الأربعاء، 6 أكتوبر، 2010

صعب اصدق كلامك (ح7)





عرفنا الحلقه اللى فاتت ان منال مامه فيروز اتصلت عليها وعايزاها تسيب شغلها وتسافر تعيش معاهم وطبعا فيروز رفضت وعرفنا ان محمد اخو منه قاعد فى مكتبه محتار نفسه يطمن على اخته وعرفنا الحوار اللى دار بين فيروز وزمايلها وشوفنا قد ايه اتصدمت فيروز لما شافت اسم ابو صحبتها فى الجرنال وعرفت انه اتقتل وقررت انها تروحلها واول ماوصلت سمعت زعيق مامتها وصرييييخ سلمى صحبتها تعالوا نشوووووووف ايه اللى حصل
**********************************************
تجرى فيروز وتاخد عربيتها وتسوق بأقصى سرعه وهى مش مصدقه اللى قرته فى الجرنال وكل ماتفكر تخبط على الدركسيون جامد وبتوتر لالالا وتفتح موبايلها عشان تتصل على سلمى تلاقى الموبايل مقفول ترميه جنبها بعصبيه : استر يارب ......ياترى عامله ايه ياسلمى

**********************************************
فى الوقت دا سلمى كانت حابسه نفسها فى اوضتها قاعده على الارض وحاطه راسها على السرير منهارة وقلبها بيتقطع على فراق باباها صورته مابتفارقش خيالها ذكرياته معاها بتمر عليها زى شريط السينما وتنتهى الذكريات بصورة باباها وهو مقتول وتنهار اكتر وتفضل تخبط بإديها على السرير وتفتكر منظر الست اللى كانت معاه ساعتها ترفع راسها وتتقعد فى قعدتها
وتكلم نفسها : بس مين دى !!! ويتردد فى ودانها كلام الظابط (علاقه غير شرعيه ) .......
وتبص على صورة باباها اللى دايما حطاها قدامها على المكتب .
سلمى : معقول يابابا معقول وتكذب نفسها لالالا اكيد مراتك طب مين له مصلحه فى قتلك
وتقوم فجأه وتمشى خطوتين وتقف قدام المكتب .
سلمى : انا مش فاهمه حاجة بس اكيد ماما عارفه لانها اول ماشافتها متخضتش وبصت لبابا بقرف تكون دى بابا اتجوزها على ماما لاااااا انا مديش عقلى لغيرى لازم اروح واسألها وتمسك صورة باباها وتكفيها على وشها وتخرج من الاوضه

