الأربعاء، 1 سبتمبر 2010

مواجهه وحيره ح3



احنا عرفنا الحلقه اللى فاتت ان ياسر ادى الموبايل لمنه عشان تكلم اخوها تعالوا نعرف ايه اللى حصل

منه تمسك الموبايل وتتصل على محمد وتستنى الرد
محمد فى الوقت دا فى اوضته بيصلى
ويفضل التليفون يرن ويرن وقلب منه عمال يدق وبتكلم نفسها رحت فين يامحمد وياسر قاعد على الكرسى حاطط رجل على رجل ومستنى الرد
محمد يخلص ويجرى على التليفون يلاقى منه ولسه هيرد المكالمه تفصل


ياسر بعجرفه : ((ايه مبيردش .....اخص عليه ملهوش حق .... امال لو مكنش ملهوف وعايز يسمع صوتك كان عمل ايه))
تبص منه لياسر ومتعبروش وتتصلى على محمد تانى تلاقيه مشغول لان فى الوقت دا محمد كان بيتصل عليها تضايق وتحس انها مخنوقه
ياسر : ((هاتى الموبايل دا وروحى حضرلنا الغذا هو يبقى يتصل احنا مش فاضيين للكلام الفاضى دا))
منه بعصبيه : ((كلام فاضى ... هو انا لما اكلم اهلى واطمن عليهم كلام فاضى يااخى حرام عليك حس بيا شوية انت معيشنى فى نار من ساعه ماجيت هنا كنت عملتلك ايه فين كلامك فين وعودك .......مسألتش نفسك مرة ان كنت سعيده ولا لا ان كنت بموت فى اليوم الف مرة ولا لا بتفضل بره لنص الليل ال ايه فى الشغل وانا هنا لوحدى حتى معاملتك ليا محسسنى انى عبده عندك محسسنى انك اشترتنى بفلوسك ليه ياياسر لييه وتنهار فى العياط))

ياسر يسقف : برافو لا بجد برافو تعرفى اول مرة اعرف انى وحش وقاسى اخص عليا ويقوم من على الكرسى ويفضل يقرب منها وهو بيقول (( حرام عليا ..... احس بيكى ......عايشة فى نار ........مش سعيده ......بتموتى الف مرة .........ويقف قدامها وبكل جبروت مش سعيده ليه ناقصك ايه . هاا هو انت كنتى تحلمى انك تعيشى فى المستوى دا ........ كنت تحلمى ان ابص لوحدة زيك ......عايزة ايه اكتر من كدا ))
منه : ((تحس بيا ......نفسى اعرف انت ليه بتعاملنى كدا وكأنى واحده من الشارع مش مراتك حبيبتك))
ياسر : ((انت بالنسبالى واحدة زى اى واحده عرفتها كلكم زى بعض))
منه : ((اجوزتنى ليه محدش ضربك على ايدك ولا غصبك ولا جريت وراك اقولك اتجوزنى والنبى انت اللى حفيت وان كنت ناسى افكرك))
ياسر يقرب منها : ((لا فاكر كويس اوى بس انت عارفة انا اتجوزتك ليه ........عشان عجبتينى كل حاجة فيكى عجبتنى حبيت ألاغيكى لقيتك مبتجيش غير بالجواز قلت اتجوزك))
منه تبصله بقرف :(( تصدق انك احقر واحد انا شفته فى حياتى))
ياسر : ((لالالالالا كدا عيب البنات الشاطرين ميشتموش لحسن عقابهم هيكون جامد اوى))
محمد يحاول يتصل تانى ويرن موبايل ياسر ..........ياسر ياخد الموبايل ويبص لمنه ((رد ياهانم ))ويمسك اديها جامد .... عشان تعرفى انى احسن منك وهعتبر انك مقولتيش حاجة بس حسابنا بعدين

