجيبلي شويه طلبات
ياسر : انزلي اشتري اللي انتي عايزاه
منه : ماهو ....... ومتكلمتش كلامها
ياسريقاطعها : سلام دلوقتي ..
منه : طيب مقولتليش اعمل ايه
ياسر : بعدين .......
منه بإستغراب : سلام يا ياسر سلام

وتقفل السماعه وترفعها تاني عشان تكلم محمد تفتكر ياسر وتحذيره ليها
وتقفلها بزهق وتشيل الفيشه تانى وتلبس عشان تروح تاخد فلوس تشتري طلبات وبالمرة تجيب كارت وتكلم محمد
توصل منه لشركه ياسر وتطلع علي مكتبه تشوفها السكرتيره تتلخبط وتقوم وبربكه
السكرتيرة :اهلا اهلا ازيك مدام منه عاش من شافك
منه : بخير الحمد لله .......بقولك ايه ياسر جوه
السكرتيره : ايوه بس في ميتنج
منه : يعني مش جوه طيب علي العموم هادخل استناه
السكرتيره : لالا حضرتك استني هنا اصل الميتنج جوه في المكتب ومحرج عليا محدش يدخل
منه : هو انتي اتجننتي هو انا حد وبعدين مالك مش علي بعضك هو في ايه .
وتروح منه علشان تدخل المكتب تجري السكرتيره وتقف علي الباب وبتوتر :: علشان خاطري متسببليش مشاكل
منه : لما يبقي يزعقلك هقوله انا اللي قولتلك .. وسعي بقي .
تفتح منه الباب وتتصدم من المنظر اللي شافته تلاقي ياسر علي الكرسي وواحده قاعده علي المكتب وبضحكوا
واول ماياسر يشوف منه يقف مندهش من وجودها واللى كانت معاه تاخد شنطتها وهى خارجه تبص لمنه وتبتسم وتبص لياسر : اشوفك وقت تانى عشان نخلص شغلنا منه قلبها فيه نار وعيونها تدمع ومش قادرة تعمل حاجة نفسها تمسك حاجة وتموت بيها ياسر تبصله بإستحقار
منه : حلو اوي الميتنج ده يااستاذ
ياسر : انتي ايه اللي جابك هنا .
منه تمشى 6 خطوات وتقف قدامه : جاي اشوف البيه المحترم وعمايله تقدر تقولي اسمي المنظر دا ايه
ياسر : سميه زي ماتسميه ويمسك ايديها جامد ولو مش عايزه تشوفيه تاني متجيش هنا خالص
منه متردش وتاخد بعضها وتمشي والدموع علي خدها
يقعد ياسر علي الكرسى بزهق اصلها نقصاكي انتي كمان ياشيخه روحي

***************************************************
فى الوقت دا كانت سلمى اخدت القرار انها لازم تروح للظابط وتفهم منه كل حاجة وتشوف الاجراءات
***************************************************
طبعا فى الشركه محدش متخيل ولا مصدق الكلام اللى مكتوب فى الجرائد لكن اسماء ورقيه (شمتانين فيها لانهم مبيحبوهاش)
سراج : ياجماعه احنا لازم نروح
كلنا نعزى سلمى بعد الشغل ان شاء الله
سماح : مش عارفه ياسراج المفروض نروح ولا نستنى لما الامور تهدى شوية
ممدوح : طبعا لازم نروح ونقف جنبها ونواسيها ولو احتاجت حاجة احنا اخواتها
اسماء تبتسم بسخريه : ياحرام ...... وحياتكم ابقوا خدونى معاكوا اصلها صعبت عليا اوى
منى تبصلها بإستحقار : ميصعبش عليكى غالى ياحبيبتى ابقى حصلينا انت ...والافضل انك متروحيش
سراج : لاحول ولا قوة الابالله احنا فى ايه ولا فى ايه يااسماء انت ورقيه حسوا بالناس شوية يعنى دا لو حصلك او حصلها كان موقفكوا ايه ياريت كفايه لحد كدا
تقوم اسماء ووراها ورقيه وقبل ماتخرج من المكتب تبصلهم : احسن برضو ان عنيها اتكسرت علشان متتفرعنش علينا تانى
ممدوح يخبط كف على كف : انا لله وانا اليه راجعون