*************************************************
تروح سلمى لاوضه مامتها واول ماتدخل تستغرب اوى لما تلاقى مامتها فاتحه الدولاب وبتنزل فى ا لهدوم بعصبيه وعماله تتمتم : حقير السافل ..... الدون منك لله يابعيد حسبى الله ونعم الوكيل
سلمى بإستغراب : انت بتعملى ايه
زينات بعصبيه اكتر : وانت عايزة ايه
سلمى : بتعملى ايه ياماما بتنزلى هدومك ليه ناويه تلمى هدومك وتمشى ولا ايه
زينات ولا مهتميه بكلام سلمى ونزلت الدولاب كله وبعصبيه : انت فين!!!!!
سلمى تقرب من مامتها وتقعد قدامها وتبدأ تنهار فى العياط : ماما عشان خاطرى فهمينى انا عارفه ومتأكده انك عارفه الحقيقه قوليلى وريحى قلبى انا هتجنن دى مراته !!!!!
زينات بتتقطع وتمسح دموع سلمى وبحنان : لازم تنسيه وتمحى اى ذكرى ليه فى حياتك
سلمى : انساه ....... بالسهوله دى كدا انساها .......... ان كنتى انت هتنسيه فانا مش هقدر دا ابويا
زينات والغضب امتلكها : ابوكى دا واااااااطى واللى معاه دى من ضمن الزباله اللى كان بيرمرم فيهم
سلمى تتصدم لان لاول مرة مامتها تتكلم كدا عن باباها وبإندهاش : قصدك ايه
زينات : قصدى ....وتبتسم بسخريه ..قصدى انى عشت على مافيش انه انسان قذر زى اللى كان يعرفهم كنت عارفه عنه كل حاجه راجل دون وانا بستحمل وبسكت
سلمى عايزة تصرخ وتقول لمامتها انت كذابه وفى نفس الوقت الست اللى معاه بتأكد كلامها عماله تبص لمامتها وحاسه انها بتتكلم عن حد متعرفوش ويترسم على وشها اغرب تعبير
وتكمل زينات كلامها :: عارفه ساكته ليه عشانك ...... طول عمرى وانا عارفه كل تصرفاته كنت بعمل المستحيل عشان احسسك بطعم الاسره و ان ليكى اب وياريته عدل كان يجيلى تليفونات وتقولى جوزك وجوزك واانا صابره اقول يابت متخربيش على نفسك اهو ضل راجل ولا ضل حيطه لكن ضل الحيطه كان اهون بكتير من الذل اللى ذقته معاه كان يصرف فلوسه على السهر والحريم وان اللى اصرف عليكى .......اوعى تكونى فاكره ان الايام اللى كان بيباتها بره كان فى شغل لا دا كان بيتسرمح فى اى مكان
عملت كلللل حاجة كللل حاجة عشان نعيش مستورين وهو طلع كل دا على مفيش فضل ماشى ورا نزواته وقرفه لحد ماغار وسبلنا فضيحه عاش قذر ومات قذر ولسه مامتها بتكمل كلامها

سلمى تقوم وتبعد عنها وتفضل تبصلها بإستغراب : حاسه انها فى كابو فظيع وتزعق فيها : كفايه مين دا اللى انت بتحكى عنه اكيد بتكذبى عليا فين الرجال المثالى اللى بتحكيلى عنه راح فين كل كلامك ولا خلاص او مايقع يبقى واطى وحقير ماتردى عليا فهمينى حراااام عليكى حرام عليكى اللى عملتيه فيا ......وتبص لمامتها بحده ماانت اللى هاجراه دايما .......عايزاه يعمل ايه غير انه يدور على حضن تانى ......وكأن سلمى عايزة تطلع مبرر لاى حاجة لان عقلها رافض يسمع للحقيقه

زينات يمتلكها الغضب : اخرسى بقى انت عايزه ايه دلوقتى ......... انا قولتلك كل حاجة عايزة تصدقى صدقى مش عايزة اتفلقى غورى شوفى انت رايحه فين انا لاهستلمه ولاهاخد عزاه ماانت زيه عمرك ماحسيتى بيا دايما ظلمانى ومتهمانى انا زهقت من الدنيا دى كلها
زينات تصعب على سلمى ويكون نفسها تروح تاخد مامتها فى حضنها بس تفضل واقفه مكانها
زينات تلاقى لصندوق اللى بتدور عليه لكن فى دولاب يسرى تفتحه بلهفه تلاقيه فاضى تقعد زينات على الارض وتصرخ وكمان سرقنى وبحرقه حسبى الله ونعم الوكيل فيك يايسرى حسبى الله ونعم الوكييييييييييل وتبدأ تتألم من صدرها : ااااه ااااه وتقع على الارض
سلمى ترجع جرى على اوضه مامتها عشان تشوف فيه ايه تلاقى مامتها واقعه فى الارض تجرى عليها وتنهار : ماااااااماااا قومى وتبدا الدنيا تلف بيها

*****************************************
فى الوقت دا فيروز توصل البيت تطلع جرى على السلم وتخبط على الباب جامد تجرى
سلمى وتفتح الباب وهى منهارة : الحقينى يافيروز ماما اغمى عليها وتسيبها وتدخل على الاوضه وتتصل فيروز على الاسعاف عشان ييجى ياخد زينات





