الثلاثاء، 26 أكتوبر 2010

شـهـوة الـمـال (ح9)



عرفنا الحلقه اللى فاتت ان منه راحت لياسر الشركة وتعرف حقيقته وتشوفه قاعد مع واحده وبيضحكوا !!! وان سلمى قررت تروح للظابط عشان تعرف ايه اللى حصل وبلغها الحقيقه المرة !! زمايل سلمى فى الشغل يقرروا انهم يزوروها ويعزوها فى باباهم ويعرفوا ان مامتها فى المستشفى !!! وعرفنا ان سلمى انهارت بعد ماعرفت الحقيقه والدكتور اداها حقنه مهدئه ونامت ولما صحيت طلبت انها تروح لمامتها !! واعتذرت لها وبكت ودعت ربنا انها تقوم بالسلامه !!! وناامت !!!

تعاااااااالو نشووووووف ايه اللى حصل بعد كدا

*************************************************
فيروز تسيب سلمى بعد ماتطمن عليها و تطلع برا المستشفى وتاخد عربيتها وتروح على شقتها عشان ترتاح وتروح تانى يوم على شغلها مركزة
*******************************************
فى الوقت دا يدخل راضى بابا فيروز البيت يلاقى منال مامه فيروز قاعده على الكرسى وسرحانه حتى محستش بيه لما دخل يقرب منها وهى برضو محسستش بيه
راضى : حبيبى سرحان فى ايه
منال : هاااا
راضى : اللى واخد عقلك ....
منال : روزى كلمتها الصبح واول مرة تكلمنى بالطريقه دى متضايقه ونفسيتها تعبانه لاننا بعاد عنها قولتلها تعالى قالت لا انا لو وحشتكوا بجد تعالو انتو انا مش هسيب مصر ولا هسيب شغلى
راضى : ايه اللى جرا لعقل البيت دى .........وبعدين متضايقه من ايه ماهى اللى رافضه تيجى تعيش معانا هنا ....مؤمنه بشوية مبادىء تافهه هى يعنى هتعمل ايه بقعدتها فى مصر ......انا اللى غلطان انى وافقت على قعدتها من الاول .....الواحد دلعها زياده عن اللازم
منال : يعنى والعمل دلوقتى بجد ياراضى البنت واحشانى كتير واحنا كل سنة بنقول هننزل هننزل وبقالنا 3 سنين هنا
راضى : هو كلام بنتك اثر عليكى ولا ايه .....هو انا ناقصك انت وبنتك .......انا فى دماغى ميت حاجة تانية وبعدين هننزل مصر ليه ولمين مش عارف دماغ البت دى ناشفه لمين .....
منال تقوم من على الكرسى وتقف قدام راضى وبصوت حنون : طب عشان خاطرى كلمها يمكن تحاول تقتنع وتيجى تعيش معانا هنا
راضى : ان شاء الله .........حضريلى العشا لغايه ماغير هدومى وبعدين ابقى اشوف موضوع ست روزى
منال تهز راسها وتروح على المطبخ عشان تحضر العشا

***************************************************
فيروز قاعده على السرير فاتحه اللاب و فجأه يرن موبايلها تبص تلاقيه باباها تحط الموبايل جنبيها بزهق فهى طبعا عارفه الكلام اللى هيتقال ......راضى يرن مرة واتنين .......وترد فيروز : الو ويدور بينهم الحوار المعتاد ...انها تعمل باسبور وتسافر تقعد معاهم وفيروز مصممه انها مش هتسافر ولا هتسيب مصر وبعد جدال .......
راضى : يوووه عليكى الكلام معاكى ممنوش فايده خليكى براحتك بس مترجعيش تقولى نفسيتى تعبانه من الوحده وانتو سايبنى ليه احنا مش هنسيب هنا .........هنا يعنى فلوس ......يعنى امان
فيروز : فلوس .....فلوس ......فلوس .....عما انا مش هسيب شغلى ولا اهلى ولا ناسى ولا الشغل اللى اتعلقت بيه
انا مش محتاجه فلوس انا عايزة احس بالحب بالامان فى حضنكم ......
يبدأ راضى يخف الحوار شوية وبصوت حنون : حاضر حبيبتى هحاول انزل انا ومامى الاجازة دى .....بس عايز اقولك على حاجة .............
ويبدأ يشرحلها ان صاحبه ابو مازن عايز يخطبها لمازن ابنه وانه مش هيلاقى احسن منها
فيروز : طبعا لا هو شافنى ولا عرفنى منين
راضى : صورتك
فيروز : اسفه يابابا ....... انا مش سلعه للعرض والطلب .........انت مشاركه فدى حاجه ترجع لحضرتك لكن انا كمان ادخل فى الاستثمار دا واتجوز ابنه فبجد ببلغ اسفى ورفضى التام للجوازات اللى بالطريقه دى ........انا لما احب اتجوز مش هتجوز غير اللى قلبى يحبه ويختاره مهما كان
راضى بعصبيه : حب ايه وكلام فاضى ايه ......انت شكلك اتجننتى ........ انا هعرف اتصرف معاكى كويس سلاااااا م ويقفل السماعه
ساعتها فيروز ترمى الموبايل وتحط اديها على راسها وتبدأ تبكى وقلبها بيتقطع وتسأل نفسها ((هو فيه كدا .......فيه ناس بالمنظر دا ....ناس ترمى ولادها عشان الفلوس ......ملعون ابو الفلوس اللى تخلى الناس قلوبها حجر )