****************************************************
توصل سلمى للظابط وتدخل وقلبها يبدأ يدق وماشية بالراحه لغايه ماتقف قدامه يبتسم الظابط : اتفضلى اقعدى
سلمى بإبتسامه خافته : اسفه لو ازعجت حضرتك بس بجد اانا نفسى اعرف كل حاجة عن الحادثه
الظابط : تقصدى حادثه يسرى
سلمى : اكيد ...... انا دماغى هتتفجر من التفكير مش متخليه اللى قريته او سمعته
الظابط يتعدل فى قعدته : بصراحة مش عارف اقولك ايه هى التحريات لسه شغاله بس الطب الشرعى اثبت ان باباكى اتوفى نتيجه ضربه على دماغه وطلقه رصاص والمجنى عليها مخنوقه ........على حد شكى كدا ان الجانى كان له علاقه بالمجنى عليها .......... باباكى كان على علاقه بالست دى من فترة و كان بيتردد كتير على كازينو ليلتى وكان له علاقات كتير هناك و .........والمجنى عليها ياستى تبقى صاحبه الكازينو مطلقه ودى كنا مراقبينها من فترة كان فيه شك انها بتتاجر فى المخدرات بس للاسف ممسكناش عليها حاجة وعلاقه باباكى بيها خلانا برضو نحطه تحت المجهر لان كان اكيد هو اول الخيط واهى نهايتهم زى ماانت شايفه ......نهاية السكة دى ياما القتل ياالسجن

سلمى بتسمع الكلام دا ودموعها تنزل وقلبها يصرخ مش ممكن وتقوم من غير حتى ماتستأذن
وتخرج بتجر رجل ورا رجل وحاسه ان الدنيا بتلف بيها مش مصدقه ودانها كانت فاكره انها لما تروح للظابط هيكذب كلام مامتها لكن خلاص انكشف كل حاجة حاسه انها فى كابوس فظيع نفسها تصحى منه نفسها حد يقولها انت بتحلمى متصدقيش اللى بيحصل وتاخد بعضها
وتركب تاكس وهى مش فى وعيها
السواق : على فين ياهانم
سلمى متردش السواق يبصلها ويعلى صوته شوية : على فين ياانسه
وبرضو سلمى مبتردش ودموعها نازلة
سلمى تكلم نفسها بصوت مسموع: مين يصدق رجل المثل والقيم يتقتل مع عشيقته منظمة اكبر شبكه دعاره لا مش بس كدا دا كمان بتاجر فى المخدرات
السواق يتأثر بحالتها : لاحول ولاقوة الا بالله طيب قوليلى رايحه فين بس
سلمى : مستشفى الهدى
*********************************************
وبعد الشغل يتجمع زمايل سلمى علشان يروحوا البيت يعزوا ولما يوصلوا يتفاجئوا ان الباب مقفول ومحدش جوا يسألوا يعرفوا ان مامتها تعبت وفى المستشفى
رقيه تبص لاسماء : ياحراااام ........ مستحملتش الصدمه
سماح : ماتتهدى بقى انت جايه ليه اصلا علشان تشمتى حرام عليكى ياشيخة
رقيه تبصلها بعجرفه وتديها ظهرها
ويقرروا انهم يروحوا المستشفى