فى الوقت دا يارا ((اخت منه ومحمد )) مشغله اغنية هيرو وقاعده على المكتب وبتلعب فى شعرها وسرحانه على الاخر

(( يارافى 3 ثانوى عايشه فى القاهرة مع خالتها مستنية تخلص السنه دى وتروح تعيش مع محمد فى اسكندريه ......... بنوته جميله جدا حالمه بتجمع فيها متناقضات طيش ورزانه رومانسية وجمود قوة وضعف بتحب الحب ونفسها تعيش اجمل قصه حب بس عقلها دايما بيوقفها دايما يقولها عيب ومينفعش ))
يارا سرحانه فى كريم ((فاكرينه لو مش فاكره ابقى القى نظرة سريعه على اول فقره من (( انانية وحب امتلاك ))
المهم نكمل ...............
عماله تفتكر اليوم دا اللى اتخانق مع واحد عشانها ودى كانت اول مرة تشوف كريم اعجبت بجدعنته معاها ومن بعديها كريم قرر انه يكون فارس احلامها ......... عماله تفكر فى اهتمامه بيها وكلامه الحلو اللى بيقولهولها وفى نفس الوقت بتفكر فى هيثم وفى صراعه مع كريم عشان خاطرها وتقوم من على المكتب وتتمشى بدلع وتقف قدام المرايه وتفضل تبص على نفسها وجمالها وتمسك الفرشاه وتسرح شعرها يخرجها عقلها من دا كله على كابوس (( اهتمى بمذاكرتك )) تسيب الفرشاه وتمسك الكتاب وتاخده وتقعد على السرير وتبدأ تقب صفحات الكتاب ويرن موبايلها تقوم وتروح على المكتب عشان تشوف مين
تلاقيه رقم غريب تستغرب لكن متردش ويتصل تانى تفتح الخط وتسكت ........
كريم : الو
يارا : الو .... مين معايا
كريم : تعرفى مكنتش اعرف انك بالرقه دى
يارا : افندم
كريم : صوتك يجنن فى التليفون
يارا تقفل الخط وكريم يفضل يتصل مرة واتنين وثلاته وهى مبتردش ........واخر مازهقت تفتح الخط
كريم : كدا .......كدا تقفلى وتحرمينى من صوتك الحلو دا
يارا : ماهو لو ماتكلمناش بإحترام وادب هجيب اللى يأدبك صحيح ناس ناقصه ربايه
كريم : واهون عليكى برضو على العموم مش هغلبك معايا ....انا كريم
يارا تتخض ويتقلب كيانها وتفضل ساكته وكريم عمال بيتكلم
كريم : رحتى فين ..... ماهو لو هتفضلى ساكته كدا يبقى اقفل احسن ........ انت زعلتى ولا ايه ..... طيب ياستى حقك عليا انا هقفل ومش هسمعك صوتى تانى
يارا : جبت رقمى منين .... وعايز ايه دلوقتى يااستاذ كريم
كريم : استاذ كريم .... مقبولة منك بس تعرفى طالعه منك سكر جبت رقمك منين دى فانا لما احب اجيب رقم حد بجيبه مابالك انت بقى مش اى حد
يارا قلبها عمال يدق ومش عارفه تتكلم ولا تنطق
كريم : انت لخمه كدا ليه ...... تعرفى دا اللى عجبنى فيكى احترامك انت بت كدا
يارا : ايه بت دى .... بص يااستاذ كريم مينفعش انى اكلمك وياريت متتصش تانى بيا سلام
كريم : كدا برضو
يارا : كدا ونص انا متربتش على كدا وانت شكل سكتك ....وتسكت
كريم : صدقينى سكتى هى انت وانا دوغرى وبكرة الايام تثبتلك هسيبك تفكرى وهكلمك تانى سلام ياقمر
تقفل يارا وتروح ترمى نفسها على السرير وتاخد المخده فى حضنها وبرضو يصحيها عقلها (( متصدقيهوش ممكن يكون بيتسلى ))