وترد منه بصوت مهزوز : الو
محمد بلهفه : ((الو ايوه ازيك يامنه))
منه : ((تمام حبيبى الحمد لله ....... اخبارك ايه))
محمد :(( مش مهم انا ..... انت اللى اخبارك ايه طمنينى عليكى))
منه : ((انا بخير طول ماياسر حبيبى بخير .......طول ماانا معاه مش عايزة حاجة من الدنيا .....مكنتش متصورة ان فيه حد كدا طيبه ايه وحنيه ايه وحب ايه ربنا يخليه ليا ......انت عارف انا لما افكر انى هنزل مصر عشان الامتحانات و انى هبعد عنه قلبى ميطاوعنيش بحبه بقى اعمل ايه ))
ياسر واقف ومبسوط اوى من كلام منه ومحمد مذهول من الكلام ( هى دى منه اللى كلمتنى الصبح ) ولسه منه بتكمل كلامها يزعق فيها : ((منه فيكى ايه ماتنطقى كان مالك الصبح وعايزة تطلقى ليه وايه الكلام الغريب اللى عماله تقوليه انت بتكذبى على مين دا انا محمد اخوكى))
منه جواها نار ونفسها تعيط وتحكى وتفضفض بس ازاى و ياسر واقفلها زى اللقمه فى الزور
منه : ((ربنا يخليك ليا حبيبى وميحرمنيش منك ويارا كمان هى موجودة اسلم عليها))
محمد : ((منه لازم اكلمك تانى فاهمه لازم))
منه : ((خلاص حبيبى متصحيهاش انا هبقى اكلمها وقت تانى سلام بقى عشان اكمل اكل يسورة حبيبى جعان))
محمد بكل ذهول واندهاش سلام))
تقفل منه وترمى الموبايل على الكنبه
ياسر : ((اطمنتى عليه ....... بس تسلميلى ياعمرى على الكلام الجميل اللى قولتيه))
منه تبصله من فوق لتحت وتروح عشان تكمل طبيخ (( ياترى ايه اللى هيحصل ))

************************************************

فى الوقت دا سراج (( فاكرين دا زميل فيروز اللى شغله المدير وخلاها تدربه )) يروح يفتح باب الشقه ويدخل ((( سراج من المنصورة مامته عايشه (ربه منزل ) وباباه متوفى وليه اختين اسراء ومنى هو ساكن مع 3 شباب كريم وعادل ومراد )) سراج كان مبسوط قوى من اول يوم يروح فيه الشغل يدخل اوضته (( كان منظم جدا )) يغير هدومه يدخل عليه مراد
مراد : ((حمد لله على السلامه))
سراج بإبتسامه :(( تمام يااااه متعرفش انا مبسوط قد ايه))
مراد : ((يقعد على السرير احكيلى احكيلى))
سراج : انا هموت من الجوع
مراد : الاكل جاهز ياباشا بس احكيلى الاول
سراج : هحكيلك واحنا بنغرف
ويروحوا على المطبخ
مراد : ها يلا قول بقى
سراج: ((احساس جميل انك تشتغل واحساس اجمل انك تلاقى اصحاب المكان محسسينك ان واحد منهم وبيعاملوك بحب تحس انك معاهم من زمان مش مهم انت جديد ولا قديم الكل بيساعد بعض المهم الشغل يطلع مظبوط بجد اتمنى اكمل معاهم))

مراد : ((ياسيدى ياسيدى ربنا يوفقك عقبال كدا مااخلص الكليه دى على خير بس بقولك ايه ساعتها بقى تشغلنى امال ايه))
سراج : ((اتخرج انت بس وجيب تقدير وملكش دعوة تلاقى الشركات هى اللى بتطلبك بس نركز هانت كلها كام شهر وتتخرج وتبقى محاسب قد الدنيا))
( مراد انسان كويس جدا بيحب دراسته هو رابعه تجارة انجليزى اهله متوسطين الحال ساكن من اسوان لكن كليته فى القاهرة )
ويحطوا الاكل عشان ياكلوا يسأل سراج على كريم وعادل
مراد : كالعادة بياكلوا بره