******************************************
سلمى فى التاكس سرحانه صورة باباها قدامها مبتفارقهاش ويوصلوا للمستشفى ويقف التاكس
السواق : هنا يااانسه
سلمى سرحانه
السواق يبصلها : ياهانم احنا وصلنا دى المستشفى اللى عايزه تروحيها
سلمى تبص حواليها ومتردش وتطلع فلوس تدى السواق وتدخل المستشفى وهى مش فى وعيها ولا شايفه حد قدامها عماله تفتكر ابوها وكلام امها وكلام الظابط ويتردد فى ودانها عاش قذر ومات قذر .......نهايه السكة دى الموت واول ماتشوفها فيروز تجرى عليها وبلهفه : طمنينى ايه اللى حصل سلمى مبتردش وكأنها مش شايفاها وفجأه تفقد اعصابها ويغمى عليها وتقع على الارض يتلم الممرضات وويفوقوها واول ماتفتح عنيها تبكى بكاء هستيرى
****************************************
فى الوقت دا يدخل عليهم سراج وزمايله منى وسماح اول مايشوفوا سلمى كدا يجروا عليها واسماء ورقيه واقفين على الباب فيروز تتفاجىء بمجيهم وتبص لسراج بعيون كلها عتاب وتبص لاسماء ورقيه بعيون كلها استحقار اسماء : معلش ياسلمى . ... مش عارفه اقولك ايه البقاء لله فى باباكى ولا شدى حليلك وتماسكى علشان مامتك ولا متزعليش على اللى اتكتب فى الجرائد
فيروز تبصلها وبعصبيه : ممكن تتفضلى تضلعى بره لو سمحتوا ياجماعه مش عايزة حد هنا حرام عليكوا بقى
رقيه : يلا ياسوسو احنا غلطانين خير تعمل شر تلقى
سلمى مش حاسه بحد حواليها وعماله تبكى بإنهيار وييجى الدكتور ويديها حقنه منومة وتنااام واول ماتصحى تتطلب انها تروح لمامتها فى العنايه

**********************************************
تفتح الباب وتدخل وتفضل تبص لمامتها وتقعد على الكرسى وتمسك اديها وتفضل تبوس فيها وتبكى :
سامحينى ياماما ارجوكى انا اسفه بجد بس انت اللى كنتى بتحسسينى انه حد كويس .........ليه كنتى بتدارى ليه مش عرفتينى الحقيقه من الاول كنت عايزانى اصدقك ازاى .........ربنا انتقم منه بس انا مليش غيرك دلوقتى عارفه انك مش سامعانى بس اكيد حاسه بيا قومى يلا وخلينا ننسى الماضى ونفتح صفحة جديدة ونعيش حياه من غير كذب......... عشان خاطرى سامحينى انا عمرى ماهسامح نفسى على معاملتى ليكى انا عارفه ان ربنا هيقومك بالسلامة وصدقينى مش هقسى عليكى تانى انا غلطانه وندمانه على كل حاجة
وتفضل تبوس ايد مامتها وتبكى على حالها شافت المر وهى لسه فى عز شبابهامش لو كانت اختارت صح من البدايه مكنش دا حالها ومن كتر العياط والتعب تنام وهى قاعده وحاطه راسها على السرير


ياترى ايه اللى حصل بعد كدا دا اللى هنعرفه الحلقه اللى جايه :)


هناك 35 تعليقًا:

همسات وبحــ الحياه ــر يقول...

حباااااااااايبى الحلوين

بجد بتوحشونى من حلقه للتانية

انا طولت الحلقه شوية زى ماانتو عايزين انا بحب الديموقراطية برضو :):)

همسات وبحــ الحياه ــر يقول...

يارب كل الحلقات تنال اعجابكم كدا

بحلم باليوم اللى اخلص فيه القصه وانزلها فى كتاب وتتعمل مسلسل :) ياااااااااه

دعواتكم بقى :)

همسات وبحــ الحياه ــر يقول...

بشكر اى حد زارنى وبشكر اى حد شجعنى على كتابه القصه

بحبكم فى الله

عايزة رايكم بصراحة وبدون مجامله

حدفوا طوب ولا يهمكوا :) هههه

سندباد يقول...