**************************************************
توصل زينات المستشفى وتجرى الممرضات ويشلوها على نقاله ويجروا بيها وسلمى بتجرى وراها ومنهاره ويدخلوا بيها على العنايه المركزة تقعد سلمى على الارض وتفضل تعيط
سلمى :يارب بابا وماما فى وقت واحد حرااااااااام ليه يارب لييه دا لو راحت منى هضيع هروح فين من بعد ماما وبابا وتعيط بحرقه
تجرى عليها فيروز وتحاول تقومها وتاخدها فى حضنها ::
فيروز: استهدى بالله حرام عليكى انت هتعترضى على قضاء ربنا ان الله مع الصابرين اثبتى وشدى حيلك وخلى ايمانك قوى ربنا كبير هو احن علينا من اى حد ((قل لن يصيبنا الاماكتبه الله لنا))
***************************************************

فى الوقت دا منه تدخل المطبخ تفتح التلاجة تلاقيها فاضيه تقفلها بزهق وتروح على الاوضه تفتح الدولاب عشان تجيب فلوس وتنزل تشترى تلاقى المحفظه فاضيه تروح تركب فيشه التليفون عشان تكلم ياسر وتشوف هتعمل ايه ان كان يجبها او هى تنزل
ياسر هيقولها انزلى انت
بس للاسف تحصل كااااااااااارثه

ياترى اييييييييييييييه اللى حصل دا اللى هنعرفه المره اللى جايه


هناك 26 تعليقًا:

همسات وبحــ الحياه ــر يقول...

ازيكم ازيكم انا جايه ارغى عندكم

اكيد اصعب احساس فى الدنيا انك تكون بتحب حد وواخد عنه صورة مثاليه وبعد كدا تكتشف انك كنت عايش فى وهم كبير
بيتقلب كل الحب لكره

علفكرة انا بحبكم جدا عارفين ليه عشان انتو خليتونى وادتونى الدفعه انى اكمل القصه
انا كنت كاتبه فكرتها وحاطاها فى الدرج لكن خرجتها وبدأ اتكتبها عشانكم

يااااااارب تنال اعجابكم

خواطري مع الحياة يقول...

السلام عليكم
قصة روعة كل مرة تكون احلى واحلى
كل مرة تشويق بلاحدود
ربنلا يوفقك وتكتبي كمان وكمان
سلامي

محمود(باحث عن حب) يقول...

جيت وقريت
ليه كده
الراجل طلع
نص كم ليه
الست صابره
علشان بنتها
طيب ما تطلق وتعيش حياتها
التضحيه
فى اروع صورها
والبت
اخدت مقلب فى ابوها
يااااه
بجد
البت دى لو ماجلهاش انهر عصبى
تبقى جبل
ه
والبنوته يارا
جميله قوى وعبيطه قوى
تسيح من كلمه
ههههههههههههه
قصه حلوة
ومستينين الكارثه

Dr/ walaa salah يقول...

بصراحه تصويرك للقصه رووعه يا همسات

الحلقه دي جامده مليانه احداث جميله

ربنا يستر على سلمي هتلاقيها منين ولا منين بس تصدقي احسن حاجه ان جنبها فيروز بتحبها وصديقه مخلصه ليها

في انتظار الحلقه القادمه ومتتاخريش علينا كده بالله عليكي

سندباد يقول...

كالمعتاد اثارة وتشويق واحداث مترتبه صح جدا
مع كثرة الشخصيات ممكن نتوه لو انتي مش مسيطرة علي الفكرة كويس
لكن انتي مسيطرة وعارفة بتكتبي ايه وبتعملي ايه
مجهود رائع
تحياتي

قطرة وفا يقول...

انتي اللي قصتك حلوة

احنا مالنا؟


بسجل اعجابي ... كالعادة :)

Mona Abo - Elso3od يقول...