*********************************************
منه قاعده على الكرسى وعماله تبص فى الساعه وعماله تنفخ وتخبط كف على كف وبتكلم نفسيها : ياترى سارح مع ميين ولا انت فين ...ياربى ارحمنى بقى وبعد فترة يوصل ياسر البيت ويفتح الباب بالراحه ويدخل ويقفل الباب فيعمل صوت يشاور للباب : اششششششش
وعمال يتطوح فى الصاله وبيدندن ....
تخرج منه وبعصبيه : مبدرى ....كنت فين لحد دلوقتى
ياسر يبصلها : فى الشغل .....يعنى هكون فين
منه : شغل ايه لحد دلوقتى ....يالاهوى وكمان شااااارب
ياسر : انت هتحاسبينى ولا ايه
منه : حرااااااام عليك .......ربنا ينتقم منك
ياسر : انت شكلك عايزة تطيرى الدماغ اللى عاملها .....بقولك ايه اوعى من وشى الساعه دى
ويزقها جامد وتقع منه على الارض ويدخل يترمى على السرير زى القتيل تدخل وراه تلاقيه نايم وبحرقه : الهى تنام ماتقوم يابعيد

*******************************************
فيروز فى بيتها عماله تتمشى فى الصاله للاوضه للصالون ودماغها هتتفجر من التفكير فى سلمى واللى حصل ومامتها اللى فى المستشفى .. وفى باباها ومامتها اللى مش مبطلين زن على ودانها انها تسافر .....وفى ان باباها عاملها استثمار لامواله وفى منى اللى اخدت اجازة .......والشغل اللى هيتكركب عليهم وتمسك موبايلها وتتصل على منى وتطلب منها انها لازم تروح الشغل بكره عشان الشكل هيتراكم وكفايه غياب سلمى وبصعوبه توافق وتحط الموبايل على المكتب وتقعد على السرير وترجع راسه لورا ويمر عليها اليوم زى شريط السينما ويغلب عليها النوم






****************************************
وتانى يوم يصحى سراج علشان صلاه الفجر يقوم ويستغرب ان مراد مش نايم فى سريره يطلع من الاوضه يلاقيه قاعد على السفره وبيذاكر يفرح اوى ويقرب منه وبصوت حنون : ربنا يبارك فيك ويوفقك
يبصله مراد ويبتسم : اهو بعمل اللى عليا وكله على الله
سراج : طب يلا قوم عشان تصلى معايا
ويروح عشان يصحى كريم وعادل عشان يصلوا معاه .....بس للاسف يلاقيهم فى قمه الاستهتار
عادل : ياعم وحد الله وسبنى انام انا سهران طول الليل وملحقتش اغمض عينى
كريم : سراج انا صليته امبارح هو كل يوم وبعدين فكك بقى عشان نسلك سوا مش كفايه عليك مراد