اول تعليق الحمد لله
همسات بتعلي كل قصة ونضج بيزيد جدا جدا
احييكي علي صبرك وطولة بالك انا عارف ان الموضوع متعب انك تلمي احداث القصة من غير ما يكون في نقص او حاجة تقع منك
بجد احييكي علي مجهودك الرائع
تحياتي

محمود(باحث عن حب) يقول...

ياااااااااااااااااااااااارب\
يااااااااااااااااااااارب
يااااااااااااااااااااااارب
يا دموع يارب
يتحقق حلمك
يارب
والله نفرح ليكى والله

محمود(باحث عن حب) يقول...

جميله الحلقه دى يا دموع
وادينى جيت

من الاول اهوه
على فكره

انتى كتبتى عندى تعليق فى
مدونه قلبى حبيبى
الحب واقع وتضاد
تعليقك عجبنى خااااااااااااالص
تحيا مصر
!
كل شويه والله اقراه جميل جدا
وبصراحه التعليقات على الموضوع ده
عجبنى خالص كل التعليقات
انتى قافله التعليق على موضوع
السيده عائشه ليه.؟

اقصوصه يقول...

حلوه وااايد :)

موفقه@@

خواطري مع الحياة يقول...

الســــــلام عليكـــــــم
صباح الفل على احلى بنوتة
كل حلقة احلى من تانية
ربنا يوفقك ويتحقق حلمك وتنزل مسلسل
بس بصراحة كاتبة مؤلفة مبدعة والله كلامك بيشدني عشان اقراءة استمري ويارب دائما للامام
تقبلي مروري
سلامي.

الحب الجميل يقول...

صباحك فل يا حبى
سلامه صعبانه عليا اوى من الحقيقه المرة اللى اكتشفتها بعد مقتل باباها
ومامتها اللى فى المستشفى
اوعى مامتها الحلقه الجايه يجرلها حاجه الا ازعل منك يعنى خليها جنب سلمى عشان متبقاش وحيدة
وكمان منه غلبانة خلاص وجوزها دا راجل غبى مش قولتلك موتيه فى القصه بقا وريحينى منه
ههههههههههه
مش مكسوف من اللى حصل والموقف اللى شافته مراته فيه وكل اللى هامه انتى ايه اللى جابك
طيب ما انت مدتهاش فرصه تكلمك فون وسايب التلاجه فاضيه ومفيش فلوس فى البيت وهى هتتصرف ازاى غير كدا
جميييييييييييله
طريقت سردك للقصه حلوة
ويارب عقبال ما تخلص وتنزليها مسلسل
وياريت النهايه تكون يا اما تصلحى حال ياسر دا يا اما يعمل حادثه يا اما يدخل السجن
ههههههههههه
شوفى انتى بقا
حلوة كتير يا حبيبت قلبى
تسلم ايدك
وحشاااااانى كتير

الحب الجميل يقول...

مش سلامة اقصد البنت سلمى
مااااااااشى

Mona Abo - Elso3od يقول...

وبعدين معاكي بقي الحلقة بتخلص بسرعة و بعدين فين الحلقةالطويله دي انا محستش بيها فجأة وانا بقرا خلصت :))
طمع بقي عاوزة اعرف ايه اللي هيحصل و يا ريت زي ما الحب الجميل بتقول مامت سلمي ما يحصلهاش حاجة بلاش نزعة النكد المركب اللي احنا بنحبها
في انتظار الحلقة الجاية

ساسو يقول...

صباح السكر يا سكره
حلقات جميله زي صاحبه المدونه
كلامك يجذب الانتباه اوي
وبجد غايه في المتعه
تسلم ايديكي يا سكره

Dr/ walaa salah يقول...

حلقه جامده يا همسات بجد عيطت فيها

تصويرك رائع للقصه انتي مش مؤلفه وبس دا انتي كمان مخرجه يا بنتي

يلا هاتي الحلقه الجديده ومتتأخريش علينا يا حبيبتي

جايدا العزيزي يقول...