اول مرة ادخل المدونة النهاردة و فضلت ورا القصة من اولها لحد الحلقة دي مش قادرة اقوم و اسيبها عاوزه اعرف ايه الي حصل .
بجد قصة هايلة و قفله كل حلقه تشدك انك لازم تعرفي ايه اللي هيحصل بعد كده
ربنا معاكي و ما تتأخريش الله يخليكي

mena يقول...

كل مرة كده تشوقينا اكتر واكتر بس بجد

القصه حلوة وانتى تستهلى اننا نحني

قدام روعة كلماتك ياقمرى بس انا زعلانه

بردو على منه ياترى ايه اللى حصلها

اصل انا بتشائم عشان اسمها على اسمى

هههههههههه^_^

mena يقول...

هموستى....

ممكن خدمه صغنتوته انا كتبت بوسة جديد

ع مدونة رايق كول وعاوزة رأيك فيه

ممكن تدخلى تشوفيه وتقوليلى رأيك لان

يهمنى اعرفو ده اللينك واسفه انى

كتبت اللينك عندك بس تقدرى تمسحيه

بعد كده انا قولت اسهل عليك الوصول

بحبك موت


http://raykcool.blogspot.com/2010/10/blog-post_07.html

غير معرف يقول...

حلوة اوي اوي
و بجد مستنيا الحلقه الجايه عايزة اعرف ايه اللي حصل :)
didi

غير معرف يقول...

إلى صاحبة التعليق اللي كتبت فيه(اكيد اصعب احساس فى الدنيا انك تكون بتحب حد وواخد عنه صورة مثاليه وبعد كدا تكتشف انك كنت عايش فى وهم كبير
بيتقلب كل الحب لكره)

ما سألتيش نفسك ليه في بعض الناس بتتغير؟ في الحقيقة الناس ما تتغيرش وأصحاب المعادن النقية يبقوا زي ماهم وما زالوا يحتفظون بصورتهم المثالية رغم محاولة من في قلبه مرض تشويههم والانتقام منهم، بس نحن اللي نغيرهم، نغيرهم لما يكتشفوا حقيقتنا الزائفة يتغيروا لما يعرفوا إنهم انضحك عليهم، يتغيروا لما يكتشفوا عالم الكذب والخداع والأقنعة يتغيروا لما يتفاجؤوا أنهم أوغلوا في بحر من المستنقعات، ومع ذلك كله هم لم يتغيروا لمن كان معهم عشرة وعيش ملح لفترة من الزمن، فالصديق وقت الضيق.

على فكرة الراجل ما يتنازلش إلا للي يحبها من كل قلبه.

الحب الجميل يقول...

دموعى معليش أتاخرت عليكى بس هدخل بالليل واقرى واعلق ان شاء الله
وحشتينى

ساسو يقول...

قصه جميله ومسليه ولذيذه من سكره التدوين

عسووووووووووووووووله موووووووووت يا بطتي

جنون عـبقري يقول...

أما كوارث الستات الله يعيننا عليها .. في انتظار باقية الكارثة وربنا يستر!!

mrmr يقول...

حبيبه قلبى
سامحينى يا دموعى لتاخيرى عليكى بس غضبن عنى

شئ صعب للغايه وصدمه ما بعدها صدمه انك تكونى فى شخص قريب منك وتكنى له كل تقدير واحترام وثقه وتعرفوا كويس وفى الاخر تنصدم فيه وتلاقيه انسان لا يستحق اى حب ولا تقدير ولا احترام
سلمى صعبانه عليا قوى احساس فظيع اللى بتمر بيه تجاه باباها

ديما يا قمر عنصر التشويق فى الاخر
نحن فى الانتظار

ربنا يسعدك

كنت اتمنى اشوفك فى اللقاء
لكن ربنا يدبر لقاء اخر باذن الله

عمرو يسرى يقول...