سراج يهز راسه وهو مش راضى عن اللى بيحصل وفضل يكلم فيهم وينصح وهما ولا هنا وبإعجوبه يقوم معاهم عادل لكن كريم نااااااااايم
*****************************************
يطلع الصبح وتصحى فيروز على صوت رن موبايلها تبص تلاقيها منهى تتنهد : خيير يامنى ....وترد طبعا منى بتعتذر عن انها مش هتقدر تروح لان باباها منشف دماغه انها لازم تروح البلد معاهم ومينفعش تقعد لوحديها ورصت الشغل معاها انها هى وسراج يقسمه شغل سلمى عليهم وممدوح وسماح يمسكوا شغلها النهارده بس وهى هتتيجى بكره فيروز تتضايق جدا
فيروز : منى بجد بتهزرى مينفعش الكلام دا المفروض نشيل بعض وبعدين نشيل شغل اللى مامتها تعبانه ولا اللى رايحه البلد تحضر فرح .........
منى غصب عنى صدقينى هاجى بكره وهحاول تانى برضو يمكن ........
فيروز تقفل معااها وهى متضايقه قوى وبزهق : كملت .........
تقوم فيروز كالعاده تشغل شريطها المفضل انا لحبيبى و تلبس هدومها وتنزل تروح شغلها وهى فى العربيه تلاقى مامتها بتتصل تنفخ بزهق وتقفل الموبايل خالص عشان تريح دماغها ..... وتوصل الشغل تلاقى سراج هناك وعمال يظبط فى الشغل تعجب جدا بنشاطه واهتمامه ....... تدخل وتصبح لعليهم وتثنى على سراج لهمته .... ويمر الوقت ويبدأ الموظفين ييجوا وتدى كل واحد شغل اضافى .........ويبدأوا الشغل بنشاط عشان خاطر ميحصلش عجز او لخبطه ..........
وتفتح موبايلها عشان تكلم سلمى وتطمن عليها ......تلاقى مامتها باعتالها رساله وزعلانه جدا انها مبتردش عليها وقافله موبايلها وبتقولها ان باباها متضايق وبتترجاها تفكر فى موضوع خطوبتها من مازن لانها هتفرق كتير وبتترجاها كمان بلاش تنشيفه الدماغ لانهم عارفين مصلحتها اكتر منها .........تقرأ فيروز الرساله وتتضايق جدا من محتواها وخلاص الدموع هتنزل من عيونها وتحط الموبايل بزهق وهى بتتمتم .....اعملى باسبور ...سيبى شغلك ....فكرى فى مازن .....لا هعمل بسبور ولاهكون لعبه فى ايد حد .........
سراج عمال يراقبها ومندهش جدا من انفعالها وتصرفاتها وحس ان عندها مشكله حاول يتكلم معاها ويخرجها من اللى هى فيه
سراج يبصلها ويبتسم : يضايقك لوسألتك مالك
فيروز تتنهد وتهز راسها : مفيش بس فيه شوية حوارات شغلانى .......متشغلش بالك انت
سراج : انا متاكد انها مش حاجة بسيطه انت مشوفتيش نفسك كنتى منفعله ازاى .....بجد لو انت متضايقه من حاجة انا على اتم استعداد انى اقف جنبك
ويقطع كلامه صوت رن موبايل فيروز وترد على مامتها وتشد معها جامد وتقفل وترمى الموبايل وهى خلاص نفسها تصرخ
سراج : فيروز ......انت اقوى من كدا ......انا تقريبا فهمت ايه الحوار بس اكيد مش هينفع كلامنا هنا ....يضايقك لو طلعنا برا فى البريك .....
فيروز
تحاول تخبى دموعها و تهز راسها انها موافقه اخيييييييرا لقت حد هيتكلم معاها ويشيل همها بعد سلمى .....

*******************************************
فى الوقت دا كريم واقف قدام باب مدرسه يارا ((فاكرينها ايون هى البنوته الدلوعه اللى معجبه بكريم لو مش فاكرينها اقروا عنها هنا
((صعب اصدق كلامك )) المهم
واقف هو وعادل مستنى يارا لما تخرج عشان يكلمها
عادل : ياابنى بقى سيبك من البنت دى ......هى يعنى من قله
كريم : ادام ياابنى دخلت هنا (ويشاور على راسه ) ) يبقى خلاص واكيد ليها مدخل .......وبعدين مفيش حد بيقول لكريم المحمدى لا واللى يقول لا يبقى هو اللى جنى على نفسه
عادل : ياابنى هى حرب .......اللى تلين اهى مقضيانا واللى متلنش بالسلامة فكك منها
يرن جرس المدرسه والبنات يخرجوا ويفضل كريم مستنى لغايه مااخر واحده تخرج ويارا لسه ماخرجتش
عادل يضحك : اهى حلقتلك يامعلم ...
كريم : يااهبل هو كان بينا ميعاد اصلا .....واهى الجيات اكتر يلا يافقرى نشوف ورانا ايه
عادل : يلا يااخويا بس على فين العزم
كريم : تعالى نشقر على الجامعه ناخد الخلاصه وبعديها نعدى على البرنس ناخده ونطلع نلفلنا سجارتين ونضرب كام سندوتش قشطاااااات
عادل : ماشى يامظبطنى قشطااااات ويرحوا يركبوا العربيه ويمشوا

*******************************

فى الوقت دا تطللع فيروز ويقعدوا فى الكافتيريا يتكلموا وتقتنع انها تروح وتعمل الباسبور واووووووول ماتوصل للجوازات تحصل مفاجأه هتفرحها وهتحزنها فى وقت واحد يااااترى ايه هى ......