كل حلقه بتقربنى ليكى اكتر

وبكتشف قد ايه عندك احساس

وصبر

وحشانى

وهتابع بقى علشان ما تهربيش منى

يسلم احساسك

ونبض قلمك ياقلبى

miroooo يقول...

السلام عليكم
الحلقه جامده انهارده
بس نفسى مامتها تقوم بالسلامه كده علشان الحلقات يبقى ليها طعم جميل
بس اى حاجه منك هتكون جميله اكيد بس انا باتمنى انها تعيش
الى الامام دائما
استمرى

قطرة وفا يقول...

فيييييييييييييييييييييييييين الحلقة اللي بعدها


الحلقة جميييييييييييلة اوي بجد :)

karmen يقول...

قصة لذيذة جدااااا
اوعدك بالمتابعة باذن الله
تسلم ايدك
تقبلي مروري
¥k¥

داليـ ـ ـ ـ ـ ـ ــــا يقول...

بكتينى يابنتى
الحلقه حززززززززينه اوى
بس مشوقه جدا
على فكره يابنوته انتى تعرفى تكتبى مسلسل جامد اوى وكمان يتعرض على شاشات التليفزيون
يالا فكرى وشوفى حد يكتشفك

تحياتى ياأحلا ضحكة القمر

المدفعجي يقول...

قصه بجد جميله

غير معرف يقول...

حلوة اوي اوي اوي يا روحي
يلا بسرعه بقي عايزة الحلقه الجايه
ديدي

Noha Saleh يقول...

انا مبسوطة علشان الحلقة طويلة المرة دى
ربنا يحققلك حلمك ان شاء الله

خيط الحرير يقول...

بسم الله والصلاة علي رسول الله
هكذا إذا كل توقعاتي باءت بالفشل..أردت للبطل نهاية أفضل من قلة الأحترام والستر..فتوقعت زواجه الثاني...
لكن توصل لهذه النهايه المفجعه...
عافانا الله وكل المسلمين..
في إنتظار حبكتك الدراميه ..حتي النهايه.

iـــــــــــsــــــــــlــــــــــــaـــــــــm يقول...

ان شاء الله هيتحقق حلمك

انتى لحد دلوقتى عامله شغل حلو جدا

ربنا يوفقك وتكمليها للأخر وتبقى مسلسل جامد جدا

بس انا عايز الحلقه الجايه فى السريع عشان سلمى

البت هتروح مننا يا جدعان

يلا بسرعه

شمس النهار يقول...

انا عندي فكرة

انشري اخر حلقه وبعدين ارجعي تاني كملي

:)

جميييييييلة فعلا

وامرنا الي الله هنستني

:))

يوميات شحات يقول...

شكرا على البوست

noaa yousef يقول...

ما شاء الله عليكى بجد
بجد احساسك عالى جدا
انا مبطلتش بكى من ساعه ما بدأت قراءه
جميله جداااا توتا
سلمى صعبانه عليا اوى اوى
وكمان منه ياسر ده ايه ده
ربنا يهدى الرجاله الى بالطريقه دى
منتظرين الجدييييييييد
بس بسرعه

mrmr يقول...

اخس عليكى يا وحشه كده تخلينى ابكى ودموعى مغرقه خدى
انا فعلا عشت مع الحلقه دى لحظه بلحظه
وصعبت عليا قوى سلمى انها انخدعت فى باباها ومنه اللى اتخدعت فى ياسر
حلقه كلها غدر وخيانه وخديعه

تسلمى يا قمر

استمرى فى عذابنا كده الى باقى الحلقات
بس ياريت الحلقه الجايه يكون فيها شئ يفرح القلب

تصبحى على خيرررررر

The illusionist يقول...