جميله جدا جدا
واحاى حاجه التشويق اللى انتى محافظه عليه فى كل حلقه
مستنين الحلقه القادمه

iـــــــــــsــــــــــlــــــــــــaـــــــــm يقول...

على فكره فى ملاحظه فى دماغى كده

عايز اسألك عليها

هو مفيش ست وحشه فى القصه دى

ولا الرجاله بس هما اللى بيغلطوا

مش عارف مش حاسس ان فيه بنات شخصياتها وحشه حاسسهم كلهم عاديين

والرجاله اغلبهم وحشين

مش فاهم ده تمييز عنصرى ولا لسه فى حاجات جايه فى السكه

عموما انا معاكى للأخر

همس الاحباب يقول...

تصوير للاحداث والمواقف اكثر من رائع
بحس انى قاعد قدام مسلسل درامى بكل اشخاصه وحواراته
تسلم الايادى بجد
تحياتى وفى انتظار المفاجاة

فولتا يقول...

حلو حوار كريم ويارا

D:

كده تمام

استمرى

miroooo يقول...

السلام عليكم
اشكرك على زيارتك لمدونتى المتواضعه
نورتينى بجد
القصه مؤثرة جدا حسيت ان القصه مصورة انا حسيت انى شايفه الشخصيات
فعلا صورة الاب هتنهز وتكاد تنهار بس انصحها انها تترحم عليه فى كل وقت ده ابوها باردو
مستنيه اكمال القصه
اى نعم مش متبعاها من الاول بس فهمت
تحياتى

eng_semsem يقول...

بصراحه قصه جميله بس خلتني افكر يا ترى بنتي بتسمع الكلام ده دلوقتي من امها وممكن تكون بتقولها اكتر من كده يمكن الكلام ده في قصتك حصل بس انا ذنبي ايه لو فرت قصتك وحكتها لبنتي على اني انا يسري؟؟؟؟؟؟
اكيد ده مش غلطتك بس انت دوستي على جرحي

Noha Saleh يقول...

بجد حلوة جدا وانا بفرح اوى لما بلاقى جزء جديد منها
وبزعل اووووووووووى وبتغاظ اوووووووى لما بلاقيها قصيرة
طوليها شوية اعملى معروف:)

Story pain يقول...

ليه النهاية دى يا همسات..بتعملى فينا كده ليه يا بنتى...ده مش تشويق ده تعذيب..
انا عايزه الحلقة الجديدة دلوقتى ماليش دعوة :(

محمد التركى يقول...

السلامو عليكم

انتى يابنتى مش هتبطلى أسلوب التشويق والاثاره بتاعك ده
ماتقولى لو مره
وهنا بقى اللى مش هنشوفه الحلقه الجايه علشان انا هقولهلكم المره دى
كدا ياعنى
هههههههههه

بجد أسلوبك جميل جدا
وهتكونى كاتبه رائعه

متزعليش منى على تأخيرى والله غصب عنى
أنا شغلى سفر على طول دايمأ باجى من السفر مرهك وتعبان ممكن ادخل ابص بصه وماخدش بالى خالص

بس برافو عليكى انك بتفكرينى دايمآ كده بالجديد

تحياتى لأجمل كاتبه على عرش البلوجر
بهديكى ورده لقلبك الجميل

محمـــد التركـــى

R-H-S يقول...

اخيرا خلصت اللي عليا
احنا نسميكي نبيل فاروق بعد كدا

حلو الفلاش باك اللي بتعمليه كل اول حلقه والالوان انتي بتكتبي البوست في كام ساعه؟

سندباد يقول...

المال اصبح قواد وبقت المشاعر سلعة تتباع وتشتري
وعندك حق اصعب الشئ خيبه الامل في شخص كنت فاكره انسان
تحياتي لاسلوبك المميز المقنع الجميل وفي انتظار باقي الحلقات وكلنا معجبين بيها جدا