هناك 28 تعليقًا:

همسات وبحــ الحياه ــر يقول...

حبااايبى اتأخرت عليكم

بس بجد كنت مشغوله جدا الفترة اللى فاتت البوست دا بقالى 3 ايام بكتبه ههههه

عايزة اعرف رأيكم بصراحه فى البوست دا

عارفين ان لولاكم بجد مكنتش كملت القصه ولا اهتميت بيها

همسات وبحــ الحياه ــر يقول...

فيه ناس سألتنى البوست بتكتبيه فى قد ايه

البوست بكتبه وبظبطه فى ساعتين

القصه مكتوبه فى ورق على هيئه عناصر وافكار
ولما بكتبها اكيد تاخد منى وقت
وكل مرة بتطلع ليا فاكار جديدة
بس طبعا لو فضلت كدا يبقى مش هخلص القصه دى خااالص

دعواااااتكم يااحلى اخوات واصحاب

Ramy يقول...

موقف فيروز انا مبسوط بيه جدا

انا حاسس الخبر


أن مازن مات و ريح و استريح (:

عارفة هقولك حاجة بس دة مدح مش ذم

أنا حاسس كأنى بشوف مسلسل بجد

حاسس و شايف الشخصيات قدامى

Ramy يقول...

معلش بقى انا كنت مقصر معاكى الفترة اللى فاتت

بس يشفعلى انى اول تعليق و تانى تعليق انهاردة (:

Mona Hekal يقول...

شاطرة نزلتيها زي ما قلتي انا لسه ما قريتش بس هاقراها حالا و ارجعلك

Mona Hekal يقول...

ايه التهريج ده دي خلصت بسرعة
ماشي امرنا لله نستحمل حلوة طبعا كالعادة و يا ريت السيد ابو فيروز يفوق قبل ما تحصل كارثة ما هو الصنف ده اخرته بتبقي بمصيبه بس يا ريت ما تجيش في فيروز
مستنيه الحلقة الجايه

Carmen يقول...

القصة سخنت وولعت نار
ربنا يستررررر
اوعي تتأخري تاني بقي
هستناك ع نار
سلاااااااام
¥k¥

The illusionist يقول...

اهو السخااااااااااااافه بقى انى لما قريت القصه

كنتى بتقولى هنشوف هيحصل ايه

وانط انجز على البست اللى بعده احرق اللى هيحصل

المفروض انى هستنى بقى

عااااااااااااااااااااااا

هو انا مصيبه البقيه فى الحلقه القادمه دى وراي ورايا

الله يخرب بيوتهم زى ما جننونى كده بتوع مونان

ماشى مستنى

وهقولك رايى بقى

لما المدونه دى تنقفل خالص

هههههههههههههههههههههههههه

بس كالعاده

مضطر اتابع الباقى لان الجديد شدنى

gogo!sf يقول...

يا بنتى دى قصه جميله جدا وشدانى اوى احداثها بجد مسلسل اكتر من رائع

انتى مؤلفه بارعه والله يا قمر

ربنا يكرمك ويوفقك اللهم امين

عايزة اعرف بقى المفاجأه اصلى ممكن اكون توقعتها بس مش هحرقها اصلها ممكن تكون كمان غير توقعى هههههههههههه

دومتى فى غايه التألق يا جميل

غير معرف يقول...

وبعدين يا قمر اية اسلوب التشويق داااااااا
ولعى فى اللى اسمة ياسر دا
هههههههههههههه

غير معرف يقول...

اسلوبك جميل وعجبنى مووووووت
موهبة يابنتى والله
بسم الله ماشاء الله عليكى

Noha Saleh يقول...

بجد جامدة
انا مستنية اعرف ايه المفاجأة اللى تحزن وتفرح فى نفس ذات الوقت دى

ツSmiLeY AnGeLツ يقول...