وعدتك انى هقراه

اقسم بالله قريتهم كلهم كلهم كلهم لدرجه كلهم فعلا

اولا احب احييكى

احييكى احييكى

فعلا انتى موهوبه

قصتك شدتنى
بجد واقسم بالله صراحه انا مكنش ليا مزاج

طويله وخنقه حكايه انى اجيب سبع بوستات اقراهم

بس اول تلاته ومقدرتش

اسولبك حلو

مفيش ولا تعليق عليكى

انتى تحفه فى اسلوبك

انا معجب بأسلوبك قوى قوى قوى

بجد جميل جدا

ولحد دلوقتى انا متابع معاكى ومش هسيب القصه ابدا باذن الله

انا اسف على الكورس

انا ورايا كورس سبت وتلات والله يا تغريد برجع من الكليه الساعه حداشر بيتنا
بأماره لما علقتى عند فولتا صاحبى

لما نزل البوست

كنت لسه راجع وبزوره ساعتها واول ما شوفت اسمك فى التعليقات ملا وصلته رساله تنبيه

قولتله زمانها زعلانه منى عشان محضرتش الكورس

انا اسف بجد والله نفسى احضرلك

اسلوبك جميل جميل جميل جميل

ما شاء الله

كملى يا تغريد وانا متابع

فشكووول يقول...

السلام عليكم
تحياتى
انا خايف لا تكون عقدة القصه انها كمان ما تلاقيش مامتها جنبها .. احنا بنتابع وحنشوف ايه الموضوع
تحياتى

The illusionist يقول...

انا فى الاخر ومحددش هيقرا تعليقى

احب اقول ان عندك تعليقات تفطسنى من الضحك

رهيبه التعليقات دى

هاجى علطول

لـــولا وزهـــراء يقول...

مسكينة قوي سلمى حالتها ومامتها وتعبها زعلني قوي قوي واللي اسمه ياسر ده ربنا ينتقم منه ومن كل اللي زيه
تسلم ايدك الحلقات مكتوبة حلوة جدا جدا تسلم ايدك ياجميلة لولا

The illusionist يقول...

الله يكرمك على تفهمك
لو كده بس عاوز ابقى اخد المحتوى بتاعه واشوفك هتقولى ايه

اقولك على اقتراح لطيف جميل امور

ما تعملى كمان مدونه كل ما تخلصى الكورس نزلى فيها الكورس ده وباسم تانى خالص يا ستى
او تبع اسمك
فكره حلوه
بجد عجبتك
الله يكرمك لا انا مش ذكى قوى كده
ربنا يكرمك

مستنى ردك

The illusionist يقول...

واضح كده انك مشغوله قوى فعلا

خلاص بصى
لو تحبى اى مساعده منى
انا ممكن اعملك المدونه
وازبطهالك
وانزل الكلام باسمك
انتى بس تبعتيلى المحتوى بتاع الكورس
وانا يا ستى كفيل ازبطهالك
وبالمره كمان فكره احلى
يبقى المحتوى بتاع الكورس ليه مدونه
عشان لو حد جه متاخر
يقرا اللى فاته
ويكمل من الجديد
والمصحف فكره حلوه
وانا هشترك معاكى
انا بصراحه كنت بفكر اشترك
انا خدت كورس اداره الوقت
وكويس حبه فى الانجلش
بس مش بفضى والله
فلو ينفع اساعدك فى الحكايه دى
متبخليش علينا
ومستنى ردك

The illusionist يقول...

اوكى اتفقنا
بس انا محتاج اناقش كام حاجه معاكى
ممكن تقوليلى هتبقى اون لاين امتى
عشان اشيت حبه معاكى واسال على كام حاجه
متخافيش مش هاخد ميلك
هاحط البنج بوكس وخشى شبيتى معايا منو
اتفقنا
الله يخليكى متنسيش
سيبيلى معاد الجمعه هتقعدى امتى ضرورى يا تغريد متنسيش
شوكرا

Blogger يقول...

eToro صفقات التداول المفتوحة في 227,585,248

اكتشف eToro شبكة التداول الاجتماعي الرائدة في العالم حيث يحقق ملايين المستخدمين أرباحًا عن طريق نسخ تصرفات التداول التي يقوم بها أفضل المتداولين.