يرن موبايل سراج
سراج : الو ازيك يااما
نوارة : ازيك ياحبيب امك عامل ايه
سراج : بخير يااما بس ادعيلى انت
نواره : دعيالك فى كل صلاه وتعيط وحشتنى ياضنايا البيت ملوش حس من غيرك مرتاح فى شغلك ياحبيى هتيجى امتى
سراج : يضحك (( هو انا لحقت دا يادوب يومين اول اجازة مش هتأخر عليكى متعيطيش بس )) اسراء جنبك اكلمها
نوارة : لا دا ياحبه عين امها من الصبح فى الجامعه ........ز بس البت نرجس بنت عمك هنا استنى اندهالك
سراج : لالا يااما استنى بس
نوارة : اسكت ياولا ......... نرجس نرجس انت يابت تعالى كلمى ابن خالك شهلى يابت
نرجس تيجى جرى صحيح يامرات خال وتاخد الموبايل : ((الو ازيك ياسراج ......والنبى ياخويا البيت ساكت من غيرك كان ضرورى سفر يعنى ياخويا ماله الشغل هنا اهو على الاقل تكون جارنا بدل الشحططه بقولك ايه ركز فى شغلك وبلاش لكاعه واياك تبص كدا ولا كدا اه اصلى عارفه بنات مصر ومياصتهم اسيبك بقى بس متعوقش وتعالى على طول سلام))
وتدى التليفون لنواره : تدعيله نواره وتقفل معاه
ويضحك : ولسه هياكلوا الباب يتفتح ويدخل كريم وعادل
يشهق سراج ومراد بلهفه كرييييييييم ويقوموا جرى
ياترى ليه وايه اللى حصل
اللى هنعرفه الحلقه اللى جايه

هناك 33 تعليقًا:

همسات وبحــ الحياه ــر يقول...

واخد اول تعليق

المدونة ومدونتى والعب فيها براحتى

همسات وبحــ الحياه ــر يقول...

واخد التانى عشان خاطر الحبايب

همسات وبحــ الحياه ــر يقول...

ازيكم ازيكم انا جايه ارغى عندكم


بشكر طبعا اى حد ادانى نصيحه او وجهنى لحاجه
بجد تعليقاتكم رفعت من روحى المعنويه خالص واتمنى ان اى حد شكر فى القصه يكون من قلبه يعنى على حق

انا اول مرة اكتب قصه بالسلوب دا
لكن عجبنى اللون دا فى الكتابه
انا عمرى فى حياتى ماقريت ازاى اكتب قصه او ازاى اكتب قصيدة شعر بس سبحان الله هى حاجة جوايا
وفوجئت لما قالولى انى بكتب بإسلوب السيناريو ( يعنى ابداع يامعلم ) وهعمل فيلم قريب اوى هههههههه

القصه دى اغرب قصه كتبتها مش من حيث الفكرة لا من حيث انى كتبتها ازاى
الواحد بيبدأ القصه ويمشى بتسلسل الاحداث لا
لا انا بدأ القصه من النهاية
وكتبت كل شخصيه لوحديها خالص
ابتديت بفيروز ثم محمد ثم يارا ثم زينات وسلمى واخيرا منه وياسر ويمكن الشخصيتين دول اكتر شخصيتين تعبونى فى الكتابه
لانى وانا بكتب لازم اتقمص الشخصيه واحس انى جواها
حتى وانا بكتب اى قصيدة او خاطرة
لازم اعمل قصه فى خيالى الاول وبعدين اكتب عليها لازم احسها عشان اكتبها
عشان كدا اى حد يقرا شعرى يقول لايمكن تكون دا شعر والسلام لازم يكون نابع من تجربه ليكى :)

لدرجة انى مرة عيطت وانا بكتب قصيدة ليله لن انساها (ودى اخر حاجة فى القصه هنا بتحكى عن فيروز واللى .......................
طبعا مش هقول عشان محرقش القصه

واخييييرا
الاخطاء الاملائيه طبعا اعذرونى
اصلى ساقطه املاء وخط :):)
انا حاولت جاهدة انى اظبطها بس لو حد لقى غلطه فى الحلقه دى يتغاضى عنها وله الاجر والثواب عند الله

تحياتى لكل من ساهم فى رفع الروح المعنويه
:):):)

mrmr يقول...

اطمنى احنا مسامحينك فى الاخطاء الاملائيه ان وجدت
اما بقى بخصوص الحقله فهى جميله ومثيره واخرها تشويق كالعاده

بس برافو يا قمر
مش لاقيه اى شئ علشان انقد بجد

نفسى الاقى ثغره ادخل منها لكن سماح النوبه يمكن اعرف اقفشك المرات الجايه هههههههه

تسلمى يا غاليتى
ودمتى سينارست

رمضان كريم

داليـ ـ ـ ـ ـ ـ ــــا يقول...