السلام عليكم
القصة اليوم جميلة وطولت فيها ايوة كده كوني طولي عشان مانجلس مستنين اكثر
ربنا يوفقك ويحفظك
سلامي لاجمل واحلى بنوتة.

غير معرف يقول...

حلوة اوي اوي يا توتة
فين الباقي بسرررررررررررررعه
ديدي

دعاء مختار يقول...

اول مرة اجى المدونة

بس بجد شدتنى جدااااااا الحلقه

وقريتهم كلهم

عايزة اقولك انك ممتاااااازة بجد
وان شاء الله هتكونى كاتبه مشهورة

~ISLAM~ يقول...

على فكره انا حاسس بكروته النهارده
مالها صغيره كده ليه
عايزين جرعه حلوه كدده تصبرنا للحلقه الجايه
تصدقى كده مينفعش وشكلى هزعل
يعنى ولا عرفنا منه هتعمل ايه
ولا فيروز هتعمل ايه
ولا سلمى عملت ايه

عايزين شغل فيه ضمير يا همسات
كبرى الحلقه شويه ومتخفيش مش هنزهق
انا عارف انك بتخافى من النقطه دى
بس بجد متابعينك حابين كده

يلا سلامو عليكم

المدفعجي يقول...

رائعه حقاااااا

شمس النهار يقول...

ميه ميه

عارفه نفسي الاخ ياسر تجيله شوطه تاخده

ياريت تعملي فيه عملة شنعاااااااااااء

بناء علي طلب الجماااهير

:))

محمود نشأت يقول...

الحلقة دى جميلة على فكره و كمان الحوار بقى احلى

و متابع باذن الله و فى انتظار الحلقه اللى بعديها

ساسو يقول...

سكره حياتي
وحشتيني موووووت يا جميله
بجد غيابي كان غصب عني

كل الحلقات في الجون يا سكره
وبجد مستمتعه اخر حاجه
وفي انتظار الباقي

تسلم ايديكي يا قمرايا

Dr/ walaa salah يقول...

رووعه الحلقه دي اوي


احداثها جميله اوي وكتيره


ايوه كده كتري من الاحداث في الحلقات


منتظره الحلقه اللي جايه يا حبيبتي

همس الاحباب يقول...

امممممم
طبعا فاتتنى الحلقة اللى فاتت
فرجعت قريتها من الاول وتابعت تسلسل الاحداث
لان القصة رائعة ومسلسلة
تنفع بجد حلقات مسلسل تليفزيونى رائع
ربنا يوفقك
مجهود عظيم وفكرة رائعة جدا
ومعجب جدا بتمسك فيروز بمصر وحبها لبلدها
تحياتى

الازهرى يقول...

مممممممممم
وبعدين فى الحلقات اللى تحرق الدم بالنهاية المبتورة

ما علينا نستنى الحلقة الجاية وامرنا لله


تحياتى دوما

شوية قهوة يقول...

معلش اتاخرت عليكي
بجد تحفة ومشوقة جدا وفعلا كل مرة بزيد حلوة
متتاخريش بقى في الحلقة الجية

زينب علي حبيب يقول...

فين الحلقة الجديدة ... بقالي مستنية كتير :((

زينب علي حبيب يقول...

ايوة صحيح سرقت اسلوبك أو بالاحرى تعلمتو واستخدمتو بقصة :)

شفتي بقا ... بقيتي معلمة :)

rasha يقول...

ياريت بقى تنزلى يا قمر الحلقة اللى جاية بسرعة علشان انتى كدة شوقتينا بجد اسلوبك حلو جدا فى الكتابة

شركات تنظيف بالجنوب يقول...

شركة مجموعة زهور العاصمة في مدين ةالخرج في المملكة العربية السعودية تقدم أفضل الخدمات المنزلية عن طريق أفضل الأيادي العالمة والماهرة والمدربة على اعلى مستوى للقيام بكافة الخدمات المنزلية من عزل اسطح وعزل خزانات وعزل فوم وتسليك مجاري عليك بالتواصل وسوف نصلك في أسرع وقت واليكم بعض خدماتنا شركة نقل عفش بالخرج
شركة تنظيف بيارات بالخرج

شركة تسليك مجاري بالخرج
شركة عزل أسطح بالخرج
شركة صيانة كهرباء بالخرج

شركة كشف تسربات المياه بالخرج
شركة رش مبيدات بالخرج
شركة عزل خزانات بالخرج