عارفه انا مضايقه اوى من ياسر ده
انا حاسه ان الناس اللى بتكتبى عنهم دول قريبين منك حقيقى

جميله على فكره الحلقه دى
منتظرين الحلقه الجايه

تحياتى

موجة يقول...

حلو اوووى اسلوبك فى سرد الحكاية
بس عاوزة اعرف هى دى قصة واقعية ولا قصة انتى متخيلاها وياترى كل حلقة بتسرد الحلقة اللى بعدها ولا انتى سرداها كلها فى ورق خارجى
فضووووول
بس الواد ياسر ده طلع
ولا مؤاخذة زباله

Noha Saleh يقول...

بصى وبجد من كل قلبى
القصة حلوة جدا واحداثها ماشية بطريقة هايلة
اسلوبك جميل والاخطاء الاملائية قلت كتير الحمد لله
الحلقة الجاية تكون بسرعة علشان نشوف اخرتها مع الاستاذ ياسر ده

romansy يقول...

ايه يا بت يا منديلى ليالى الحلميه اللى مش عاوزه تخلص دى دى كلها شخصيات عايشه معانا
الله يكون ف عونا بقى

شوية قهوة يقول...

اطمني متقلقيش خالص
احنا ستر وغطى عليكي
حلوة اوي استمري بقى

عمرو يسرى يقول...

طبعا القصه حلوه وجميله واحدثها ماشيه بطريقه جميله ومتابعين نعاكى عشان نعرف ايه حكايه ياسر ديه شكله معقد نفسيا
ومتابع معاكى لحد مااعرف هو سراج ومراد مش هايكلوا ولا ايه ايه الاكله الجملى ديه شكلهم مالهمش نصيب فيها
هياكلوا امتى

تيمور يقول...

الواد ياسر

دة عايز واحد رجل يعلمة الادب

متابع

تحياتى

غير معرف يقول...

بقولك يا دموعى
ابقى اقضى على ياسر دا الحلقة الجايه
موتيه ... حد يديلة علقه تمام
أحسن له برضوا
يا شيخه دا متعب
جميلة تسلم أيدك يا حبيبتى
رائعة
سامحينى على تأخيرى فى التعليق
دمتى بخير

Sahar Elgafary يقول...

بسم الله والصلاة علي رسول الله
بدأت القصه خيوطها تتشابك وتتضح..وتأخذشكل مشوق..
في إنتظار المزيد..
قبل ما نسي حلوه قوي لكنة الصاعيده دي..ونواره ودواره يادنيا ع الآسي
وبن هو ياسر أبوه أسمه أيه...

الــحــــنـــــــــــــــــــين يقول...

جميله اوى وربنا ينتقم منك ياياسر وحلوة اوى الشخصيات الفرعيه والاسامى نواره وسراج انا مستنى اكمل بقيت الحلقات هم كام حلقه ياتىر

ساسو يقول...

تعرفي يا سكره
ياسر دا عايزله علقه موت
بجد خنيقه
يالا بقي كملي

وعلي رأي شفيقه ( متشوقه اسمع كلامك اسمع كلامه أه أه أه )

ايوه كده استاهل لاني جيت بدري

شمس النهار يقول...

لحد دلوقتي جميل

ماتتأخريش بقا في الباقي
عايزة اعرف البنت هتطلق من ذلك الوغد ولا لا
:))))

تحياتي

شمس النهار يقول...

علقت وكنت ماقريتش تعليقك
في برنامج بيصحح الاخطاء الاملائيه علي فكرة
دوري عليه واستعمليه

كمان لازم تقري في موضوع كتابت القصص لأنك فعلا موهوبه وبتكتبي بطريقة لطيفة

والموهبه لابد من ثقلها بالدراسة والمعرفة
ربنا معاكي

تحياتي

VÖltaa يقول...

مينفعش كده بقى مراد فى تجارة انجليزى
الراجل زميلى يعنى
هههههههههه

بعدين الحلقة اللى فاتت كانت طويلة ودى صغيرة
مينفعش التشويق ده يا دمووع ها


منتظرين الباقى :D

سندباد يقول...

جميل
الموضوع يزداد اثارة وتشويق
وزي ما قلتلك قبل كده الجميل ان كل بطل في القصة ليه سر وموضوع وقصة لوحده
وحلوانك قادرة تسيطري علي كل بطل من غير ما الاحداث تدخل في بعضها
الي الامام وفي انتظار باقي الحلقات
علي فكرة
انا متشكر وي لزيارتك الجميلة
تحياتي

باحث عن حب يقول...

ايه الجمال ده كله
10/10
اكسلانت
مستنين الباقى

Story pain يقول...

ايه ده..هي الحلقات بتقصر كده ليه...طيب هنحسبهالك بالوقت أزاى..هي ممكن تتحسب بالكلمة

كل المشاهدين أكيد هيطالبوا معايا

عايزين الحلقات تطول شويه..

وكل يوم حلقة..مالناش دعوة

ميلودى سبورت يقول...

حلوه قوي قوي

إيمان هلال يقول...

فين الحلقه الجديده

الامير سلطان بهنسى سلطان عدو المراة يقول...

يعنى المشكلة كلها طلعت فى الرجل اللى اسمة ياسر

والبنت غلبانة ومسكينة

لما نشوف اخرتها اية

تحياتى

Unknown يقول...

والنبى منه دى صعبانه عليه اوى متفرحيها حبه بقى متخليها تخلع الواد ياسر المفترى ابن المفتريه ده بجد انا حاسه بالظلم واقع عليا انا سخصينا .تسلم ايدك يا قمر بجد انتى موهوبه يالى هستنى البوست الجديد بفارغ الصبر تقبلى مرورى وبالتوفيق.منه

richardCatheart يقول...

هااااااااااااااااايل برافو

معلش اتاخرت بس غصبنى والله

انا قريت الحلقتين ورابعض علشان ربط الاحداث

فى فرق واضح وبتتمكنى كل مره عن اللى قبلها يا قمر

ليا رجاء خلى مره منه تثور على ياسر وتمسك الشبشب وترقعله به مره من نفسها
انت عارفه العقد النفسيه عن الحريم
كتر الضغط دا مش كويس على البنايه

ياريت تحاولى تقللى الحوار شويه وحده وحده وتسرعى الاحداث علشان تبرزى الشخصيات بس انت كده بتفرشى حلو اوى

فى انظار القادم بس لو اتأخرت ماتزعليش والنبى

ومتشكره اوى على مرورك عندى والسؤال يا احلى دموع لقمر

gogo!sf يقول...

تصدقى كده غلط بقى
هتعملى زى المسلسلات العربى تيجى عند جزء مثير جدا وهوب تخلص التمثليه
اجى انا بقى اضايق زى ما اضيقت دلوقتى كده هههههههههههه
قاعده مندمجه جدا وبقول يا دى النيله الناس دى مش هتاكل فى ليلتها ولا ايه القيهم اتخضو استنى عشان اعرف ليه تخلص الحلقه بزمتك ده اسمه كلام

المهم انا عايزة اقولك انك اسلوبك جميل جدا جدا فى الكتابه وبجد انا عشت معاها وكأنى بتفرج على مسلسل تليفزيونى مش بقراء قصه
وده من ابداعك طبعا من اسلوبك فى سرد الحكايه

بجد تسلم ايدك

~ISLAM~ يقول...

دى الليله عماله تكبر وتوسع
طب يلا ارزعينا الحلقه الرابعه بسرعه بقى

Kiara يقول...

انا عيطت من غباوة ياسر

اقتله؟؟

Kiara يقول...

منتظرة الجزء الجاي بفارغ الصبر

سندباد يقول...

جيت اشوف في جديد ولا لاء
تحياتي

جايدا العزيزي يقول...

حلوة اووووووى ياقلبى


اجزاء منسقه بتشد الواحد غصب عنه


مش بقول عليك اديبه كبيرة


بس ابقى افتكرينى


عيد سعيد


وانا معاكم دايما

Ramy يقول...

القصة جميلة

و حلو ان انت بتحولى تذكرينا بالأشخاص و الأحداث علشان نبقى مرتبطين بالقديم

إلى الأمام يا روووميل (:

كل سنة و انت طيبة (: